Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Mataio 13:1-58

13  I lenā aso, ua tuua e Iesu le fale, ona nofo lea o ia i tafatafa o le sami.  Ua faapotopoto mai le motu o tagata e toʻatele iā te ia, ona ia maliu aʻe lea i le vaa ma nofo i lalo,+ a ua laulaututū uma mai tagata i le matafaga.  Ua ia faamatala atu iā i latou le tele o mea e ala i talafaatusa, ua faapea atu: “Faauta! Na alu atu se tagata lūlū fatu ina ia lūlū ni fatu;+  ma a o ia lūlū, na paʻuʻū ai nisi fatu i tafatafa o le auala, ona ō mai lea o manufelelei ma ʻai.+  Na paʻuʻū nisi fatu i le mea papa e laʻitiiti le eleele, ona tutupu vave ai lea, auā e lē lava le eleele.+  Ina ua oso aʻe le lā, ua velasia ma magumagu ai ona e leʻi mauaa.+  A ua paʻuʻū isi fatu i le vao tuitui, ma ina ua tutupu aʻe le vao tuitui, ona fetinaʻiina ai lea.+  Ua paʻuʻū foʻi isi i le eleele lelei, ona fua mai+ ai lea e taʻiselau le tasi, e taʻiono sefulu le isi, ae taʻitolu sefulu+ le isi.  O lē ua iai taliga, inā faalogo mai ia o ia.”+ 10  Ona ō mai ai lea o ona soo iā te ia, ua faapea mai: “Aiseā ua e fetalai atu ai iā i latou i talafaatusa?”+ 11  Ua tali atu o ia: “Ua tuuina atu iā te outou ina ia outou malamalama i mea lilo paia+ o le malo i le lagi, ae ua lē tuuina atu i na tagata.+ 12  O sē ua iai mea, e foaʻiina atu nisi mea iā te ia ina ia atili ai ona tele o ana mea,+ a o sē ua leai se mea, e aveesea le mea ua iā te ia.+ 13  O le pogai lea ua ou tautala atu ai iā i latou i talafaatusa, auā ua latou vaavaai ma faalogo fua, ae latou te lē malamalama i uiga o na mea.+ 14  Ua taunuu ai iā i latou le valoaga a Isaia e faapea, ‘Tou te faalogo ae lē malamalama, ma tou te vaavaai ae lē iloa.+ 15  Auā ua maaa loto* o nei tagata, ua faalogo o latou taliga ae e lē tali mai, ma ua moeiini o latou mata; ina neʻi vāai o latou mata, ma faalogo o latou taliga, ma lagona o latou loto ma liliu mai, ma ou faamālōlōina i latou.’+ 16  “Ae peitaʻi, e fiafia outou auā ua vaavaai o outou mata+ ma faalogo o outou taliga. 17  E moni ou te fai atu iā te outou, E toʻatele perofeta+ ma tagata amiotonu na naunau e fia vāai i mea ua outou vāai i ai, ae latou te leʻi vāai i ai.+ Na fia faalogo foʻi i mea ua outou faalogo i ai, ae latou te leʻi faalogo i ai.+ 18  “O lea, ia outou faalogo mai ai i le talafaatusa i le tagata lūlū saito.+ 19  O le fatu na lūlūina i tafatafa o le auala, o ia lea ua faalogo i le upu o le malo ae lē malamalama, ona sau ai lea o lē ua leaga+ ma fao ese le mea na lūlūina i lona loto. 20  A o le fatu na lūlūina i le mea papa, o ia lea ua faalogo i le upu ma talia loa ma le olioli.+ 21  Ua faaauau mo sina taimi ae e leʻi mauaa le upu iā te ia, ma ina ua oo mai puapuaga ma sauāga ona o le upu, ona tautevateva ai lea o ia.+ 22  O le fatu na lūlūina i le vao tuitui, o ia lea ua faalogo i le upu, ae ona o le popole i mea a lenei lalolagi*+ ma le malosi taufaasesē o le ʻoa, ua fetinaʻiina ai le upu ma ua lē fua mai ai.+ 23  A o le fatu na lūlū i le eleele lelei, o ia lea ua faalogo i le upu ma malamalama i ai ma ua fua mai ai, e taʻiselau le tasi, e taʻiono sefulu le isi, ae e taʻitolu sefulu le isi.”+ 24  O le isi talafaatusa ua ia faamatala atu iā i latou e faapea: “Ua faatusaina le malo i le lagi i le tagata na lūlū le fatu lelei i lona fanua.+ 25  A o momoe tagata, ona alu ane ai lea o lona fili ma lūlū vao leaga i le saito, ona alu ese ai lea. 26  Ina ua tupu ma fua mai, ona tupu mai ai foʻi lea ma le vao leaga. 27  O lea ua ō mai ai pologa a le matai ma faapea mai iā te ia, ‘Le alii e, e te leʻi lūlūina ea le fatu lelei i lou fanua?+ A ua faapefea ona tutupu mai ai vao leaga?’+ 28  A ua faapea atu o ia iā i latou, ‘Na faia lenei mea e se tagata, o ia o se fili.’+ Ua latou fai mai iā te ia, ‘E te manaʻo matou te ō atu e vele ese?’ 29  A ua fai atu o ia, ‘E leai, ina neʻi outou liaʻi ese ai ma le saito, a o vele ese le vao leaga. 30  Tuu ai pea e tutupu faatasi seʻia oo i le seleselega; pe a oo i le tau e selesele ai, ona ou fai atu lea i ē selesele, Ia vele ese muamua le vao leaga e fusifusi ma susunu i le afi,+ ona ao mai ai lea o le saito ma tuu i loʻu fale saito.’ ”+ 31  Ua ia faamatala atu iā i latou le isi talafaatusa+ e faapea: “Ua faatusaina le malo o le lagi i le fatu o le sinapi,*+ lea na ave e se tagata ma totō i lona fanua. 32  O lenei fatu, e sili ona itiiti i lo o fatu uma, ae a tupu, e sili atu ona telē i lo o isi fualaau ʻaina ma avea ma laau, e momoe ai manufelelei o le lagi+ i ona lālā.”+ 33  Ua fetalai atu foʻi o ia i se isi talafaatusa iā i latou: “Ua faatusaina le malo o le lagi i se mea faafefete,+ na ave e se fafine ma natia i fua falaoamata tetele se tolu,* seʻia oo ina fefete ai le paluga atoa.” 34  Ua fetalai atu Iesu i le motu o tagata i nei mea uma e ala i talafaatusa. O le mea moni, e fetalai atu o ia iā i latou i taimi uma i talafaatusa.+ 35  Ina ia taunuu ai le mea na fai atu ai e ala i le perofeta o lē na faapea mai: “Ou te tautala atu i talafaatusa, ou te faailoa atu mea ua natia talu ona faavaeina o le lalolagi.”+ 36  Ua tuuina atu e ia le motu o tagata e ō, ona ulufale ai lea o ia i le fale. Ua ō mai ona soo iā te ia ma faapea mai: “Seʻi e faamatala mai iā i matou le uiga o le talafaatusa i vao leaga i le fanua.” 37  Ua tali atu o ia e faapea: “O lē na lūlūina le fatu lelei, o le Atalii lea o le tagata; 38  o le fanua o le lalolagi+ lea; a o le fatu lelei o atalii ia o le malo; o vao leaga o atalii ia o lē o loo leaga,+ 39  ma o le fili na lūlūina vao leaga, o le Tiapolo+ lea. O le seleselega,+ o le taufaaiʻuiʻuga lea o le faiga o mea a le lalolagi,+ ma o ē e selesele, o agelu ia. 40  O lea la, e pei ona vele ese vao leaga ma susunu i le afi, e faapena foʻi pe a oo mai le taufaaiʻuiʻuga o le faiga o mea a le lalolagi.+ 41  E aauina atu e le Atalii o le tagata ana agelu, ma e latou te ao ese mai i lona malo, o mea uma e māfua ai ona tausuai,+ ma i latou uma o ē solitulafono, 42  ma e lafoina i le ogaumu aasa.+ O i inā e latou te tagiauē ai ma lilivau o latou nifo.+ 43  I lenā taimi e susulu+ atu ai o ē e amiotonu, e pei o le malamalama o le lā+ i le malo o lo latou Tamā. O lē ua iai taliga, inā faalogo mai ia o ia.+ 44  “Ua faatusaina le malo o le lagi i le oloa ua natia i le fanua, na maua e se tagata ma nanā ai; ae ona o lona olioli na alu ai loa o ia ma faatau atu+ ana mea uma, ma faatau mai ai lenā fanua.+ 45  “Ua faatusaina foʻi le malo o le lagi i se tagata faatauʻoa o faimalaga e saʻili penina lelei. 46  Ina ua ia maua se penina tautele,+ ona alu loa lea o ia ma faatau atu ana mea uma na iai, ma faatau mai ai.+ 47  “Ua faatusaina foʻi le malo o le lagi i se upega ua lafo i le sami ma maua mai ai ituaiga iʻa eseese.+ 48  Ina ua tumu, ona latou sisi aʻe lea ma toso atu i le matafaga, ua nonofo i lalo ma latou tuu ese iʻa lelei+ i ola, ae lafoaʻi iʻa leaga.+ 49  E faapena foʻi i le taufaaiʻuiʻuga o le faiga o mea a le lalolagi: e ō atu agelu ma tuueseese tagata amioleaga+ mai i tagata amiotonu+ 50  ma lafo i latou i le ogaumu aasa. O i inā e latou te taufai tagiauē ai ma lilivau o latou nifo.+ 51  “Po ua outou lagona ea nei mea uma?” Ua latou faapea mai iā te ia: “Ioe.” 52  Ua ia fetalai atu iā i latou: “Afai o lea, o faiaʻoga uma ua aʻoaʻoina e faatatau i le malo o le lagi,+ ua pei o se matai o le aiga o lē na te aumaia mea fou ma mea tuai mai i lona fale teuoloa.”+ 53  Ina ua uma ona faamatala atu e Iesu nei talafaatusa, ona agaʻi atu lea o ia i le isi nuu. 54  Ua oo atu o ia i lona nuu,+ ona ia aʻoaʻo atu lea iā i latou i o latou sunako,+ ua taufaiofo i latou ma faapea ane: “O fea na maua mai ai e lenei tagata lenei atamai ma nei galuega mamana? 55  Pe e lē o le atalii ea lenei o le kamuta?+ Pe e lē o lona tinā ea o Maria, ma ona uso o Iakopo, Iosefa, Simona, ma Iuta? 56  Pe e tatou te lē o faatasi ea foʻi ma ona tuafāfine uma?+ O fea la na maua mai ai e lenei tagata nei mea?”+ 57  Ona amata lea ona latou tausuai ona o ia.+ A ua fetalai atu Iesu iā i latou: “E lē mamalu se perofeta i lona lava nuu ma lona lava aiga.”+ 58  E na te leʻi faia ni galuega mamana se tele i inā, ona o lo latou lē faatuatua.+

Faamatalaga Pito i Lalo

Po “ua māfiafia o latou loto.”
Po o “le faiga o mea a lenei lalolagi.”
O le “sinapi” e mai i le upu Eleni, o le si′na·pi. O se laau e taʻua i le faa-Peretania o le mustard.
Pe ā ma le 20 pauna.