Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Mataio 8:1-34

8  Ua maliu ifo o ia mai i le mauga, ona mulimuli atu lea iā te ia o tagata e toʻatele.  Faauta! Ua sau le tagata lepela,+ ua ifo mai iā te ia ma faapea mai: “Le Alii e, a e finagalo i ai, e mafai lava ona e faamamā mai iā te aʻu.”  Ona faaloaloa atu ai lea o lona aao, ua paʻi atu iā te ia, ma faapea atu: “Ou te loto i ai. Inā mamā ia oe.”+ Ona mamā ai loa lea o lona lepela.+  Ona fetalai atu lea o Iesu iā te ia: “Ia aua lava neʻi e taʻu atu i se tasi.+ Ae ia e alu ma faailoa atu oe i le ositaulaga,+ ma avatu le meaalofa+ e pei ona faatonuina e Mose, e fai ma molimau iā i latou.”  Ua alu atu o ia i Kapanaumi,+ ona sau ai lea iā te ia o se taʻitaʻiʻau,* ua ʻaiʻoi mai  e faapea: “Lau susuga e, o loo faataotolia laʻu auauna tane i le fale, auā ua pē lona tino ma ua matuā tigāina lava.”  Ona ia fetalai atu lea: “O le a ou faamālōlō iā te ia pe a ou taunuu atu.”  Ona tali mai lea o le taʻitaʻiʻau: “Lau susuga e, e lē aogā aʻu ona e ulufale atu i lalo ifo o loʻu fale, ae e tau lava o sau fetalaiga ona mālōlō ai lea o laʻu auauna tane.  Auā o aʻu foʻi o le tagata ua pule ai isi, ua ou pule foʻi i fitafita ma pe a ou fai atu i le tasi, ‘Alu ia!’+ Ona alu ai lea, ma le isi, ‘Sau ia!’ ona sau ai lea o ia, ou te fai atu foʻi i laʻu pologa, ‘Ia faia le mea lenei!’ ona fai ai lea e ia.” 10  Ua matuā ofo Iesu ina ua faafofoga atu i lenā mea, ma ua faapea atu iā i latou ua mulimuli mai iā te ia: “Ou te taʻu atu iā te outou le mea moni, Ou te leʻi iloa lava i Isaraelu se tasi ua faapea ona malosi o lona faatuatua.+ 11  Ae ou te fai atu iā te outou, e toʻatele e ō mai mai le itu i sasaʻe ma le itu i sisifo+ e taooto e aai faatasi ma Aperaamo, Isaako, ma Iakopo i le laoai i le malo+ i le lagi.+ 12  A o atalii o le malo,+ e lafoina i fafo i le pogisa. O i inā e latou te tagiauē ai ma lilivau o latou nifo.”+ 13  Ona fetalai atu lea o Iesu i le taʻitaʻiʻau: “Alu ia oe. Ia taunuu lenā mea e tusa ma lou faatuatua.”+ Ona mālōlō ai lea o le auauna tane i lenā lava taimi. 14  Ua ulufale atu Iesu i le fale o Peteru, ua ia silafia ai o loo taoto le tinā o lana avā,+ ma ua maʻi i le fiva.+ 15  Ua paʻi atu o ia i lona lima,+ ona teʻa ai lea o lona fiva. Ua tū o ia i luga ma amata ona auauna atu iā te ia.+ 16  Ua oo i le afiafi, ona aumai ai lea e tagata iā te ia o le toʻatele o ē ua uluitinoina e temoni, ma ua ia tulia agaga leaga i ana upu, ua ia faamālōlō foʻi i latou uma ua mamaʻi tigāina; 17  ina ia taunuu ai le upu a le perofeta o Isaia: “Ua ia tauave o tatou maʻi ma tigā.”+ 18  Ina ua silafia e Iesu le motu o tagata ua siʻomia o ia, ona ia poloaʻi atu lea ina ia alo atu le vaa i le isi itu.+ 19  Ona sau ai lea o le tasi tusiupu ma faapea mai iā te ia: “Le Aʻoaʻo e, ou te mulimuli atu iā te oe i mea uma e te maliu atu i ai.”+ 20  Ae ua fetalai atu Iesu iā te ia: “E fai lua o alope,* e iai foʻi mea e momoe ai manufelelei o le lagi, a o le Atalii o le tagata e leai se mea e moe ai o ia.”+ 21  Ona fai mai lea o le tasi o le ʻausoo iā te ia: “Le Alii e, tuu mai aʻu seʻi oʻu alu muamua e tanu loʻu tamā.” 22  Ona fetalai atu lea o Iesu iā te ia: “Mulimuli mai pea iā te aʻu, ae tuu ai pea ē ua oti e tanu lava e o latou tagata oti.”+ 23  Ua maliu aʻe o ia i le vaa,+ ona mulimuli atu ai lea o ona soo iā te ia. 24  Faauta! Ua agi malosi mai le matagi, ma ua matuā sousou ai le sami, ua osofia ai le vaa i galu; ae peitaʻi o loo moe pea Iesu.+ 25  Ona latou ō mai lea ma ua fafagu+ iā te ia ma faapea mai: “Le Alii e, ia e faaola mai iā i matou, auā o le a matou feoti!” 26  A ua ia fetalai atu iā i latou: “Aiseā ua outou fefefe ai, o outou o ē e faatuatua itiiti?”+ Ona tū lea o ia i luga ma vavao i le matagi ma le sami, ona toʻafilemu ai lea.+ 27  Ona ofo ai lea o tamāloloa ma fai ane: “O ai lava lenei tagata+ ua usiusitaʻi i ai le matagi ma le sami iā te ia?” 28  Ua oo atu o ia i le isi itu i laufanua o Katara,+ ona fetaui ai lea o ia ma tagata e toʻalua ua uluitinoina e temoni,+ ua ō mai mai le fanuatanu. Ua matuā feʻai lava i laʻua, ma ua palaaai tagata e uia lea auala. 29  Faauta! ua la feʻei mai: “O oe na le Alo o le Atua, aiseā ua e faalavelave mai ai iā i matou?+ Po ua e sau ea e faapuapuagatia+ i matou a o leʻi oo i le taimi ua atofaina?”+ 30  Ae o loo aai mai se lafu puaa tele i se mea mamao. 31  Ona ʻaiʻoi mai lea o temoni iā te ia: “Afai e te tutuli iā i matou, ia e aauina atu i matou i le lafu puaa.”+ 32  Ua fetalai atu o ia iā i latou: “Inā ō ia!” Ona latou ō lea i fafo ma ō atu i le lafu puaa; faauta foʻi! ua taufetuli atu le lafu puaa uma ma feosofi i le tofē i le sami, ma mamate ai i le sami.+ 33  Ona sosola ai lea i le aai o ē na tausia le lafu, ma logo atu mea uma, e aofia ai ma le mea ua tupu i tamāloloa na uluitinoina e temoni. 34  Faauta! Ua ō mai tagata uma o le aai e faafetaui iā Iesu, ma ina ua latou iloa atu o ia, ona latou faatauanau atu lea ina ia alu ese mai i o latou itumalo.+

Faamatalaga Pito i Lalo

O le taʻitaʻi o le toʻaselau.
O le “alope” o se ituaiga o taʻifau. O le upu Peretania o le fox.