Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Mataio 14:1-36

14  I lenā taimi ua faalogo ai Herota le pule o itumalo i le tala e uiga iā Iesu,+  ona ia faapea atu lea i ana auauna: “O Ioane le Papatiso lenei. Ua toe faatūina o ia mai le oti, ma ua mafai ona ia faatinoina galuega mamana.”+  Auā na puʻeina e Herota Ioane ma saisai iā te ia, ma tuu i le falepuipui ona o Herotia le avā a lona uso o Filipo.+  Auā na fai atu Ioane iā te ia: “E sā i le tulafono ona fai o ia ma au avā.”+  Ae peitaʻi, e ui na manaʻo o ia e fasioti iā te ia, ae na fefe o ia i le motu o tagata, auā na latou manatu o le perofeta+ o ia.  Ae ina ua faamanatuina le aso fanau+ o Herota, na siva ai le tama teine a Herotia ma na matuā faafiafiaina ai Herota.  O lea, na ia tautō ma folafola atu iā te ia e avatu so o se mea lava e talosaga mai ai.+  Ona faaoso ai lea o ia e lona tinā e fai atu: “Ia aumai iā te aʻu i inei le ulu o Ioane le Papatiso+ i se ipu.”  Na tigā le loto o le tupu, ae ona o lona manatu i ana tautoga, ma ē na taooto e aai faatasi ma ia, na ia poloaʻi atu ai ina ia avatu iā te ia.+ 10  Ona ia auina atu lea o se tasi i le falepuipui, ina ia vavaeese le ulu o Ioane. 11  Ona aumai ai lea o lona ulu i se ipu ma avatu i le teine, ona avatu ai lea e ia i lona tinā.+ 12  Na ō atu ona soo, ma aveese lona tino oti ma tanu iā te ia,+ ona ō atu lea ma taʻu atu iā Iesu. 13  Ina ua faafofoga Iesu i lenei mea, ona tuumuli ai lea o ia i le vaa, ua na o ia i se mea tuufua,+ ae ina ua faalogo i ai le motu o tagata, ona latou savavali lea e mulimuli atu iā te ia mai aai. 14  Ina ua maliu atu o ia, ona ia silafia ai lea o le motu o tagata e toʻatele; ua tigā alofa+ o ia iā i latou, ona ia faamālōlō ai lea o o latou tagata mamaʻi.+ 15  A ua oo i le afiafi, ona ō mai ai lea o ona soo iā te ia ma faapea mai: “O le nofoaga tuufua lenei ma ua leva foʻi le aso; ia tuu atu tagata e ō i le aai e faatau mai ni a latou meaʻai.”+ 16  A ua fetalai atu Iesu iā i latou: “E lē tatau ona ō i latou, ae ia outou avatu ni meaʻai ma i latou.”+ 17  Ua latou fai mai iā te ia: “E leai ni a tatou meaʻai i inei, ae ua na o falaoa e lima ma iʻa e lua.”+ 18  Ua ia fetalai atu: “Ia aumai iā te aʻu na mea.” 19  Ona ia faatonuina lea o le motu o tagata ia taooto i le mutia, ona tago lea o ia i falaoa e lima ma iʻa e lua, ma tepa aʻe i le lagi, ua faafetai,+ ona vaevae lea e ia o falaoa ma tufatufa atu i le ʻausoo, ona avatu lea e le ʻausoo i le motu o tagata.+ 20  Ona latou aai ai lea ma ua maoona, ua faaputu foʻi i mea ua totoe, ua tutumu ai ato e sefulu lua.+ 21  O i latou na aai e tusa ma le toʻalima afe o tane, ae e leʻi faitauina ai fafine ma tamaiti.+ 22  Ona ia fai atu loa lea i ona soo e ō atu i le vaa ma muamua atu iā te ia i le isi itu, a ua ia tuuina atu le motu o tagata e ō.+ 23  Mulimuli ane, ina ua ia tuuina atu le motu o tagata e ō, ona maliu aʻe lea na o ia i le mauga e tatalo.+ E ui ua leva le afiafi, ae e na o ia o loo iai i inā. 24  O le taimi lea ua mamao ese le vaa mai le laueleele, ua felafoaʻiina e peau+ auā ua agi malosi mai le matagi. 25  Ona maliu atu lea o ia iā i latou i le leoleoga lona fā o le pō, ua savali i luga o le sami.+ 26  Ua latou iloa atu o ia ua savali i luga o le sami, ona fememeaʻi ai lea o le ʻausoo ma faapea ane: “E uiga ese lenei mea!”+ Ona latou alalaga lea i le fefefe. 27  Ona fetalai atu loa lea o Iesu iā i latou: “O aʻu lenei,+ ia outou lototetele ma aua tou te fefefe.” 28  Ona tali mai lea o Peteru iā te ia: “Le Alii e, afai o oe, ia e fai mai iā te aʻu ou te alu atu iā te oe i luga o le vai.” 29  Ua ia fetalai atu: “Inā sau ia!” Ona oso ai lea o Peteru i lalo mai le vaa+ ma savali atu iā Iesu i luga o le vai. 30  Peitaʻi, ina ua vaai atu i le matagi malosi, ona fefe ai lea o ia ma amata ai ona magoto ifo, ua ia alaga: “Le Alii e, ta fia ola!” 31  Ona faaloaloa atu loa lea e Iesu o lona aao, ua taofi iā te ia ma faapea atu: “O oe lenā o lē e faatuatua itiiti, aiseā ua e masalosalo ai?”+ 32  Ua la ō atu i le vaa, ona malū ai lea o le matagi malosi. 33  Ona ifo ai lea o i latou o i le vaa iā te ia ma faapea mai: “E moni o oe lava o le Alo o le Atua.”+ 34  Ua latou agaʻi atu i le isi itu ma taula ai le vaa i Kenesareta.+ 35  Ua iloa mai o ia e tagata o lenā nuu, ona latou auina atu lea o le feʻau i nuu tuaoi uma, ma ua aumai ai e tagata iā te ia o ē ua mamaʻi.+ 36  Ua latou ō atu ma augani atu iā te ia ina ia tau lava o le paʻi atu i le pito o lona ofu tele;+ ma ua toe malolosi ai i latou uma na papaʻi atu i ai.

Faamatalaga Pito i Lalo