Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Mataio 12:1-50

12  I lenā taimi, ua ui atu ai Iesu i le togāsaito i le sapati.+ Ua fia aai ona soo, ona latou tau mai ai lea o fuifui saito ma aai ai.+  Ina ua iloa e le ʻau Faresaio lenei mea, ona latou fai mai lea iā te ia:+ “Faauta! Ua faia e ou soo le mea e sā i le sapati.”+  Ua ia fetalai atu iā i latou: “E tou te leʻi faitau ea i le mea na faia e Tavita ma tagata na iā te ia ina ua fia aai?+  Pe na lē ulu atu ea o ia i le fale o le Atua, ma latou aai i falaoa e laulauina+ i luma o le Atua, o se mea e sā+ i le tulafono ona ʻai ai o ia, po o i latou o loo faatasi ma ia, ae ua na o ositaulaga?+  Pe e tou te leʻi faitau ea foʻi i le Tulafono,+ e leʻi faamamaluina e ositaulaga i le malumalu le sapati i aso sapati, ae e leʻi taʻusalaina ai lava i latou?+  Ae ou te fai atu iā te outou, o loo iai i inei se tasi e sili atu i lo le malumalu.+  Ae pe ana outou malamalama i le uiga o lenei faaupuga, ‘Ou te loto i le alofa mutimutivale+ ae lē o le taulaga,’+ po ua outou lē faasalaina tagata e lē sala.  Auā o le Alii o le sapati,+ o le Atalii lea o le tagata.”+  Ua tuua e ia lea mea, ona ulu atu ai lea i lo latou sunako; 10  faauta! ua iai se tamāloa ua pē lona lima.+ Ona latou fesili mai lea iā te ia, “Pe e taga i le tulafono ona faamālōlō i le sapati?” ina ia latou maua ai se mea e molia ai o ia.+ 11  Ona ia fetalai atu lea iā i latou: “Pe e iai se isi o outou e iai se mamoe e tasi, ma pe afai e paʻū lenā mamoe i le lua+ i le sapati, pe e lē alu atu ea o ia ma ave aʻe i luga?+ 12  E sili atu ai la ona tāua le tagata i lo o le mamoe!+ O lea, e taga i le tulafono ona fai le mea lelei i le sapati.” 13  Ona ia fetalai atu lea i le tamāloa: “Ia faaloaloa mai lou lima.” Ona ia faaloaloa atu lea o lona lima, ma ua toe lelei e pei o le isi lima.+ 14  Ae ua ō atu le ʻau Faresaio ma taupulepule ina ia fasiotia o ia.+ 15  Ina ua silafia e Iesu lenei mea, ona maliu ese loa lea o ia. E toʻatele foʻi ē ua mulimuli iā te ia ma ua ia faamālōlō iā i latou uma.+ 16  Ua ia matuā vavao atu foʻi iā i latou ia aua neʻi faailoa atu o ia i nisi,+ 17  ina ia taunuu ai le upu a le perofeta o Isaia e faapea: 18  “Faauta! O laʻu auauna+ o lē na ou filifilia, o laʻu pele,+ o lē ua fiafia i ai loʻu loto! Ou te tuuina atu loʻu agaga i luga iā te ia,+ o le a ia faailoa atu i nuu ese le faamasinotonu. 19  E lē finau+ o ia, e lē alaga leotele foʻi, e lē lagona e se tasi lona leo i ala tetele. 20  E na te lē nutimomomoina se ū ua vaivai, pe tineia se vavae ua mū itiiti,+ seʻia aumaia e ia le manumalo i mea tonu.+ 21  E moni, e faamoemoe nuu uma i lona suafa.”+ 22  Ona latou aumaia lea iā te ia o le tagata tauaso toe gūgū ua uluitinoina e le temoni; ua ia faamālōlō iā te ia, ona tautala ai lea ma vaai le tagata gūgū. 23  Ona taufaiofo ai lea o le motu o tagata ma latou faapea ane:+ “Pe lē o le Atalii ea lenei o Tavita?”+ 24  Ina ua faalogo le ʻau Faresaio i lenei mea, ona faapea ane lea: “O Pelesepulo le pule o temoni ua mafai ai ona tutuli e lenei tagata o temoni.”+ 25  Ua ia silafia o latou manatu,+ ona fetalai atu lea iā i latou: “E faaumatia malo uma e fevaevaeaʻi,+ ma e lē tumau foʻi aai uma po o aiga e fevaevaeaʻi. 26  E faapea foʻi Satani, afai e tulia e ia o ia lava, ua fevaevaeaʻi o ia, e faapefea la ona tumau o lona malo? 27  O lea la, afai o Pelesepulo+ ua ou tulia ai temoni, o ai la ua tulia ai e o outou atalii* temoni? O le mea lea e fai ai i latou ma faamasino iā te outou. 28  Pe afai ou te tulia temoni ona o le agaga o le Atua, ua oo mai lava iā te outou le malo o le Atua.