Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Luka 5:1-39

5  I se tasi aso, a o tū Iesu i tafatafa o le vaituloto o Kenesareta,*+ ona lolofi mai lea o le motu o tagata iā te ia e faalogologo i le afioga a le Atua.  Ua ia silafia atu ni vaa se lua o loo taula i tafatafa o le auvai, a ua ō ese le ʻaufaifaiva e faamamā o latou upega.+  Ua maliu atu o ia i se tasi o vaa, o le vaa lea a Simona, ua ia talosaga atu iā te ia ina ia tuutuu teisi atu le vaa i tai. Ua nofo o ia i lalo, ma amata ona aʻoaʻo atu i le motu o tagata mai i le vaa.+  Ina ua uma ona ia aʻoaʻo atu, ona ia fetalai atu lea iā Simona: “Ia tuutuu atu le vaa i le mea loloto, ma lafo ifo ai o outou upega,+ ina ia maua ai ni iʻa.”  Ae ua tali mai Simona: “Le Faiaʻoga e, ua alu le pō atoa o matou fagogota ae e leai se mea na maua,+ ae ona o lau fetalaiga, ou te toe lafo ifo ai upega.”  Ina ua latou faia lea mea, ona maua ai lea o le tele o iʻa, ma ua amata ai ona masaesae o latou upega.  Ona latou talotalo atu lea i le isi vaega o la latou ʻaufaifaiva o loo i le isi vaa, e ō mai e fesoasoani iā i latou.+ Ua latou ō mai, ma ua tutumu o latou vaa uma e lua, ma ua amata foʻi ona tau gogoto.  Ua vaai atu Simona Peteru+ i lenei mea, ona faapaʻū lea i vae o Iesu ma faapea mai: “Le Alii e, ia e maliu ese atu, auā o aʻu o se tagata agasala.”+  Ua matuā ofo o ia ma i latou ua faatasi ma ia, ona o le tele o iʻa ua latou maua. 10  Ua faapea foʻi ona ofo o atalii o Sepetaio,+ o Iakopo ma Ioane, o ē ua faifaiva faatasi ma Simona. A ua fetalai atu Iesu iā Simona: “Aua e te toe fefe, e amata atu nei ona e maua tagata.”+ 11  Ona ave lea i uta o latou vaa, ua tuua mea uma lava, ae mulimuli atu iā te ia.+ 12  A o iai o ia i se tasi o aai, faauta! e iai se tagata ua lilofia lona tino i le lepela! Ina ua ia iloa mai Iesu, ona ia faapaʻū faō lea ma augani mai iā te ia: “Le Alii e, a e finagalo i ai, e mafai lava ona e faamamā iā te aʻu.”+ 13  Ona faaloaloa atu ai lea o lona aao, ua paʻi atu iā te ia, ma faapea atu: “Ou te loto i ai. Ia mamā ia oe.” Ona teʻa ai lea o lona lepela.+ 14  Ua ia faatonu atu i le tamāloa ia aua neʻi taʻuina atu i se tasi:+ “A ia e alu ma faailoa atu oe i le ositaulaga,+ ma avatu le taulaga+ mo lou faamamāina e pei ona faatonuina e Mose, e fai ma molimau iā i latou.”+ 15  Ae ua aave solo tala e faatatau iā te ia, ma ua ō mai tagata e toʻatele e faalogologo atu iā te ia, ma faamālōlōina o latou maʻi.+ 16  A ua nofo pea o ia i le mea tuufua ma tatalo ai.+ 17  I se tasi o aso a o ia aʻoaʻo atu, ua nonofo ai i inā le ʻau Faresaio ma aʻoaʻo o le tulafono mai nuu uma o Kalilaia, ma Iutaia, ma Ierusalema. Ua iai le mana o Ieova iā te ia e faia ai faamālōlōga.+ 18  Faauta! o ni tamāloloa o loo aumai se moega o loo taoto ai le tagata e pē le tino, ma o loo latou saʻili se auala e avatu ai o ia i luma o Iesu.+ 19  Ua lē mafai ona latou avatu o ia ona o le tumutumu o tagata, o lea ua latou ō aʻe ai ma faapū le taualuga, ma tuutuu ifo ai lona moega* i luma o Iesu.