Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Luka 22:1-71

22  Ua latalata i le tausamiga o falaoa e lē faafefeteina, ua taʻua o le Paseka.+  Ua saʻili foʻi le ʻaufaitaulaga sili, ma le ʻautusiupu i se auala sili e latou te fasioti ai iā te ia,+ ona o lo latou fefefe i tagata.+  A ua ulu Satani iā Iuta o lē ua taʻua o le Sekara, o se tasi o le toʻasefulu lua;+  ua alu atu o ia e talatalanoa i le ʻaufaitaulaga sili, ma taʻitaʻiʻau o le malumalu, i se auala sili e faalataina ai o ia iā i latou.+  Ona latou olioli ai lea ma ioe ane e avatu iā te ia tupe siliva.+  Ua malie i ai Iuta, ona amata loa lea i lenā taimi ona ia saʻili se avanoa lelei e faalataina ai o ia iā i latou, ae e lē o iai le motu o tagata.+  Ua oo mai le aso o le tausamiga o falaoa e lē faafefeteina, lea e masani ona latou fasi ai se manu mo le paseka;+  ona ia aauina atu lea o Peteru ma Ioane ma faapea atu: “Ia oulua ō ma sauni+ se mea tatou te aai ai le paseka.”  Ua la fai ane iā te ia: “O fea e te finagalo ma te saunia ai le paseka?” 10  Ua ia fetalai atu iā i laʻua:+ “Faauta! Pe a oulua ō atu i le aai, e faafetaui oulua e se tamāloa o loo ave se faguvai. Ia mulimuli atu iā te ia i le fale e ulu atu i ai.+ 11  Ia oulua fai atu i le matai o le aiga, ‘Ua faapea mai le Aʻoaʻo iā te oe: “O fea le potu e tali ai mālō ou te ʻai ai le paseka ma oʻu soo?” ’+ 12  Ona ia faasino atu lea iā te oulua se potu tele i luga ua uma ona teu lelei. Ia saunia mea uma i inā.”+ 13  Ua la ō, ma maua ai mea uma e pei ona ia fetalai atu ai iā i laʻua; ma ua la saunia ai le paseka.+ 14  Ua oo i le afiafipō, ona taoto ai lea o ia e taumafa faatasi ma ona aposetolo.+ 15  Ua ia fetalai atu iā i latou: “Ua ou matuā naunau lava e ʻai lenei paseka ma outou, a o leʻi oo i oʻu puapuaga. 16  Auā ou te fai atu iā te outou, Ou te lē toe ʻai ai lava seʻia faataunuuina i le malo o le Atua.”+ 17  Ua tago o ia i le ipu,+ ua faafetai ona fetalai atu lea: “Inā fetagofi ia i le ipu ma faasolo ane iā te outou. 18  Ae ou te fai atu iā te outou, E amata atu nei ona ou lē toe inu i lenei uaina, seʻia oo mai le malo o le Atua.”+ 19  Ua ia tago foʻi i le areto,+ ua fai le faafetai, ua vaevae ma avatu iā i latou, ma faapea atu: “O le faatusa lenei o loʻu tino+ ou te avatu mo outou.+ Ia faia pea lenei mea e fai ma faamanatuga iā te aʻu.”+ 20  Ua faapea foʻi ona fai i le ipu+ ina ua uma le talisuaga afiafi, ua ia fetalai atu: “O lenei ipu, o le faatusa lea o le feagaiga fou+ e ala i loʻu toto+ lea o le a faamaligiina mo outou.+ 21  “Faauta, ua iai i le laulau+ o lē na te faalataina+ aʻu. 22  Auā e alu lava le Atalii o le tagata e tusa ma le mea ua tofia i ai o ia;+ a o lē na te faalataina le Atalii o le tagata, oi talofa iā te ia!”+ 23  Ona latou talatalanoa lea po o ai o i latou o le a faia lenei mea.+ 24  Ae peitaʻi, ua fefinauaʻi i latou po o ai o i latou e sili.