Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Mareko 14:1-72

14  Ua toe lua aso oo i le paseka+ ma le tausamiga+ o falaoa e lē faafefeteina.+ A ua saʻili le ʻaufaitaulaga sili ma le ʻautusiupu i se togafiti, e puʻe ai o ia ma fasiotia;+  a ua latou faapea atu pea: “Aua le faia i le tausamiga ina neʻi vevesi tagata.”+  A o iai o ia i Petania i le fale o Simona le lepela,+ o loo taoto o ia e taumafa, ona sau ai lea o se fafine ma se fagu alapasa ua iai le suāuu manogi o le nato māoʻi, e sili ona taugatā. Ua ia tataʻe le fagu suāuu ma liligi i lona ao.+  Ona o lenei mea, ua lē fiafia ai nisi o i latou ma faapea atu le tasi i le isi: “Aiseā ua maʻimau ai lenei suāuu manogi?+  Auā e mafai ona faatau atu lenei suāuu manogi, pe tusa ma le tolu selau tenari, ma avatu i ē matitiva!” Ona latou matuā feita ai lea i le fafine.+  A ua faapea atu Iesu: “Tuu ai pea o ia. Aiseā e tou te faalavelave ai i le fafine? Auā o se gaoioiga lelei lea ua ia faia iā te aʻu.+  Auā tou te faatasi pea ma tagata matitiva,+ ma o so o se taimi e tou te mananaʻo ai e faia se mea lelei mo i latou, e mafai lava ona outou faia, ae e tou te lē faatasi pea ma aʻu.+  Ua ia faia le mea na te mafaia, ua ia uu loʻu tino i le suāuu manogi, e fai ma faataʻimuaga o loʻu tanuga.+  E moni ou te fai atu iā te outou, Po o fea lava i le lalolagi+ e talaʻiina atu i ai lenei tala lelei, e taʻua ai foʻi ma le mea na faia e lenei fafine e faamanatu ai iā te ia.”+ 10  Ona alu atu ai lea o Iuta le Sekara, o se tasi o le toʻasefulu lua i le ʻaufaitaulaga sili, ina ia faalataina o ia iā i latou.+ 11  Ina ua latou faalogo atu i lea upu, ona latou olioli ai lea ma folafola atu e avatu iā te ia tupe siliva.+ Ona ia saʻili lea o se taimi talafeagai e faalataina ai o ia.+ 12  I le aso muamua o le tausamiga o falaoa e lē faafefeteina,+ lea e masani ona latou fasi* ai se manu mo le paseka, ua faapea mai ona soo+ iā te ia: “O fea e te finagalo matou te saunia e te taumafa ai le paseka?”+ 13  Ona ia aauina atu ai lea o ona soo e toʻalua ma fetalai atu iā i laʻua: “Ia oulua ō atu i le aai, o le a faafetaiaʻi oulua e se tamāloa o loo ave se faguvai.+ Ia mulimuli atu iā te ia, 14  o le fale foʻi e ulu atu i ai o ia, ia fai atu i le matai o le aiga, ‘Ua faapea mai le Aʻoaʻo: “O fea le potu e tali ai mālō ua saunia mo aʻu ou te ʻai ai le paseka+ ma oʻu soo?” ’+ 15  Ona ia faasino atu lea iā te oulua le potu tele i luga, ua uma ona teu lelei; ma ia oulua saunia mea uma i inā mo i tatou.”+ 16  Ua ō atu nei soo, ma ua la taunuu i le aai ma maua mea uma e pei ona ia fetalai atu ai iā i laʻua; ma ua la saunia ai mea mo le paseka.+ 17  Ua oo i le afiafipō, ona ō atu ai lea o ia ma le toʻasefulu lua.+ 18  A o taooto i latou ma aai, ua fetalai atu Iesu: “E moni ou te fai atu iā te outou, E iai se tasi o outou o loo ʻai+ faatasi ma aʻu, e na te faalataina aʻu.”+ 19  Ua latou faanoanoa i lenei mea, ona taʻitasi lea ma fesili mai iā te ia: “O aʻu ea?”+ 20  Ua ia faapea atu iā i latou: “O se tasi o le toʻasefulu lua o lē e fufui faatasi o ma lima i le ipu.+ 21  E moni, e pei ona tusia e faatatau iā te ia, e alu lava le Atalii o le tagata, a o lē na te faalataina le Atalii o le tagata, oi talofa iā te ia! Sa sili ai pe ana lē fanau mai o ia.”+ 22  A o latou aai, ua tago o ia i le areto, ua faia le faafetai, ona vaevae lea ma avatu iā i latou, ma faapea atu: “Ia outou aai. Auā o le faatusa lenei o loʻu tino.”+ 23  Ua ia tago foʻi i le ipu, ua fai le faafetai, ona avatu lea iā i latou, ma ua latou feinu ai.