Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Mareko 11:1-33

11  A o latalata atu i latou i Ierusalema, i Petefake ma Petania+ i le Mauga o Olive, ona aauina atu lea e Iesu o ona soo e toʻalua+  ma faapea atu: “Ia ō atu i le nuu lea o loo oulua vāai atu i ai, pe a taunuu loa i ai, o le a oulua maua ai se tamaʻi asini o loo nonoa, e leʻi tiʻetiʻe ai se tagata, ia tatala ma aumai.+  Afai e fai mai se tasi iā te oulua, ‘Aiseā ua oulua faia ai lenei mea?’ ia fai atu i ai, ‘E manaʻo i ai le Alii, ona toe vave faafoʻi mai lea i inei.” ’+  Ona la ō atu lea ma ua maua le tamaʻi asini o loo nonoa i le faitotoʻa i fafo i se tasi o auala, ona la tatalaina mai lea.+  A ua fai mai nisi o ē ua tutū ai i inā iā i laʻua: “Aiseā ua oulua tatala ai le tamaʻi asini?”+  Ua la tali atu iā i latou e pei ona fetalai atu ai Iesu; ma ua latou tuu i laʻua e ō.+  Ona la aumaia lea o le tamaʻi asini+ iā Iesu, ua fofola o latou ofu tele i luga o le asini ona tiʻetiʻe ai lea o ia.+  Ua fofola foʻi e le toʻatele o latou ofu tele+ i luga o le ala, a o isi ua latou tā mai lālā o laau+ mai le vao.+  A ua alalaga pea i latou o ē ua muamua atu iā te ia ma ē o loo mulimuli mai e faapea: “Matou te tatalo, ia faaola iā te ia!+ E manuia lē e maliu mai i le suafa o Ieova!+ 10  E manuia le malo o loo fotuaʻi mai o lo matou tamā o Tavita!+ Matou te tatalo i lē o loo afio i mea maualuluga ia faaola iā te ia!” 11  Ua ulu atu o ia i le malumalu i Ierusalema, ua silasila solo i mea uma, ma ua leva le aso, ona maliu atu ai lea o ia ma le toʻasefulu lua i Petania.+ 12  Ona tuua ai lea e i latou o Petania i le aso ua sosoo ai, ma ua fia taumafa foʻi o ia.+ 13  Ua silafia mamao atu e ia le laau o le mati ua iai ona lau, ma ua maliu atu i ai ina ia vaai pe e iai ni ona fua. Ae e leʻi maua e ia se fua ua na o lau, auā e lē o le taimi lea o le fuata.+ 14  Ona ia fetalai atu lea i le mati: “Aua neʻi toe ʻaina e se tasi ni ou fua e oo i le faavavau.”+ A o loo faalogologo ane ona soo. 15  Ua taunuu i latou i Ierusalema. Ona ulufale atu lea o ia i le malumalu ma tutuli i fafo o ē uma o fai ai fefaatauaʻiga, ma fuli laulau a tagata suitupe, ma nofoa o le ʻaufaatau lupe.+ 16  Ua ia faasāina foʻi se tasi e ui atu i le malumalu ma se avega, 17  a ua aʻoaʻo atu pea ma faapea atu: “Pe e lē o tusia ea, ‘E taʻua loʻu fale o le fale tatalo+ mo nuu uma’?+ A ua outou faia ma ana o ē e faomea.”+ 18  Ua faalogo le ʻaufaitaulaga sili ma le ʻautusiupu i lenei mea. Ona latou taumafai ai lea e suʻe se auala e fasiotia ai o ia,+ auā ua matataʻu i latou iā te ia, ona ua taufaiofo pea le motu o tagata i lana aʻoaʻo atu.+ 19  Ua leva le aso, ona latou tuua ai lea o le aai. 20  Ua ui ane i latou i le taeaopō, ona latou iloa atu ai lea o le laau o le mati, ua mamae e oo lava i ona aa.+ 21  Ua manatua e Peteru ona faapea mai lea iā te ia: “Le Aʻoaʻo e, silasila foʻi, ua mamae le mati lea na e fetuuina.”+ 22  Ona tali atu lea o Iesu iā i latou: “Ia faatuatua i le Atua. 23  E moni ou te fai atu iā te outou, o se tasi e fai atu i lenei mauga, ‘Ia siitia oe ma lafo i le sami,’ ma e lē masalosalo lona loto, ae e faatuatua, o le a taunuu lava mea ua ia fai atu ai, e faapea lava ona taunuu!+ 24  O le mea lea ou te fai atu ai iā te outou, O mea uma lava tou te talosaga atu ai i le tatalo, ia outou faatuatua e pei lava ua outou mauaina, ma o le a outou mauaina lava.+ 25  Pe a outou tutū e tatalo, ia outou faamagalo+ atu se mea ua outou tigā ai i se tasi, ina ia faamagaloina foʻi a outou agasala e lo outou Tamā o i le lagi.”+ 26  * —— 27  Ua toe foʻi mai i latou i Ierusalema. A o savali atu o ia i le malumalu, ona ō mai ai lea o le ʻaufaitaulaga sili, ma le ʻautusiupu, ma le ʻautoeaina iā te ia+ 28  ma faapea mai: “O le pule a ai ua e faia ai lenei mea? po o ai ua na tuuina atu le pule iā te oe e faia ai nei mea?”+ 29  Ua faapea atu Iesu iā i latou: “E tasi lava le mea lea ou te fia fesili atu ai. Afai tou te taʻu maia le tali, ona ou taʻuina atu foʻi lea po o le pule a ai ua ou faia ai nei mea.+ 30  Pe e mai i le lagi ea pe e mai i tagata le papatisoga+ a Ioane? Ia tali mai iā te aʻu.”+ 31  A ua fetalanoaaʻi i latou ma faapea ane: “Afai tatou te fai atu, ‘E mai i le lagi,’ ona ia faapea mai lea, ‘Aiseā la ua outou lē talitonu ai iā te ia?’+ 32  Ae e lē mafai foʻi ona tatou faapea atu, ‘E mai i tagata.’ ”— Auā ua matataʻu i latou i le motu o tagata, ona o lo latou manatu, o Ioane o se perofeta.+ 33  O lea ua latou tali mai ai iā Iesu: “Matou te lē iloa.” Ona faapea atu lea o Iesu iā i latou: “Ou te lē taʻuina atu foʻi la iā te outou, po o le pule a ai ua ou faia ai nei mea.”+

Faamatalaga Pito i Lalo

O lenei fuaiupu o loo maua i nisi faaliliuga o le Tusi Paia, peitaʻi e lē o maua i isi manusikulipi Eleni anamua.