Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Luka 9:1-62

9  Ua faapotopoto e ia le toʻasefulu lua, ma tuu atu iā i latou le mana ma le pule i temoni uma lava, ma ia faamālōlō ai maʻi.+  Ua ia aauina atu i latou e talaʻi le malo o le Atua ma faamālōlō tagata.  Ua ia fetalai atu iā i latou: “Aua neʻi avea ni mea mo le malaga, aua neʻi aveina se tootoo, po o se taga meaʻai, po o ni falaoa, po o ni tupe siliva; aua foʻi neʻi taʻilua ofutino.+  O so o se mea e tou te ulu atu ai i se fale, ia nonofo ai seʻia oo ina outou ō ese mai i lea nuu.+  Afai e lē talia outou e tagata, pe a outou ō ese mai i lenā aai,+ ia tūtū atu i ai le pefu mai o outou vae, e fai ma molimau e taʻusalaina ai i latou.”+  Ona latou ō atu lea i le oganuu atoa, mai i lea nuu i lea nuu, ua folafola atu le tala lelei ma faia faamālōlōga i nuu uma.+  Ua faalogo Herota le pule o le itumalo i mea uma ua tutupu, ona matuā popole ai lea o ia, auā ua faapea mai nisi, ua toe faatūina Ioane mai i le oti,+  a ua faapea mai nisi, ua faaali mai Elia, a o isi ua faapea mai, ua toetū mai se tasi o le ʻauperofeta anamua.  Ua faapea atu Herota: “Na ou vavaeeseina le ulu o Ioane.+ O ai la lenei tagata ua ou faalogo i ai i nei mea?” Ona saʻili+ lea o ia e fia vaai iā te ia. 10  Ua toe foʻi mai aposetolo ma faamatala mai iā te ia mea na latou faia.+ Ona ave ai lea e ia o i latou ma ō atu na o i latou+ i le aai o Petesaita. 11  A ua iloa e le motu o tagata nei mea, ona latou mulimuli atu lea iā te ia. Ua ia talileleia i latou ma fetalai atu e faatatau i le malo o le Atua,+ ma ua ia faamālōlō i ē o mamaʻi.+ 12  Ua leva le afiafi, ona ō mai ai lea o le toʻasefulu lua ma faapea mai iā te ia: “Ia tuu atu le motu o tagata e ō i nuu ma aai e suʻe ni mea e api ai ma ni meaʻai, auā o le nofoaga tuufua lenei tatou te iai.”+ 13  A ua fetalai atu o ia iā i latou: “Ia outou avatu ni meaʻai ma i latou.”+ Ua latou fai mai: “E leai ni a matou mea, e na o falaoa e lima ma iʻa e lua,+ seʻiloga la e matou te ō atu e faatau mai ni meaʻai ma nei tagata uma.”+ 14  O le mea moni, e pe tusa ma le lima afe tane.+ A ua ia fetalai atu i ona soo: “Ia faapotopoto i latou i vaega e tusa ma le taʻilima sefulu e taooto mo le taumafataga.”+ 15  Ua latou faia faapea ma fai atu iā i latou uma e taooto i lalo. 16  Ona tago lea o ia i falaoa e lima ma iʻa e lua, ma tepa aʻe i le lagi, ua faafetai ona vaevae lea ma avatu i le ʻausoo, ona latou tufatufa atu lea i le motu o tagata.+ 17  Ona latou aai ai lea ma ua maoona, ua faaputu foʻi i mea ua totoe,+ ma ua tutumu ai ato e sefulu lua. 18  Mulimuli ane, a o tatalo na o ia, ona ō mai faatasi ai lea o ona soo iā te ia, ona ia fesili atu lea iā i latou: “O le ā se tala a le motu o tagata, o ai aʻu?”+ 19  Ua latou tali mai: “O Ioane le Papatiso, a o isi o Elia, a ua faapea mai isi, ua toetū mai se tasi o le ʻauperofeta anamua.”