+ 24  Ua ia fetalai atu iā i latou: “O le faatusa lenei o loʻu ‘toto+ o le feagaiga,’+ o le a faamaligiina+ mo tagata e toʻatele.+ 25  E moni ou te fai atu iā te outou, Ou te lē toe inu i lenei uaina, seʻia oo i le aso ou te inu faatasi ai ma outou i le uaina fou i le malo o le Atua.”+ 26  Mulimuli ane, ina ua uma ona usu o viiga,+ ona latou ō atu ai lea i le Mauga o Olive.+ 27  Ua fetalai atu Iesu iā i latou: “O le a tuua* aʻu e outou uma auā ua tusia, ‘Ou te taia le leoleo mamoe,+ ona taapeape ai lea o mamoe.’+ 28  Peitaʻi, pe a mavae loʻu toetū, ona ou muamua atu lea iā te outou i Kalilaia.”+ 29  Ae ua tali mai Peteru iā te ia: “E tusa lava pe e tuua* oe e i latou uma, ae ou te lē tuua lava oe!”+ 30  Ona fetalai atu lea o Iesu iā te ia: “E moni, ou te fai atu iā te oe, I le asō, o le pō lava lenei a o leʻi vivini faalua le moa, ae ua faatolu ona e faafiti iā te aʻu.”+ 31  A ua matuā fai mai o ia: “E tusa lava po ou te oti faatasi ma oe, ou te lē faafitia lava oe.” Ua faapena foʻi ona fai mai i latou uma.+ 32  Ona latou ō atu lea i le nofoaga e taʻua o Ketesemane, ma ua ia fetalai atu i ona soo: “Ia outou nonofo atu i inei, ae seʻi oʻu alu ou te tatalo.”+ 33  Ua ave e ia o Peteru, Iakopo, ma Ioane,+ ua amata ona mafatia o ia ma ua matuā atuatuvale lava.+ 34  Ona ia fetalai atu lea iā i latou: “Ua ou matuā tigā+ lava e oo i le oti. Ia outou nonofo i inei ma ia faaauau ona mataala.”+ 35  Ua maliu teisi atu o ia i luma, ona faapaʻū lea o ia i le eleele ma tatalo, ina ia mavae ese atu lenei itula mai iā te ia pe afai e mafai.+ 36  Ona ia faapea atu lea: “Ava,* loʻu Tamā e,+ e te mafaia mea uma, ia aveese lenei ipu mai iā te aʻu. Peitaʻi, e lē o loʻu loto, a o lou finagalo.”+ 37  Ua sau o ia ma maua i latou ua momoe, ona ia fetalai atu lea iā Peteru: “Simona, ua e moe? Pe e lē mafai ea ona faaauau ona e mataala i se itula se tasi?+ 38  Ia faaauau ona outou mataala ma tatalo,+ ina neʻi outou lolo atu i faaosoosoga. Ua naunau i ai le loto,* a ua vaivai le tino.”+ 39  Ona toe maliu ese lea o ia ma tatalo atu i upu lava na.+ 40  Ua toe sau foʻi o ia ma maua i latou o momoe, auā ua vaivai, ma ua latou lē iloa se tali e fai mai iā te ia.+ 41  Ua foʻi faatolu mai o ia ma faapea atu iā i latou: “Aiseā ua outou momoe ai ma mālōlō i lenei taimi? Ua lava lea! Ua oo mai le itula!+ Faauta! O lea ua faalataina le Atalii o le tagata ma tuuina atu i tagata agasala.+ 42  Inā tutū ia i luga ma tatou ō.+ Faauta! Ua latalata mai o lē e na te faalataina aʻu.”+ 43  A o fetalai o ia, ae sau loa Iuta, o le tasi o le toʻasefulu lua, faatasi ma le motu o tagata mai i le ʻaufaitaulaga sili, ma le ʻautusiupu, ma le ʻautoeaina, ua iā i latou foʻi pelu ma pouvai.+ 44  Ua tuuina e lē na faalataina o ia le faailoga ua uma ona fuafuaina iā i latou e faapea: “O lē ou te sogi i ai, o ia lenā; ia outou puʻe iā te ia ma taʻitaʻi ese atu e leoleo.”+ 45  Ona savali saʻo mai lea o ia iā Iesu ma faapea mai: “Le Aʻoaʻo e!” ma sogi+ lemū mai iā te ia. 46  Ona latou fetagofi atu lea ma puʻe iā te ia.+ 47  Ae peitaʻi, o se tasi o ē o loo tutū latalata ane, ua seʻi e ia lana pelu, ma tā ai le pologa a le ositaulaga sili ma tipiesea ai lona taliga.+ 48  Ona fetalai atu lea o Iesu iā i latou: “Po ua outou ō mai ea ma pelu ma pouvai e puʻe iā te aʻu, e pei o se tagata faomea?+ 49  O aso taʻitasi na ou faatasi ai ma outou i le malumalu ma aʻoaʻo atu,+ ae tou te leʻi puʻeina ai aʻu. Ae ua oo nei mea uma ina ia taunuu+ ai mea ua tusia i Tusitusiga Paia.”