Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Luka 7:1-50

7  Ina ua faauma e ia ana fetalaiga uma na faalogo i ai le nuu, ona maliu atu lea o ia i Kapanaumi.+  E iai se pologa a se taʻitaʻiʻau o lē ua pele iā te ia, ua maʻi ma ua toeitiiti lava oti.+  Ua faalogo o ia e faatatau iā Iesu, ona ia aauina mai lea o toeaina o Iutaia e talosaga mai iā te ia, e maliu atu ina ia faamālōlō lana pologa.  Ua ō mai i latou iā Iesu ma augani mai: “Ua ono ma tatau lou fesoasoani iā te ia,  auā ua alofa o ia i lo tatou nuu,+ ma na ia faia foʻi lo matou sunako.”  Ona maliu atu lea o Iesu faatasi ma i latou. A o latalata atu i le fale, ona aauina mai lea e le taʻitaʻiʻau o ni uō e taʻu mai iā te ia: “Lau susuga e, aua e te popole, auā e lē talafeagai ona e maliu mai i loʻu fale.+  O le mea lenā ua ou manatu ai e lē tatau ona ou alu atu iā te oe. Ae tau lava o sau fetalaiga, ona mālōlō ai lea o laʻu auauna.  Auā o aʻu foʻi o le tagata ua pule ai isi, ua ou pule foʻi i fitafita ma pe a ou fai atu i le tasi, ‘Inā alu ia!’ Ona alu ai lea, ma le isi, ‘Inā sau ia!’ ona sau ai lea o ia, ou te fai atu foʻi i laʻu pologa, ‘Ia faia le mea lenei!’ ona fai ai lea e ia.”+  Ua matuā ofo Iesu ina ua faafofoga i nei mea, ona faliu atu lea o ia i le motu o tagata o loo mulimuli mai iā te ia ma fetalai atu: “Ou te taʻu atu iā te outou, Ou te leʻi iloa lava i Isaraelu se tasi ua faapea ona malosi o lona faatuatua.”+ 10  Ua toe foʻi atu i le fale o ē na aauina mai, ma ua latou maua ai le pologa ua toe malosi.+ 11  Mulimuli ane, ona malaga atu loa lea o ia i se aai e taʻua o Naina, ua latou malaga faatasi foʻi ma ona soo ma le motu o tagata. 12  A o latalata atu o ia i le faitotoʻa o le aai, faauta foʻi, o loo fata mai se tagata ua oti,+ o le tama e toʻatasi+ a lona tinā. O ia foʻi o se fafine ua oti lana tane. O loo faatasi o ia ma tagata e toʻatele mai le aai. 13  Ua silasila atu le Alii iā te ia, ona tigā alofa+ ai lea o ia i le fafine ma fetalai atu: “Aua e te tagi.”+ 14  Ua faalatalata atu o ia ma paʻi atu i le fata, ona tutū lea o ē na amoina le fata, a ua ia fetalai atu: “Le tauleʻaleʻa e, ou te fai atu iā te oe, tū ia i luga!”+ 15  Ua tū i luga lē na oti ma amata ona tautala, ona ia avatu lea o ia i lona tinā.+ 16  Ua matataʻu+ i latou uma, ma ua latou faamamaluina le Atua e faapea: “Ua tulaʻi mai se perofeta+ sili iā i tatou,” ma ua “liuliualo mai le Atua i ona tagata.”+ 17  Ua aave solo nei tala e uiga iā te ia i Iutaia, atoa ai ma isi itumalo. 18  Ua taʻu atu e soo o Ioane nei mea uma iā te ia.+ 19  Ona valaau atu lea o Ioane i ona soo e toʻalua ma aauina atu i laʻua i le Alii, e faapea atu: “Po o oe ea o Lē e maliu mai, pe e matou te faatali i se isi tagata?”+ 20  Ua la ō mai iā te ia ma faapea mai: “Ua aauina mai i maʻua e Ioane le Papatiso, ina ia fesili mai iā te oe, ‘Po o oe ea o Lē e maliu mai, pe e matou te faatali i se isi?”’ 21  I lenā taimi, ua ia faamālōlō ai le tele o maʻi+ ma maʻi tigāina, ma ē na uluitino e agaga leaga, ma foaʻi atu i le toʻatele o tagata tauaso le faamanuiaga e vāai ai. 22  Ona tali atu lea o ia iā i laʻua: “Ia oulua ō+ ma faamatala atu iā Ioane mea ua oulua faalogo ma vāai i ai: ua pupula tauaso,+ ua savavali pipili, ua faamamāina lepela, ua faalogo ē tutuli, ma ua toe faatutūina mai tagata oti. Ua folafola+ atu foʻi le tala lelei+ i ē e matitiva. 23  E fiafia se tasi e lē tausuai ona o aʻu.”+ 24  A o ō ese atu avefeʻau a Ioane, ona fetalai atu lea o Iesu i le motu o tagata e faatatau iā Ioane: “O le ā se mea na outou ō atu i le toafa e matamata i ai? O se ū* ea ua felafoaʻiina e le matagi?+ 25  O le ā la se mea na outou ō atu e matamata i ai? O le tagata ea ua ofu i ofu ua faia i le ʻie lelei?*+ Auā foʻi o ē maumea, ua oofu i ofu mananaia ma nonofo i maota o tupu.+ 26  O le ā le mea na outou ō atu e vaavaai i ai? Po o se perofeta?