+ 20  Ua ia fetalai atu iā i latou: “A o outou, o le ā sa outou tala, o ai aʻu?” Ona tali mai lea o Peteru:+ “O oe o le Keriso+ a le Atua.” 21  Ona ia matuā fai atu lea iā i latou ma faatonuina i latou, e aua neʻi o latou taʻu atu lea mea i se tasi,+ 22  a ua ia faapea atu: “E tatau ona oo puapuaga e tele i le Atalii o le tagata, ma teena o ia e toeaina ma le ʻaufaitaulaga sili ma le ʻautusiupu. E fasiotia+ o ia ma toe faatūina i le aso lona tolu.”+ 23  Ua ia fetalai atu iā i latou uma: “A fia mulimuli mai se tasi iā te aʻu, ia faafitia e ia o ia lava+ ma amo le laau e faapuapuagatia* ai o ia i lea aso ma lea aso, ma mulimuli mai pea iā te aʻu.+ 24  Auā o sē e fia faasaoina lona ola, e maʻimau ia, ae o sē e faamaʻimau lona ola ona o aʻu, e faasaoina e ia.+ 25  Auā o le ā le aogā i le tagata pe afai na te maua le lalolagi uma, ae maʻimau ai lona ola, pe leiloloa ai ana mea uma?+ 26  Auā o lē e mā iā te aʻu ma aʻu upu, e mā foʻi le Atalii o le tagata iā te ia pe a sau o ia i lona mamalu, ma le mamalu o lona Tamā faatasi ma le ʻauagelu paia.+ 27  E moni ou te fai atu iā te outou, E iai nisi o loo tutū mai i inei e lē oo i ai le oti, seʻiloga ua latou vāai muamua i le malo o le Atua.”+ 28  Ua mavae aso e valu talu ona ia fetalai i nei upu, ona ia ave lea o Peteru, Ioane ma Iakopo, ma ō aʻe i le mauga e tatalo ai.+ 29  A o tatalo o ia, ua sui ona fofoga+ ma ua feʻilafi ma paʻepaʻemā ona ofu.+ 30  Faauta! E toʻalua ni tamāloloa o loo talanoa ma ia, o Mose ma Elia.+ 31  Ua faaali mai i laʻua nei i le mamalu ma ua talanoa e uiga i lona maliu ese atu mai i le lalolagi, lea e tatau ona faataunuuina i Ierusalema.+ 32  A ua moegase Peteru ma i latou ua faatasi ma ia; ina ua feala aʻe, ona latou vaaia ai lea o lona mamalu+ ma o loo tutū faatasi ma ni tamāloloa se toʻalua. 33  A o ō ese atu i laʻua mai iā te ia, ona faapea mai lea o Peteru iā Iesu: “Le Faiaʻoga e, ua lelei ona ua tatou faatasi i inei, o lea, seʻi o matou faatūina ni faleʻie se tolu, o le tasi mo oe, o le tasi mo Mose, ma le isi mo Elia,” ae na te lē iloa ana tala ua fai atu.+ 34  A o tautala mai o ia i nei mea, ona oo mai lea o se ao ma ufitia ai i latou. Ona fefefe ai lea o i latou a o iai i totonu o le ao.+ 35  Ona faapea mai ai lea o le siʻufofoga+ mai i le ao: “O loʻu Atalii lenā, o lē ua ou filifilia.+ Ia faalogo iā te ia.”+ 36  Ua na o Iesu ina ua fetalai mai le siʻufofoga.+ Ae ua latou taofi i nei mea i na aso, ma latou te leʻi taʻuina atu i se tasi mea na latou vāai i ai.+ 37  I le aso na sosoo ai, ona latou ō ifo ai lea mai i le mauga, ma ua faafetaui o ia e le motu o tagata.+ 38  Faauta! Ua alaga mai se tamāloa mai i le motu o tagata e faapea: “Le Aʻoaʻo e, ou te ʻaiʻoi atu seʻi e tagaʻi ane i loʻu atalii, auā o ia o loʻu atalii e toʻatasi.+ 39  Faauta! ua ave o ia e le agaga+ leaga, ma ua faafuaseʻi ona alaga mai, ua lili ma fauā lona gutu, ma e masani ona ia faamanuʻa iā te ia, ma toe ina a lē alu ese mai iā te ia. 40  Na ou ʻaiʻoi atu i ou soo ina ia tuliese o ia, ae latou te leʻi mafaia.”+ 41  Ona tali atu lea o Iesu: “Le tupulaga e lē faatuatua ma le faapiʻopiʻo,+ o le ā le umi ou te feagai ai ma outou ma faapalepale iā te outou? Ia aumai i inei lou atalii iā te aʻu.”