+ 50  Ona tuua+ lea o ia e i latou uma ae sosola.+ 51  Ae e iai se tauleʻaleʻa o loo pulupulu lona tino i se ʻie lino lelei, ua mulimuli latalata atu iā te ia, a ua latou taumafai e puʻe o ia,+ 52  ae ua tiaʻi e ia lona ofu lino, ona sola lē lavalavā* ai lea o ia. 53  Ua latou taʻitaʻiina atu Iesu i le ositaulaga sili, ua potopoto uma atu foʻi le ʻaufaitaulaga sili, o le ʻautoeaina ma le ʻautusiupu.+ 54  A ua mulimuli mamao mai Peteru iā te ia,+ ua oo i le lotoā o le ositaulaga sili; ua nofo o ia faatasi ma auauna o le fale e faamāfanafana ai i luma o le afi. 55  O le taimi foʻi lea ua saʻilia ai e le ʻaufaitaulaga sili ma alii uma o le Faamasinoga Sili, ni molimau iā Iesu ina ia faasalaina ai o ia i le oti,+ ae e leʻi maua lava.+ 56  O le mea moni, e toʻatele ua fai atu ni molimau pepelo e uiga iā te ia,+ ae e leʻi tutusa a latou molimau.+ 57  Ua ō mai foʻi nisi ma ua fai atu ni molimau pepelo iā te ia e faapea: 58  “Na matou faalogo na faapea mai o ia, ‘Ou te talaina i lalo lenei malumalu na faia e lima, ma ou te toe fausia i aso e tolu se isi malumalu e lē faia e lima.’ ”+ 59  Ae e leʻi tutusa lava a latou molimau i nei mea. 60  Mulimuli ane, ona tulaʻi lea o le ositaulaga sili ma fesili mai iā Iesu: “Aiseā ua e lē tali mai ai? O le ā lenei mea ua latou molia ai oe?”+ 61  A ua filemu pea o ia ma ua lē tali atu lava.+ Ona toe fesili mai lea o le ositaulaga sili iā te ia: “Po o oe ea o le Keriso, le Alo o Lē e Viia?”+ 62  Ona fetalai atu lea o Iesu: “O lea lava; ma o le a outou vāai i le Atalii o le tagata+ o loo nofo i le itu taumatau+ o Lē e Malosi, ma e sau foʻi o ia i ao o le lagi.”+ 63  Ona saeia lea e le ositaulaga sili lona ofu+ ma faapea mai: “O le ā le aogā o nisi molimau iā i tatou?”+ 64  O lenā ua outou faafofoga i le upuleaga i le Atua.+ O le ā sa outou faaiʻuga?” Ua manatu i latou uma, ua tatau ona oti o ia. 65  Ona tuufeanu+ lea o nisi iā te ia ma ufiufi i ona fofoga ma tatuʻi iā te ia ma faapea mai: “Ia e vavalo mai!” Ua tapō foʻi i ona fofoga, ona ave lea o ia e auauna o le faamasinoga.+ 66  O le taimi lea o loo iai Peteru i lalo i le lotoā, ona sau ai lea o se auauna teine a le ositaulaga sili,+ 67  ma ua iloa atu Peteru o faamāfanafana i le afi, ona ia tilotilo saʻo atu lea iā te ia ma faapea atu: “O oe foʻi lenā, sa oulua faatasi ma Iesu le Nasareta.”+ 68  A ua faafiti o ia ma faapea mai: “Ou te lē iloa o ia, ma ou te lē iloa foʻi le mea o e fai mai ai.” Ona alu lea o ia i fafo i le faapaologa o le lotoā.+ 69  Ua toe vaaia foʻi e le auauna teine o ia i lea mea, ona toe faapea atu lea i ē ua tutū ai: “O se tasi lenei o i latou.”+ 70  Ua toe faafiti foʻi o ia. E leʻi umi ae toe faapea atu i latou o loo tutū ai i inā iā Peteru: “E moni, o oe o se tasi o i latou, auā o oe o le Kalilaia.”+ 71  Ona ia tautō lea ma fai atu ma le maumauaʻi:+ “Ou te lē iloa lava lenei tagata o loo outou fai mai ai.”+ 72  Ona vivini faalua loa lea o le moa;+ ma ua manatua ai loa e Peteru fetalaiga a Iesu iā te ia: “E te faafiti faatolu iā te aʻu a o leʻi vivini faalua le moa.”+ Ona tagi masūsū ai lea o ia.+

Faamatalaga Pito i Lalo

Po o le “faataulaga o se manu.”
I le gagana Eleni, “o le a tausuai outou uma.”
I le gagana Eleni, “e tusa lava pe tausuai i latou uma.”
O le upu Arama, o lona uiga “o le tamā,” po o le “Tamā e!” O le upu Eleni, Ab·ba′.
I le gagana Eleni, “ua naunau i ai le agaga.”
I le gagana Eleni, “na faasausau o ia.”