+ 29  E faapefea ona osofaʻia le fale o se tagata malosi ma ave ana meatotino, ae e leʻi fusifusia muamua o ia? Ona faatoʻā mafai ai lea ona ave o ana mea uma mai i lona fale.+ 30  O sē e lē ʻau ma aʻu, e tetee mai iā te aʻu. O sē e lē faapotopoto faatasi ma aʻu, e faataapeape o ia.+ 31  “O lenei ou te fai atu iā te outou, o agasala eseese uma ma upuleaga ua faia e tagata, e faamagaloina ia, a o lē e upuleaga i le agaga, e lē faamagaloina lava.+ 32  O se faaaʻoaʻoga, o so o se tagata e tautala taufaaleaga i le Atalii o le tagata, e faamagaloina lava o ia,+ a o sē e tautala taufaaleaga i le agaga paia, e lē faamagaloina o ia i le taimi* nei atoa ma le lumanaʻi.+ 33  “O loo outou faia le laau ia lelei ma ona fua, pe faia foʻi le laau ia pala ma ona fua, auā e iloa le laau i ona fua.+ 34  O outou o fanau a gata feʻai,+ e faapefea ona outou tautatala i mea lelei a o outou o tagata leaga?+ Auā o le tele o mea i le loto e tautala mai ai le gutu.+ 35  Ua aumaia e le tagata lelei mea lelei mai i lana oloa lelei,+ a ua aumaia e le tagata leaga mea leaga mai i lana oloa leaga.+ 36  Ou te fai atu iā te outou, o upu lē aogā uma e tautatala ai tagata, e latou te tali atu+ ai i le Aso Faamasino. 37  Auā o au upu e taʻuamiotonuina ai oe, o au upu foʻi e taʻusalaina ai oe.”+ 38  Ona tali mai lea o nisi o le ʻautusiupu ma le ʻau Faresaio iā te ia: “Le Aʻoaʻo e, e matou te fia vāai i se faailoga mai iā te oe.”+ 39  Ona tali atu lea o ia iā i latou: “Ua saʻili mai pea le tupulaga leaga ma le mulilulua*+ mo se faailoga, ae e leai se faailoga e avatua iā i latou, e na o le faailoga o Iona le perofeta.+ 40  Auā e pei ona iai Iona+ i le manava o le iʻa telē i ao e tolu ma pō e tolu, e faapena foʻi ona iai o le Atalii o le tagata+ i lalo i le eleele+ i ao e tolu ma pō e tolu.+ 41  Auā e tutū mai tagata o Nineva faatasi ma lenei tupulaga+ i le faamasinoga, ma e taʻusalaina+ ai lenei tupulaga; auā na latou salamō i le talaʻiga a Iona,+ faauta foʻi! o loo i inei se tasi e sili atu iā Iona. 42  E faatūina le tupu tamaʻitaʻi o le itu i saute+ faatasi ma lenei tupulaga i le faamasinoga, ma e taʻusalaina ai i latou; auā na sau o ia mai tuluʻiga o le lalolagi e faalogo i le atamai o Solomona, ae o loo i inei se tasi e sili atu iā Solomona.+ 43  “Pe a alu i fafo se agaga leaga mai i se tagata, e alu atu o ia i nuu naumati e saʻili se mea e mālōlō ai, ae e lē maua se mea.+ 44  Ona faapea ifo lea o ia, ‘Ou te toe alu atu i loʻu fale na ou iai’; ma ina ua taunuu atu, ua ia iloa ai ua gaogao ma ua uma ona salu mamā ma teuteu. 45  Ona alu ai lea o ia ma aumai isi agaga leaga eseese e toʻafitu e sili atu ona leaga nai lo o ia.+ Ina ua ulu atu i totonu, ona latou nonofo ai lea, ma ua sili atu ona leaga le iʻuga o lea tagata nai lo o le amataga.+ E faapena foʻi lenei tupulaga leaga.”+ 46  A o tautala atu o ia i le motu o tagata, faauta! ua tutū mai i fafo lona tinā ma ona uso+ e fia talanoa iā te ia. 47  Ona fai mai lea o se tasi iā te ia: “Faauta! O loo tutū mai i fafo lou tinā ma ou uso, e fia talanoa iā te oe.” 48  Ona tali atu lea o ia i lē na fai mai iā te ia: “O ai ea loʻu tinā, ma o ai foʻi oʻu uso?”+ 49  Ua faaloaloa atu lona aao i ona soo ma faapea atu: “Faauta! O loʻu tinā ma oʻu uso ia!+ 50  Auā o lē e faia le finagalo o loʻu Tamā o i le lagi, o ia lenā o loʻu uso, o loʻu tuafafine, ma o loʻu tinā.”

Faamatalaga Pito i Lalo

O lona uiga o soo o le ʻau Faresaio.
Po o “faiga o mea a lenei lalolagi.”
Po o le tupulaga “e lē faamaoni i le Atua.”