Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Mareko 7:1-37

7  Ona faapotopoto mai lea iā te ia o le ʻau Faresaio ma nisi o le ʻautusiupu na ō mai mai i Ierusalema.+  Ua latou vāai i nisi o ona soo ua aai ma lima eleelea, o lona uiga e leʻi fafanoina+  auā ua taofimau le ʻau Faresaio ma tagata Iutaia uma i tū masani a tagata anamua, e lē mafai ona aai seʻiloga ua fafano o latou lima e oo i o latou tulilima.  Pe a foʻi mai i le maketi, e latou te lē aai seʻiloga ua faamamāina i latou e ala i le fulufulu* i le vai. E tele foʻi nisi tū masani+ ua latou taofimau i ai, e pei o le faatofuina o ipu ti, sioki, ma ipu ʻapamemea i le vai.+  Ona fesili mai ai lea o le ʻau Faresaio ma le ʻautusiupu iā te ia: “Aiseā ua lē faia ai e ou soo e tusa ma tū masani a tagata anamua, a ua aai ma lima eleelea?”+  Ua ia faapea atu iā i latou: “O outou o tagata faafiaamiotonu, ua moni ai le valoaga a Isaia e pei ona tusia+ e faapea, ‘Ua āva mai nei tagata iā te aʻu i o latou laugutu, a ua mamao ese lava o latou loto mai iā te aʻu.+  E lē aogā la latou tapuaʻiga o loo fai mai iā te aʻu, auā ua faavae a latou aʻoaʻoga i mataupu a tagata.’+  Ua outou lafoaʻia poloaʻiga a le Atua, a ua outou taofimau i tū masani a tagata.”+  Ua ia fetalai atili atu iā i latou: “Ua outou popoto i le tuuesea o poloaʻiga+ a le Atua, ina ia tausisi ai i a outou tū masani. 10  Auā ua faapea mai Mose, ‘Ia e āva i lou tamā ma lou tinā,’+ ma ‘O lē e fai upuleaga i lona tamā ma lona tinā, e fasiotia lava o ia.’+ 11  A ua outou fai mai, ‘O so o se tasi e faapea atu i lona tamā po o lona tinā: “O mea uma ua iā te aʻu e aogā iā te oe, o le kopano+ lea (o lona uiga o le meaalofa e ave+ i le Atua.)” ’— 12  Ona outou taofia ai lea o ia mai le faia o se mea e tasi mo lona tamā po o lona tinā.+ 13  O lea, ua outou faalēaogā ai le afioga a le Atua+ i a outou tū masani ia na tuufaasolo mai. Ua outou faia foʻi le tele o isi mea+ faapena.” 14  Ona ia toe valaau atu lea i le motu o tagata ma fetalai atu: “Inā faalogo mai ia outou uma, ma ia malamalama i lona uiga.+ 15  E leai se mea o loo i fafo o le tagata e alu ane i totonu iā te ia e mafai ona faaleagaina ai o ia; a o mea e sau mai i totonu o le tagata, o mea na e faaleagaina ai o ia.”+ 16  * —— 17  Ua tuua e ia le motu o tagata ae ulufale atu i se fale, ona fesili mai lea o ona soo iā te ia e uiga i le talafaatusa.+ 18  A ua ia fetalai atu iā i latou: “Po ua outou lē atamamai foʻi e pei o i latou?+ Pe e tou te lē iloa ea, e leai se mea mai i fafo e alu atu i totonu o le tagata e mafai ona faaleagaina ai o ia, 19  talu ai e lē alu atu i lona loto, ae e ui atu i le manava ma toe alu atu i fafo o le tino?”+ O lea, ua ia taʻua ai meaʻai uma e mamā.+ 20  Ua ia toe fetalai atu: “O le mea e sau mai i totonu o le tagata, o le mea lea e faaleagaina ai le tagata;+ 21  auā e sau mai i le loto o le tagata+ mafaufauga leaga: o le faitaaga,*+ o le gaoi, o le fasioti tagata,+ 22  o le mulilua, o le manaʻo tele,+ o le amioleaga, o le faaʻoleʻole, o le amio matagā,+ o le matauʻa, o le upuleaga, o le faamaualuga ma le lē mafaufau. 23  O nei mea leaga uma e sau mai i le loto ma e faaleagaina ai le tagata.”+ 24  Ua maliu ese o ia mai lea mea, ae agaʻi atu i laufanua o Turo ma Saitonu.+ Ona ulufale atu lea o ia i se fale ae e leʻi manaʻo e iloa mai o ia e se tasi. Peitaʻi, e leʻi lilo o ia i le vaaiga a tagata.+ 25  Ae ina ua faalogo se fafine o lē o loo maʻi lana tama teine i se agaga leaga e uiga iā te ia, ona sau loa lea o ia ma faapaʻū faō i ona vae.+ 26  O le Eleni le fafine, ae e nofo i Suria Foinie. Ua ʻaiʻoi mai pea o ia iā te ia ina ia tuliese le temoni mai lana tama teine.+ 27  Ua ia fetalai atu iā te ia: “Seʻi maoona muamua le fanau, auā e lē tatau ona lafo falaoa a tamaiti+ i tamaʻi taʻifau.”+ 28  Peitaʻi, ua tali mai le fafine iā te ia: “E saʻo lava oe lau susuga e, a o le mea moni, e ʻai e tamaʻi taʻifau o loo i lalo o le laulau fasi falaoa+ a le fanau iti.”+ 29  O lea, ua ia fetalai atu ai iā te ia: “Ona o le upu ua e fai mai ai, inā alu ia, ua alu ese le temoni mai i lau tama teine.”+ 30  Ona alu ai lea o ia i lona aiga, ma iloa+ ai le teineitiiti o loo taoto mai i le moega, ua alu ese le temoni. 31  Ua toe foʻi mai o ia mai i itumalo o Turo, ma ua ui atu i Saitonu e oo i le sami* o Kalilaia, ma agaʻi atu ai i le ogatotonu o laufanua o Tekapoli.+ 32  Ona latou aumai lea iā te ia o se tamāloa tutuli ma e tau lē mafai ona tautala, ua latou augani mai ina ia faaee lona aao iā te ia.+ 33  Ona ia aveese lea o le tamāloa mai le motu o tagata ua na o i laʻua, ua tuu atu ona tamatamaʻilima i taliga o le tamāloa, ua feanu, ona ia paʻi atu lea i lona laulaufaiva.+ 34  Ua ia tepa aʻe i le lagi,+ ua mapuea+ ma fetalai atu iā te ia: “Efata,” o lona uiga, “Ia matala.” 35  Ona matala loa lea o ona taliga,+ ma ua matala foʻi lona laulaufaiva, ona tautala ai loa lea o ia e pei o isi. 36  Ua ia vavao iā i latou e aua neʻi taʻuina atu i se tasi.+ E ui ina matuā vavao atu o ia iā i latou, ae ua atili ai ona latou faailoa atu.+ 37  Ua matuā maofa+ i latou ma faapea atu: “Ua lelei mea uma ua ia faia. Ona o ia, ua mafai ai ona faalogo ē na tutuli, ma tautatala ē e leʻi mafai ona tautatala.”+

Faamatalaga Pito i Lalo

I le gagana Eleni, o le “faatulutulu i vai.”
O lenei fuaiupu o loo maua i nisi faaliliuga o le Tusi Paia, peitaʻi e lē o maua i isi manusikulipi Eleni anamua.
Tagaʻi i le Faaopoopoga e 8.
O lenei sami, o se vaituloto telē. O nisi taimi e taʻua o le vai o Kalilaia.