Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Mataio 21:1-46

21  Ua latalata i latou i Ierusalema ma ua taunuu atu i Petefake i le Mauga o Olive, ona aauina atu lea e Iesu o ona soo e toʻalua,+  ma faapea atu: “Ia oulua ō i le nuu lea o loo oulua vāai atu i ai, e lua te maua ai se asini o loo nonoa ma lana tama, ia tatala ma aumai iā te aʻu.+  Afai e fai mai e se tasi se upu iā te oulua, ia oulua fai atu i ai, ‘E manaʻo i ai le Alii.’ Ona ia tuuina mai loa lea.”  Ua tupu lenei mea ina ia taunuu ai le upu a le perofeta e faapea:  “Ia outou taʻu atu i le tama fafine a Siona, ‘Faauta! O loo afio mai iā te oe+ lou Tupu e agamalu+ o ia, ma o loo tiʻetiʻe i le asini, o le tamaʻi asini foʻi, o le tama a le manu ave avega.’ ”+  Ona ō atu lea o ia soo ma fai e pei lava ona faatonuina ai i laʻua e Iesu.  Ona la aumaia lea o le asini ma lana tama, ua fofola ai i luga o latou ofu tele ona tiʻetiʻe ai lea o ia.+  Ua fofola foʻi e le toʻatele o le motu o tagata o latou ofu tele+ i le ala, a o isi foʻi ua latou tā mai lālā o laau ma fola ai.+  A ua alalaga atu pea le motu o tagata o ē ua muamua atu iā te ia, ma ē o loo mulimuli mai e faapea: “Matou te tatalo ia faaolaina*+ le Alo o Tavita!+ E manuia lē e maliu mai i le suafa o Ieova!+ Matou te tatalo i lē e afio i mea maualuluga,+ ina ia faaola iā te ia!” 10  A o ulu atu o ia i Ierusalema,+ ua vevesi le aai atoa ma faapea ane: “O ai ea lenei tagata?” 11  A ua fai atu pea le motu o tagata: “O Iesu lenei, le perofeta+ mai Nasareta i Kalilaia!” 12  Ua ulufale atu Iesu i le malumalu ma tutuli i fafo ē uma ua fai fefaatauaʻiga i le malumalu, ma fuli laulau a tagata suitupe ma nofoa o le ʻaufaatau lupe.+ 13  Ua ia faapea atu iā i latou: “Ua tusia, ‘E taʻua loʻu fale o le fale tatalo,’+ a o lenei ua outou faia ma ana o ē e faomea.”+ 14  Ua ō ane foʻi tagata tauaso ma pipili i le malumalu, ma ua ia faamālōlōina i latou. 15  Ua iloa e le ʻaufaitaulaga sili ma le ʻautusiupu galuega mamana ua ia faia+ ma tama o loo alalaga i le malumalu e faapea: “Matou te tatalo ia faaolaina+ le Alo o Tavita!”+ ona feita ai lea o i latou 16  ma fai mai iā te ia: “Po o e faalogo atu ea i a latou upu?” Ua fetalai atu Iesu iā i latou: “Ioe. Pe e tou te leʻi faitau ea+ e faapea, ‘Ua e saunia le viiga e ala mai i gutu o tamaiti ma pepe’?”+ 17  Ona ia tuua lea o i latou ae maliu atu i le aai o Petania ma tofā ai i inā.+ 18  A o toe foʻi atu i le aai i le taeaopō, ona ia fia taumafa ai lea.+ 19  Ua silafia e ia le laau o le mati i tafatafa o le auala, ua ia maliu atu i ai ae e leai ni fua,+ ua na o lau. Ona ia faapea atu lea i le mati: “Aua neʻi toe iai ni ou fua e oo i le faavavau.”+ Ona mamae faafuaseʻi ai lea o le mati. 20  Ua iloa atu e le ʻausoo, ona latou faapea ane lea: “Aiseā ua mamae faafuaseʻi ai le mati?”+ 21  Ona tali atu lea o Iesu iā i latou: “E moni ou te fai atu iā te outou, Afai tou te faatuatua ae lē masalosalo,+ e lē gata tou te faia e pei ona ou faia i le mati, ae tou te fai atu foʻi i lenei mauga, ‘Ia siitia ia ma lafo i le sami,’ ona faia lava lea.+ 22  O mea uma tou te talosaga atu ai i le tatalo ma le faatuatua, tou te maua lava.”+ 23  Ua ulufale atu o ia i le malumalu, ona ō mai ai lea o le ʻaufaitaulaga sili ma le ʻautoeaina o le nuu a o ia aʻoaʻo atu, ua faapea mai:+ “O le pule a ai ua e faia ai nei mea? O ai foʻi ua na tuuina atu lenei pule iā te oe?”+ 24  Ua tali atu Iesu iā i latou: “E iai foʻi le mea lea ou te fia fesili atu ai iā te outou. Afai tou te taʻu mai iā te aʻu le tali, ona ou taʻuina atu foʻi lea po o le pule a ai ua ou faia ai nei mea:+ 25  E mai i fea le papatisoga a Ioane? Pe e mai i le lagi ea pe e mai i tagata?”