+ Ioe, ou te fai atu iā te outou, e sili atu o ia nai lo o se perofeta.+ 27  O ia lenei ua tusia e faatatau i ai, ‘Faauta! Ou te auina atu laʻu avefeʻau i ou luma,+ o lē e muamua atu na te saunia le ala mo oe.’+ 28  Ou te fai atu iā te outou, E leai se tasi na fanau mai i fafine, e sili+ iā Ioane; a o lē e faatauvaa i le malo o le Atua, e sili o ia iā te ia.”+ 29  (Ina ua faalogo tagata uma ma le ʻauaolafoga i lenei mea, ona latou faapea atu lea, e amiotonu le Atua,+ ma ua uma foʻi ona papatisoina i latou i le papatisoga a Ioane.+ 30  A ua lē amanaʻia e le ʻau Faresaio ma aʻoaʻo o le Tulafono faatonuga+ a le Atua iā i latou, auā na te leʻi papatisoina i latou.) 31  “O ai la ou te faatusaina i ai tagata o lenei tupulaga, ma ua pei i latou o ai?+ 32  Ua pei i latou o tamaiti o loo nonofo i maketi ma tauvalaau atu le tasi i le isi, ma faapea atu, ‘Ua tā atu a matou pese,* ae e tou te lē sisiva mai; ua matou tagiauē atu, ae e tou te leʻi fetagisi.’+ 33  Ua faapea foʻi Ioane le Papatiso, ua sau o ia e leʻi ʻai i se falaoa, e leʻi inu foʻi i se uaina, ae ua outou fai mai, ‘Ua iā te ia se temoni.’+ 34  Ua sau le Atalii o le tagata ua ʻai ma inu, a ua outou fai mai, ‘Faauta! O le tagata ʻai tele ma le inu tele i le uaina, o le uō a le ʻauaolafoga ma ē e agasala!’+ 35  Ae peitaʻi, e taʻuamiotonuina le atamai+ i ana tama uma.”+ 36  O lea, ua talosaga atu se tasi o le ʻau Faresaio iā te ia, ina ia la faiʻaiga faatasi. Ona ulu atu lea o ia i le fale+ o le Faresaio, ma taoto e taumafa. 37  Faauta foʻi! O se fafine e lauiloa i le aai o sē e agasala, ua ia iloa atu Iesu o loo taoto i se taumafataga i le fale o le Faresaio, ona ia aumaia lea o se fagu alapasa+ ua iai le suāuu manogi. 38  Ua sau o ia i tua ma tootuli i ona vae, ua tagi ma ua maligi ona loimata, ma ua susū ai vae o Iesu. Ona ia soloi lea o ona vae i lona lauulu. Ua ia sogi lemū atu foʻi i ona vae ma uu i le suāuu manogi. 39  Ua iloa atu lenei mea e le Faresaio na valaaulia o ia, ona ia faapea ifo lea iā te ia: “Afai o se perofeta+ lenei tagata, semanū na te iloa le ituaiga o fafine lea o loo tago atu iā te ia, o ia o se fafine agasala.”+ 40  A ua tali atu Iesu iā te ia: “Simona, e iai se mea ou te fia fai atu ai iā te oe.” Ua ia faapea mai: “Le Aʻoaʻo e, saunoa mai ia!” 41  “E toʻalua ni tamāloloa na nofo aitalafu i se tagata na nonō atu tupe iā i laʻua, o le tasi na aitalafu i le lima selau tenari,+ a o le isi e lima sefulu tenari. 42  Ina ua leai ni a la mea e toe totogi atu ai, ona ia faamagalo+ lea ma le lotoatoa a la aitalafu. O lea, o ai o i laʻua e sili ona alofa iā te ia?” 43  Ua tali mai Simona: “Ou te manatu o lē na faamagaloina lana aitalafu telē.” Ua ia fetalai atu iā te ia: “Ua saʻo lau tali.” 44  Ona ia faliu atu lea i le fafine ma fetalai atu iā Simona: “Ua e vaai mai i le fafine lenei? Na ou ulufale mai i lou fale, e te leʻi aumaia ni vai+ e fufulu ai oʻu vae. A o le fafine lenei, ua ia faasusū oʻu vae i ona loimata ma soloi ai i lona lauulu. 45  E te leʻi sogi+ mai iā te aʻu; a o lenei fafine, e mai lava i le taimi na ou sau ai, na sogi lemū mai pea o ia i oʻu vae. 46  E te leʻi uuina loʻu ulu i se suāuu;+ a o lenei fafine, ua ia uuina oʻu vae i le suāuu manogi. 47  O le mea lea ou te fai atu ai iā te oe, ua faamagaloina ana agasala e ui ina tele,+ auā ua tele lona alofa. A o lē ua faamagaloina i se mea itiiti, e itiiti foʻi lona alofa.” 48  Ona ia fetalai atu lea iā te ia: “Ua faamagaloina au agasala.”+ 49  Ona manatunatu ifo lea o ē ua taooto faatasi ma ia e aai: “O ai ea lenei tagata o lē e faamagaloina agasala?”+ 50  Peitaʻi, ua ia fetalai atu i le fafine: “O lou faatuatua ua faaolaina ai oe;+ inā e alu ia ma le manuia.”+

Faamatalaga Pito i Lalo

O se laau umī e loʻugofie i le matagi.
Po o se “ʻie vaivai.”
Po “ua ili atu a matou fagufagu.”