Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Luka 24:1-53

24  Ua latou ō atu i le tuugamau i le vaveao o le uluaʻi aso o le vaiaso, ma avatu mea manogi na latou saunia.+  Ona latou iloa ai lea ua uma ona fuliesea le maa mai i le tuugamau,+  ma ua latou ulu atu ae e leʻi maua e i latou le tino o le Alii o Iesu.+  Ua fememeaʻi i latou ona o lenei mea. Faauta! Ua tutū mai tamāloloa e toʻalua ua iila mai o la ofu.+  Ua matataʻu fafine ma ua punonou i lalo, ona faapea atu lea o tamāloloa iā i latou: “Aiseā ua outou saʻilia ai Lē ua soifua mai i tagata oti?  [[E lē o i inei o ia a ua toe faatūina.]]+ Manatua na ia fetalai atu iā te outou a o iai o ia i Kalilaia,+  ma faapea atu e tuuina atu le Atalii o le tagata i lima o tagata agasala, ma e tutuʻia o ia i luga o le laau ma toetū mai i le aso lona tolu.”+  Ua latou manatua ana fetalaiga,+  ma ua toe foʻi mai mai i le tuugamau, ma taʻu atu nei mea uma i le toʻasefulu tasi atoa foʻi ma isi.+ 10  O i latou ia, o Maria le Makatala, o Ioana,+ ma Maria le tinā o Iakopo. O isi fafine+ uma sa latou faatasi, ua latou taʻu atu foʻi nei mea i aposetolo. 11  Peitaʻi, latou te leʻi talitonu+ i fafine, auā e pei o ni talafatu mea na latou faamatalaina. 12  [[Ua tulaʻi Peteru ma tamoʻe atu i le tuugamau, ua punou e tilotilo i totonu ma ua ia iloa ai, ua na o ʻie. Ona alu lea o ia ma taumānatu i le mea ua tupu.]] 13  Faauta! O le aso lava lenā o loo agaʻi atu ai le toʻalua o i latou i le nuu e taʻua o Emau, pe tusa e fitu maila* le mamao mai i Ierusalema. 14  Ua talatalanoa i laʻua i nei mea+ uma ua tutupu. 15  A o felafolafoaʻi ma talatalanoa i laʻua, ona faalatalata+ atu lea o Iesu ma savavali faatasi ma i laʻua; 16  ae e leʻi mafai ona la iloa o ia.+ 17  Ua fetalai atu o ia: “O ā ea mea o lua talatalanoa i ai a o lua savavali?” Ona tutū lea ma o la mata ua faanoanoa. 18  Ua tali mai le tasi e igoa iā Kaleopa: “Po o oe o se tagata ese i Ierusalema ua e lē iloa ai mea ua tutupu i nei aso?” 19  Ua fesili atu o ia: “O ā mea?” Ua la fai mai: “O mea e faatatau iā Iesu le Nasareta,+ o le perofeta+ na faia galuega ma upu mamana i luma o le Atua ma tagata, 20  ma na faasalaina o ia i le oti e le ʻaufaitaulaga sili ma ē e taʻitaʻi, ma tutuʻi o ia i luga o le laau.+ 21  Ae na matou faamoemoe o lenei tagata na filifilia e laveaʻiina Isaraelu;+ e lē gata i nei mea uma, a o le aso lona tolu lenei talu ona tutupu o nei mea. 22  A ua matou ofo ona o ni fafine+ sa iā i matou, na usupō i le mea o iai le tuugamau, 23  ae latou te leʻi mauaina lona tino. Na latou ō atu ma faapea atu na latou vāai i agelu, o ē na faapea mai ua soifua o ia. 24  Na iai foʻi nisi sa faatasi ma i matou na ō atu i le tuugamau;+ ma na latou maua ai mea e pei ona faamatalaina e fafine, ae e leʻi vāai foʻi i latou iā te ia.” 25  Ona fetalai atu lea o ia iā i laʻua: “Pagā oulua o tagata lē faautauta ma o ē e talitonugatā i mea na taʻua e perofeta!+ 26  Pe e lē tatau ea ona tigāina+ le Keriso i nei mea uma ma ulu atu i lona mamalu?”