Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Mataio 17:1-27

17  Ua mavae aso e ono, ona ave lea e Iesu o Peteru, Iakopo, ma lona uso o Ioane, ma ō atu i se mauga maualuga ua na o i latou.+  Ona liua lea o ia i o latou luma, ma ua pupula ona fofoga e pei o le lā,+ ua susulu foʻi lona ofu tele e pei o le malamalama.+  Faauta! ua faaali mai foʻi Mose ma Elia iā i latou, ma o loo talanoa ma ia.+  Ua oso vave mai Peteru ma fai mai iā Iesu: “Le Alii e, ua lelei ona ua matou faatasi ai i inei. Afai e te finagalo i ai, ou te faatūina i inei ni faleʻie se tolu, o le tasi mo oe, o le tasi mo Mose, ma le isi mo Elia.”+  A o tautala o ia, faauta! ua ufitia i latou i se ao pupula, faauta foʻi! ua faapea mai se siʻufofoga mai i le ao: “O loʻu Atalii pele lenā, o lē ua malie i ai loʻu loto;+ ia faalogo iā te ia.”+  Ua latou faalogo i le siʻufofoga, ona faapaʻuʻū faō ai lea o le ʻausoo ona ua matuā fefefe lava.+  Ona sōsō atu lea o Iesu, ua paʻi atu iā i latou ma faapea atu: “Tutū ia i luga ma aua tou te fefefe.”+  Ua tetepa aʻe, ua latou iloa ai ua leai se isi ae e na o Iesu.+  A o latou ō ifo mai le mauga, ua faatonu i latou e Iesu: “Aua neʻi taʻua atu lenei faaaliga i se tasi, seʻiloga ua toe faatūina le Atalii o le tagata mai le oti.”+ 10  A ua fesili mai le ʻausoo iā te ia: “Aiseā ua fai mai ai le ʻautusiupu e tatau ona muaʻi sau o Elia?”+ 11  Ua tali atu o ia: “O loo sau lava Elia ma e toe faafoʻisia mea uma.+ 12  Ae peitaʻi, ou te fai atu iā te outou, ua uma ona sau o Elia ae latou te leʻi amanaʻia o ia, ma na latou faia iā te ia mea uma na latou loto i ai. O le a faapea foʻi ona latou faapuapuagatia le Atalii o le tagata.”+ 13  Ona malamalama ai lea o le ʻausoo, ua ia fetalai atu iā i latou e uiga iā Ioane le Papatiso.+ 14  Ua latou agaʻi mai i le motu o tagata,+ ona faalatalata mai lea o se tamāloa iā te ia, ua tootuli i ona luma ma faapea mai: 15  “Le Alii e, ia e alofa* mai i loʻu atalii, auā ua maua o ia i le maʻi māliu ma ua tigāina lava. E masani ona paʻū o ia i le afi ma le vai.+ 16  Na ou aumaia o ia i ou soo, a ua lē mafai ona latou faamālōlōina o ia.”+ 17  Ua tali atu Iesu: “Le tupulaga e, lē faatuatua ma le faapiʻopiʻo,+ o le ā le umi ou te feagai ai ma outou? O le ā le umi ou te faapalepale ai iā te outou? Ia aumai o ia iā te aʻu.” 18  Ona vavao lea e Iesu o le temoni, ua alu i fafo mai iā te ia,+ ona malosi ai loa lea o le tama.+ 19  Ona ō mai lea o le ʻausoo iā Iesu, ua na o i latou ma faapea mai: “Aiseā na lē mafai ai ona matou tulia le temoni?”+ 20  Ua fetalai atu o ia iā i latou: “Ona o le itiiti o lo outou faatuatua. Auā e moni ou te fai atu iā te outou, Afai e pei lo outou faatuatua o le fatu o le sinapi, tou te fai atu i lenei mauga, ‘Ia siitia oe i o,’ ona siitia ai lea, ma e leai se mea tou te lē mafaia.”+ 21  * —— 22  A o latou faapotopoto ma Iesu i Kalilaia, ua ia fetalai atu: “O le a faalataina ma tuuina atu le Atalii o le tagata i lima o tagata,+ 23  ma latou te fasiotia o ia, ae e toe faatūina o ia i le aso lona tolu.”+ Ona matuā faanoanoa ai lea o i latou.+ 24  Ua latou taunuu i Kapanaumi, ona ō mai ai lea o ni tamāloloa e aoina lafoga o le malumalu ma faapea mai iā Peteru: “Pe e totogi e lo outou aʻoaʻo ni lafoga* o le malumalu?”+ 25  Ua ia faapea atu: “Ioe.” Ae peitaʻi, ina ua ulu atu o ia i le fale, ua muamua ona faapea atu Iesu iā te ia a o leʻi fai mai sana tala: “O le ā sou manatu Simona? O ai e tatau ona totogia tupe ma lafoga i tupu o le lalolagi? Po o o latou atalii ea, po o tagata ese?” 26  Ona ia fai mai lea: “O tagata ese.” Ua faapea atu Iesu iā te ia: “O lona uiga la, e saʻoloto atalii mai le totogia o lafoga. 27  Ae ina neʻi latou tausuai+ iā i tatou, ia e alu ma lafo le mātau i le sami, ma o le iʻa muamua e te maua, ia e fafasi lona gutu, ona e maua ai lea o le tupe siliva.* Ia ave lenā tupe ma avatu iā i latou mo oe atoa ma aʻu.”+

Faamatalaga Pito i Lalo

Pe “ia e alofa mutimutivale.”
O lenei fuaiupu o loo maua i nisi faaliliuga o le Tusi Paia, peitaʻi e lē o maua i nisi o manusikulipi tāua faa-Eleni o aso anamua.
Po o tupe “tarakama e lua,” lea e tutusa ma le totogi o aso e lua. Tagaʻi i le Faaopoopoga e 14.
E taʻua foʻi o le “setatara.”