+ A ua latou talatalanoa ma faapea ane: “Afai tatou te fai atu, ‘E mai i le lagi,’ ona ia faapea mai lea iā i tatou, ‘Aiseā la ua outou lē talitonu ai iā te ia?’+ 26  Ae afai tatou te faapea atu, ‘E mai i tagata,’ ua tatou fefefe i le motu o tagata+ auā o lo latou manatu, o Ioane o le perofeta.”+ 27  O lea ua latou tali mai ai iā Iesu: “Matou te lē iloa.” Ona ia fetalai atu lea iā i latou: “Ou te lē taʻuina atu foʻi la iā te outou, po o le pule a ai ua ou faia ai nei mea.+ 28  “O le ā so outou manatu? E iai se tamāloa e toʻalua ona atalii.+ Na alu atu o ia i le atalii muamua ma fai atu iā te ia, ‘Loʻu atalii e, alu e galue i le togāvine i le asō.’ 29  Ona tali mai lea o le atalii, ‘Ua lelei tamā,+ o le a ou alu,’ ae e leʻi alu. 30  Ona ia alu atu lea i le atalii lona lua ma fai atu foʻi faapena. A ua tali mai o ia, ‘Ou te lē alu.’ Mulimuli ane, na salamō+ o ia ma alu. 31  O ai o atalii e toʻalua na faia le mea na loto i ai lo la tamā?”+ Ua latou faapea mai: “O le atalii lona lua.” Ona faapea atu lea o Iesu: “E moni ou te fai atu iā te outou, e muamua atu le ʻauaolafoga ma fafine talitane iā te outou i le malo o le Atua. 32  Na sau Ioane iā te outou i le ala o le amiotonu+ ae tou te leʻi talitonu iā te ia.+ Peitaʻi, na talitonu i ai le ʻauaolafoga ma fafine talitane.+ A o outou, e ui ina outou vāai i ai, ae tou te leʻi salamō ma talitonu iā te ia. 33  “Ia faalogo mai i le isi talafaatusa: Sa iai se matai o le aiga+ o lē na totō se togāvine ma siʻo ai i le pā, ma eli le mea e soli ai vine ma faatū le ʻolo,+ ona ia lisiina atu lea i ē galulue vine ae malaga i nuu mamao.+ 34  Ina ua oo i le tau o fuata o laau, ona ia aauina atu lea o ana pologa i ē galulue vine, ina ia aumai ai ni fua. 35  Ae peitaʻi, na pupuʻe e ē galulue vine ana pologa, ona latou fasi lea o le tasi, ma fasioti le isi, ae fetogi le isi i maa.+ 36  Ona ia toe aauina atu lea o isi pologa, e toʻatele atu i pologa muamua, a o le mea foʻi lenā na latou faia iā i latou.+ 37  Mulimuli ane, ona ia auina atu lea o lona atalii iā i latou, ua faapea ane, ‘E latou te āva i loʻu atalii.’ 38  Ina ua iloa atu e ē galulue vine le atalii, ona latou faapea ifo lea iā i latou lava, ‘O le suli+ lenei, seʻi tatou ō e fasioti o ia ma ave lona tofi!’+ 39  O lea, na latou puʻe ai iā te ia ma lafo i tua o le togāvine ma fasioti iā te ia.+ 40  O lea la, pe a taunuu mai lē e ana le togāvine, o le ā le mea e na te faia i na tagata galulue vine?” 41  Ua latou fai mai iā te ia: “E na te matuā faaumatia+ i latou ona o lo latou leaga, ma lisi atu le togāvine i isi tagata galulue vine, e latou te avatu ai iā te ia ni fua pe a oo i le tau e fuata ai mea.”+ 42  Ua fetalai atu Iesu iā i latou: “Pe e tou te leʻi faitau ea i Tusitusiga Paia, ‘O le maa lea na tuulafoaʻiina e tufuga,+ ua avea ma maa tulimanu sili.+ E mai iā Ieova lenei mea, ma e ofoofogia i la tatou vaai’? 43  O le mea lea ou te fai atu ai iā te outou, E aveesea le malo o le Atua mai iā te outou, ae tuuina atu i se nuu e fua mai ai ona fua.+ 44  E nutililii le tagata e paʻū i luga o lenei maa. Ae o sē e paʻū i ai le maa, e nutipalaina o ia.”+ 45  Ua faalogo le ʻaufaitaulaga sili ma le ʻau Faresaio i ana talafaatusa, ona latou iloa ai lea ua faatatau atu ana fetalaiga iā i latou.+ 46  E ui ina latou mananaʻo e puʻe iā te ia, ae ua fefefe i le motu o tagata, auā ua manatu nei tagata, o ia o le perofeta.+

Faamatalaga Pito i Lalo

I le gagana Eleni, o le “Osana.”