+ 20  Ua silafia e ia lo latou faatuatua, ona fetalai atu lea: “Loʻu atalii e, ua faamagaloina au agasala.”+ 21  Ona taumanatunatu ai lea o le ʻautusiupu ma le ʻau Faresaio, ua faapea ane: “O ai lenei tagata ua fai upuleaga ai o ia?+ E na o le Atua lava e mafai ona faamagaloina agasala.”+ 22  Ae ua silafia e Iesu o latou manatunatuga, ona tali atu lea iā i latou: “O ā ea mea ua outou manatunatu ai i o outou loto?+ 23  O lē fea e sili ona faigofie, o le fai atu, ‘Ua faamagaloina au agasala,’ po o le fai atu, ‘Ia tū i luga ma savali’?+ 24  Ae peitaʻi, ina ia outou iloa ua i le Atalii o le tagata le pule i le lalolagi e faamagalo ai agasala,” ua ia fetalai atu ai i le tagata ua pē le tino: “Ou te fai atu iā te oe, Ia tū ia i luga ma ave lou moega, ma e alu i lou aiga.”+ 25  Ona tū loa lea o ia i luga i o latou luma, ma ave lona moega, ua alu i lona aiga ma faamamaluina le Atua.+ 26  Ua matuā maofa+ i latou uma, ma ua amata ona faamamaluina le Atua, ua latou matuā matataʻu, ma faapea ane: “E matuā uiga ese mea ua tatou vāai i ai i lenei aso!”+ 27  Ua mavae ia mea, ona ulufafo lea o ia, ua ia silafia ai se aolafoga e igoa iā Levi o loo nofo i le ofisa aolafoga, ma ua ia faapea atu iā te ia: “Ia e mulimuli mai iā te aʻu.”+ 28  Ona tuua loa lea e ia o mea uma lava,+ ae alu ma mulimuli atu iā te ia. 29  Ua faia foʻi e Levi se faigaʻai tele mo ia i lona fale; ma ua taooto i latou e aai faatasi ma le toʻatele o le ʻauaolafoga ma isi.+ 30  Ona muimui ai lea o le ʻau Faresaio ma a latou tusiupu i ona soo, ua faapea mai: “Aiseā ua outou aai ai ma feinu faatasi ma le ʻauaolafoga ma ē e agasala?”+ 31  Ona tali atu lea o Iesu iā i latou: “E lē manaʻomia e tagata malolosi se fomaʻi,+ ae na o ē e mamaʻi.+ 32  Auā ua ou sau e valaau i ē agasala ina ia salamō, ae lē o ē amiotonu.”+ 33  Ua latou fai mai iā te ia: “Ua anapopogi e lē aunoa ma fai talosaga soo o Ioane, e faapea foʻi soo o le ʻau Faresaio, a o ou soo ua aai ma feinu.”+ 34  A ua fetalai atu Iesu iā i latou: “E lē mafai ona outou tuuina atu uō a le alii faaipoipo ia anapopogi a o faatasi i latou ma ia, a ea?+ 35  Ae e oo mai aso e aveesea ai le alii faaipoipo+ mai iā i latou,+ ona latou anapopogi ai lea i na aso.”+ 36  Ona ia fetalai atili atu lea iā i latou i se talafaatusa: “E leai se tasi e na te ʻotiina se fasiʻie mai i se ofu fou ma suʻi i luga o se ofu tele tuai; pe a ia faia faapea, ona masae ai lea o le fasiʻie fou, ma e lē fetaui le fasiʻie fou ma le ofu tele tuai.+ 37  E lē utuina foʻi e se tasi le uaina fou i fagupaʻu tuai; pe a ia faia faapea, ona pāpā ai lea o fagupaʻu+ ona o le uaina fou, ma masaa ai le uaina ma lē toe aogā+ ai fagupaʻu. 38  Ae e tatau ona utu le uaina fou i fagupaʻu fou. 39  E leai se tasi e inu i le uaina tuai e manaʻo i le uaina fou, auā ua faapea mai o ia, ‘E manaia le uaina tuai.’ ”+

Faamatalaga Pito i Lalo

“O le vaituloto o Kenesareta” o le isi igoa lea o le “sami o Kalilaia.”
Po o “se tamaʻi moega.”