Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Mareko 4:1-41

4  Ua toe amata ona ia aʻoaʻo atu i tafatafa ane o le sami.+ Ua potopoto mai foʻi le motu o tagata e toʻatele lava iā te ia. Ona maliu atu lea o ia i le vaa i luga o le sami ma nofo ai i lalo, a ua iai tagata uma i le matafaga.+  Ua amata ona ia aʻoaʻo atu i latou i le tele o mea e ala i talafaatusa+ ma faapea atu:+  “Ia faafofoga mai. Faauta! O le tagata lūlū fatu, na alu atu e lūlū fatu.+  A o ia lūlū, na paʻuʻū ai nisi fatu i tafatafa o le auala, ona ō mai ai lea o manufelelei ma ʻai.+  Ae na paʻuʻū nisi fatu i le mea papa e itiiti le eleele, ona vave tutupu ai lea auā e lē lava le eleele.+  Ina ua oso aʻe le lā, ua velasia ma mamate ai ona e leʻi mauaa.+  Ae na paʻuʻū foʻi isi fatu i le vao tuitui, ma ina ua tutupu aʻe le vao tuitui, ona fetinaʻiina ai lea ma lē fua mai ai.+  Ae na paʻuʻū isi i le eleele lelei,+ ma ina ua tutupu aʻe ma faateleina, ona fua mai ai lea e taʻitolu sefulu le tasi, e taʻiono sefulu le isi, ae taʻiselau le isi.”+  Ona ia toe fetalai atu lea: “O lē ua iai taliga, inā faalogo mai ia o ia.”+ 10  Ae ina ua na o ia, ona fesili ane lea o ē ua faatasi ma ia ma le toʻasefulu lua e uiga i talafaatusa.+ 11  Ua tali atu o ia iā i latou: “Ua tuuina atu iā te outou mea lilo paia+ o le malo o le Atua, a o ē o i fafo e faailoa atu mea uma iā i latou i talafaatusa,+ 12  ina ia vaavaai ae e lē iloa mea o loo latou vāai i ai, e faalogo foʻi ae e lē malamalama i mea o loo latou faalogo i ai, pe liliu mai foʻi ma faamagaloina ai i latou.”+ 13  Ua fetalai atili atu o ia iā i latou: “Afai tou te lē malamalama i lenei talafaatusa, e faapefea la ona outou malamalama i isi foʻi talafaatusa uma? 14  “O lē e lūlū fatu ua ia lūlūina le upu.+ 15  O fatu, o i latou ia ua i tafatafa o le auala i le mea ua lūlū ai le upu, ae ina ua faalogo i ai, ona sau ai lea o Satani+ ma aveese le upu na lūlūina iā i latou.+ 16  E faapena foʻi fatu ua lūlūina i le mea papa, o i latou ia ina ua faalogo i le upu, ona latou talia loa lea ma le olioli.+ 17  Peitaʻi e leʻi mauaa le upu iā i latou, ae ua faaauau mo na o sina taimi ma ina ua oo mai puapuaga ma sauāga ona o le upu, ona tautevateva ai lea o i latou.+ 18  A o isi na lūlūina i le vao tuitui, o i latou ia ua faalogo i le upu,+ 19  ae ona o le popole+ i lenei faiga o mea a le lalolagi ma le malosi taufaasesē o le ʻoa,+ ma le tuʻinanau+ atu i isi mea, ua oo atu i totonu o le loto ma fetinaʻiina ai le upu ma lē fua mai ai.+ 20  Mulimuli ane, o ē na lūlū i le eleele lelei, o i latou ia ua faalogo i le upu ma talia ma le fiafia, ma fua mai ai e taʻitolu sefulu le tasi, e taʻiono sefulu le isi, ma e taʻiselau le isi.”+ 21  Ua ia fetalai atili atu iā i latou: “Pe e aumai ea le molī ma tuu i lalo i se ato e fua ai mea, po o lalo o se moega? Pe e lē aumai ea ma tuu i luga o se tuugāmolī?+ 22  Auā e leai se mea lilo e lē faailoaina, e leai foʻi se mea e matuā natia e lē faaalia i luma o tagata.+ 23  O lē ua iai taliga e faalogo ai, inā faalogo mai ia o ia.”+ 24  Ua ia toe fetalai atu iā i latou: “Ia outou utagia mea ua outou faalogo i ai.+ O mea tou te fuaina atu, e toe fuaina mai ai iā te outou,+ ma e faaopoopoina ai isi mea iā te outou.+ 25  O sē ua iai mea, e foaʻiina atu i ai nisi mea, a o sē ua leai se mea, e aveeseina mea ua iā te ia.”+ 26  Ua ia toe fetalai atu: “Ua pei le malo o le Atua o le tagata na alu ma lūlū fatu i luga o le palapala,+ 27  na moe o ia i le pō ma ina ua ala aʻe i le ao, ua tātupu ma ola le fatu ae e na te leʻi iloa pe na faapefea ona tupu.+ 28  Ua tupu fua le fatu mai i le palapala ma faasolo mālie ona fua mai, ona matala lea o ona lau ma ua fuga mai, ma mulimuli ane ua iai saito matua. 29  Ae ina ua matua le fua, ona tuu atu ai lea o lana selesaito, auā ua oo mai le taimi o le seleselega.” 30  Ua ia toe fetalai atu: “O le ā se mea ua tatou faatusaina i ai le malo o le Atua, po o le ā se talafaatusa e tatou te faamatalaina ai?+ 31  E pei o le fatu o le sinapi, i le taimi na lūlūina ai i le palapala, o se fatu e sili ona laʻitiiti i lo o fatu uma i le laueleele+ 32  ae ina ua lūlūina, ua tupu aʻe e sili atu i lo o isi fualaau faisua, ma ua tutupu foʻi ona lālā tetele,+ ua ofaga i ai manufelelei o le lagi+ i lona paolo.”+ 33  Ua ia fetalai atu le upu iā i latou i le tele o talafaatusa+ faapena, e faatatau i mea e mafai ona latou lagona. 34  O le mea moni, ua fetalai atu o ia iā i latou i taimi uma i talafaatusa, ae ua ia faamatala atu mea uma i ona soo ina ua na o i latou.+ 35  Ua oo i le afiafipō o lenā lava aso, ona ia fetalai atu lea iā i latou: “Seʻi o tatou ō atu i le isi itu.”+ 36  Ua uma ona faataape le motu o tagata, ona latou ō faatasi lea ma ia i le vaa, ma e iai foʻi isi vaa ua latou ō faatasi.+ 37  Ona agi malosi mai lea o le matagi ma ua fafati mai pea galu i le vaa, ma toetoe lava a goto ai.+ 38  Peitaʻi, o loo tofā o ia i se aluga i le taumuli o le vaa. Ona latou fafagu lea iā te ia ma faapea mai: “Le Aʻoaʻo e, e te lē manatu mai ea auā o le a matou feoti?”+ 39  Ona nofo lea o ia i luga, ma vavao i le matagi ma fetalai atu i le sami: “Ia fifilemu, ma ia malū!”+ Ona toʻa ai lea o le matagi ma ua malū lava ai.+ 40  Ona ia fetalai atu lea iā i latou: “Aiseā ua outou fefefe ai? Pe e tou te lē faatuatua ea?” 41  Ona latou matuā matataʻu ai lea ma fai ane le tasi i le isi: “O ai ea lenei tagata ua usiusitaʻi i ai le matagi ma le sami iā te ia?”+

Faamatalaga Pito i Lalo