+ 42  A o faalatalata mai o ia, a ua lafo e le temoni le tama i lalo ma matuā faataafiti o ia. Ae peitaʻi, ua vavao e Iesu le agaga leaga ma faamālōlō le tama, ma tuuina atu o ia i lona tamā.+ 43  Ona matuā maofa ai lea o i latou i le ofoofogia o le mana+ o le Atua. A o taufaiofo i latou i mea uma na ia faia, ona ia fetalai atu lea i ona soo: 44  “Ia outou faalogo mai i nei upu, auā o le a tuuina atu le Atalii o le tagata i lima o tagata.”+ 45  Ae peitaʻi, e leʻi malamalama i latou i lana fetalaiga. O le mea moni, ua natia mai iā i latou ina neʻi latou iloa, a ua fefefe e fesili mai iā te ia e uiga i lenei upu.+ 46  Ona latou fefinauaʻi lea po o ai o i latou e sili.+ 47  Ua silafia e Iesu manatunatuga o o latou loto, ona ia aumaia lea o se tamaitiiti ma faatū i ona tafatafa,+ 48  ma ua ia fetalai atu iā i latou: “O sē e na te taliaina lenei tamaitiiti ona o loʻu igoa, ua ia taliaina aʻu, ma o sē e na te taliaina aʻu, ua ia taliaina foʻi lē na auina mai aʻu.+ O lē e fai o ia lava ma tagata faatauvaa+ iā te outou uma, e sili lava o ia.”+ 49  Ua tali mai Ioane iā te ia: “Le Faiaʻoga e, na matou vāai i le tasi tagata ua ia tutuli temoni+ i lou suafa, ma na matou taumafai e taofia+ o ia, auā e lē o ʻau o ia faatasi ma i tatou.”+ 50  A ua fetalai atu Iesu iā te ia: “Aua tou te taofia o ia, auā o sē e lē tetee iā te outou, e ʻau ma outou.”+ 51  Ua latalata i le taimi e aveina aʻe ai o ia i le lagi,+ a ua naunau lava o ia e maliu atu i Ierusalema. 52  Ua ia aauina atu avefeʻau e muamua atu iā te ia. Ua latou ō ma ua taunuu i se nuu o Samaria,+ ina ia sauniunia ai mea mo ia; 53  ae e leʻi talia e i latou o ia, auā ua naunau lava o ia e malaga atu i Ierusalema.+ 54  Ina ua iloa e ona soo o Iakopo ma Ioane+ lenei mea, ona la faapea mai lea: “Le Alii e, e te finagalo ea ma te fai atu ina ia alu ifo le afi+ mai i le lagi e faaumatia ai i latou?” 55  A ua faliu atu o ia ma matuā aʻoaʻi atu iā i laʻua. 56  Ona latou ō atu ai lea i se isi nuu. 57  A o agaʻi atu i latou i le auala, ua faapea mai se tasi iā te ia: “Ou te mulimuli atu iā te oe i mea uma e te maliu atu i ai.”+ 58  Ona fetalai atu lea o Iesu iā te ia: “E fai lua o alope,* e iai foʻi mea e momoe ai manufelelei o le lagi, a o le Atalii o le tagata e leai se mea e moe ai o ia.”+ 59  Ona fetalai atu lea o ia i le isi: “Inā mulimuli mai iā te aʻu.” A ua fai mai le tamāloa: “Tuu mai aʻu seʻi oʻu alu muamua e tanu loʻu tamā.”+ 60  A ua fetalai atu o ia iā te ia: “Tuu ai pea ē ua oti+ e tanu lava e o latou tagata oti, ae ia e alu ma folafola atu le malo o le Atua.”+ 61  A ua fai mai le isi: “Le Alii e, ou te mulimuli atu iā te oe, ae tuu mai aʻu seʻi oʻu alu muamua e faatofā+ i loʻu aiga.” 62  Ua fetalai atu Iesu iā te ia: “O le tagata e tago i le suōtosina+ ma tepa i tua,+ e lē tatau o ia mo le malo o le Atua.”

Faamatalaga Pito i Lalo

Tagaʻi i le Faaopoopoga e 10.
O le “alope” o se ituaiga o taʻifau. O le upu Peretania o le fox.