+ 27  Ona ia faamatala atu lea o mea o i Tusitusiga Paia e faatatau iā te ia, e amata mai i tusi a Mose+ ma le ʻau Perofeta.+ 28  Ua latalata atu i latou i le nuu o loo latou ō atu i ai, a ua peiseaʻī o le a faaauau pea ona alu o ia. 29  A ua la tauanau atu iā te ia e faapea: “Tatou nonofo auā ua leva le aso ma o le a pō.” Ona nofo lea o ia ma i laʻua. 30  A o taoto o ia e taumafa faatasi ma i laʻua, ua tago o ia i le falaoa, ua faafetai, ona vaevae lea ma tufatufa atu iā i laʻua.+ 31  Ona malamalama lea o i laʻua ma la iloa ai o ia; ae ua mou ese o ia mai iā i laʻua.+ 32  A ua fai atu le tasi i le isi: “Pe e leʻi mū ea o ta loto a o fetalai mai o ia iā i taʻua i le auala, ma faamatala mai Tusitusiga Paia?” 33  Ona tulaʻi lea o i laʻua ma toe foʻi i Ierusalema, lea na la maua ai o loo potopoto le toʻasefulu tasi ma ē na latou faatasi 34  ua faapea atu: “E moni, ua toetū le Alii ma na faaali atu o ia iā Simona!”+ 35  Ua la faamatala atu mea na tutupu i le auala, ma na la iloa ai o ia ina ua ia vaevaeina le falaoa.+ 36  A o talanoa i latou i nei mea, ona tū mai lea o ia i o latou luma [[ma fetalai atu: “Ia outou maua le filemu.”]] 37  Ae ua matataʻu ma fefefe i latou,+ ona ua manatu o loo latou vāai atu i se agaga. 38  Ona fetalai atu lea o ia: “Aiseā ua outou atuatuvale ai ma masalosalo o outou loto? 39  Ia vaavaai mai i oʻu lima ma oʻu vae; o aʻu lenei, ia paʻi+ mai ma vāai mai auā e leai se tino ma ni ivi+ o se agaga e pei ona outou vaavaai mai ai iā te aʻu.” 40  [[Ua ia faaali atu iā i latou ona lima ma ona vae a o ia fetalai atu i nei mea.]] 41  Ae e leʻi talitonu+ i latou ona ua olioli i latou ma ofo. Ona ia fetalai atu lea iā i latou: “Pe e iai sa outou meaʻai?”+ 42  Ua latou avatu iā te ia se fasi iʻa tunu;+ 43  ona tago lea o ia ma taumafa+ a o vaavaai atu i latou. 44  Ona ia fetalai atu lea iā i latou: “O aʻu upu nei na ou fai atu ai iā te outou a o tatou faatasi,+ e tatau ona faataunuuina o mea uma ua tusia i le tulafono a Mose, ma le ʻau Perofeta+ ma Salamo+ e faatatau iā te aʻu.” 45  Ona ia matuā faamatala atu lea iā i latou o Tusitusiga Paia,+ ina ia latou malamalama ai, 46  ma ua ia fetalai atu iā i latou: “E pei ona tusia, e tigāina le Keriso ma toetū mai i le oti i le aso lona tolu,+ 47  ma e ao ona talaʻi atu i atunuu+ uma le salamō mo le faamagaloina o agasala+ ona o lona suafa, e amata atu i Ierusalema,+ 48  e fai foʻi outou ma molimau+ i nei mea uma. 49  Faauta! Ou te auina mai iā te outou le mea na folafola mai e loʻu Tamā. Ae ia outou nonofo pea i le aai, seʻia outou maua le mana mai lugā.”+ 50  Ua ia taʻitaʻiina atu i latou i Petania, ua sii i luga ona aao ma faamanuia atu iā i latou.+ 51  A o ia faamanuia atu iā i latou, ona teʻa ese lea o ia mai iā i latou, ma amata ona aveina aʻe i le lagi.+ 52  Ua latou ifo iā te ia ma toe foʻi mai ma le olioli+ i Ierusalema. 53  Ua faaauau ona iai i latou i le malumalu, ma vivii atu i le Atua.+

Faamatalaga Pito i Lalo

Tagaʻi i le Faaopoopoga e 14.