+ 25  A ua ia fetalai atu iā i latou: “E pulepuletutū tupu o malo iā i latou, ma o ē e pule iā i latou ua taʻua o Ē e Limafoaʻi.+ 26  Ae e lē faapena outou.+ O lē sili iā te outou, ia avea o ia ma lē aupito itiiti,+ ma o lē pule, ia avea o ia ma auauna.+ 27  O ai e sili, o lē o loo taoto e ʻai po o lē o loo auauna atu? Pe e lē o ia ea o taoto e ʻai? A o lenei ua ou auauna atu iā te outou.+ 28  “O outou foʻi, ua outou tumau+ iā te aʻu i taimi o oʻu puapuaga;+ 29  ma ua ou osia ai se feagaiga ma outou, e pei lava ona osia e loʻu Tamā se feagaiga+ ma aʻu mo se malo,+ 30  ina ia outou aai+ ma inu i laʻu laoai i loʻu malo,+ ma nonofo i nofoālii+ ma faamasino atu i ituaiga e sefulu lua o Isaraelu. 31  “Simona e, Simona e, faauta! ua manaʻo Satani+ e lūlū* iā te outou e pei o saito.+ 32  A ua ou faatoga+ atu mo oe, ina ia aua neʻi mou atu lou faatuatua; a o oe, pe a e toe foʻi mai, ia e faamalosi+ i ou uso.” 33  Ona fai mai lea o Peteru iā te ia: “Le Alii e, ua ou nofosauni ta te ō faatasi i le falepuipui atoa ma le oti.”+ 34  A ua ia fetalai atu: “E moni, ou te fai atu iā te oe Peteru, A o leʻi vivini se moa i le asō, a ua faatolu ona e faafiti e te lē iloa aʻu.”+ 35  Ua fetalai atu foʻi o ia iā i latou: “Ina ua ou aauina+ atu outou e leai ni ato tupe, ni taga meaʻai, ma ni seevae, pe na outou matitiva ai ea?” Ua latou fai mai: “E leai!” 36  Ona ia fetalai atu lea iā i latou: “A o lenei, o lē ua iai se ato tupe, ia ave, faapea foʻi se taga meaʻai, a o lē ua leai se pelu, ia faatau atu lona ofu tele ma faatau mai ai sana pelu. 37  Auā ou te fai atu iā te outou, e tatau ona faataunuuina iā te aʻu le mea ua tusia e faapea, ‘Ua faitaulia faatasi o ia ma tagata solitulafono.’+ Auā o loo faataunuuina+ mea ua tusia iā te aʻu.” 38  Ona latou fai ane lea: “Le Alii e, faauta! o pelu nei e lua.” Ua ia fetalai atu iā i latou: “Ua lava na.” 39  Ina ua latou ō, ona maliu atu lea o ia i le Mauga o Olive e pei ona masani ai; ma ua mulimuli atu foʻi iā te ia le ʻausoo.+ 40  Ua taunuu i inā, ona fetalai atu lea o ia: “Ia outou tatalo e lē aunoa, ina neʻi lolo atu outou i faaosoosoga.”+ 41  Ua maliu teisi ese o ia* mai iā i latou, ua ia tootuli ma tatalo, 42  ua faapea atu: “Loʻu Tamā e, a e finagalo i ai, ia aveese lenei ipu mai iā te aʻu. Peitaʻi, e lē o loʻu loto,+ ae ia faia lou finagalo.”+ 43  Ona faaali mai lea o le agelu mai le lagi ma faamalosi iā te ia.+ 44  Ua puapuagatia o ia, ma ua atili ai ona tatalo faatauanau;+ ma ua sisina ifo lona afu e pei o ni ʻaluʻalu toto ua paʻuʻū i le eleele.+ 45  Ua tulaʻi o ia mai lana tatalo, ua maliu atu i le ʻausoo ma maua i latou ua momoe ona o le faanoanoa;+ 46  ua fetalai atu o ia: “Aiseā ua outou momoe ai? Inā tulaʻi ia ma tatalo pea, ina neʻi outou lolo atu i faaosoosoga.”+ 47  A o fetalai o ia, faauta! o le motu o tagata ma se tasi o le toʻasefulu lua e igoa iā Iuta, o loo muamua mai iā i latou,+ ua ia sōsō mai ma sogi mai iā Iesu.+ 48  A ua fetalai atu Iesu iā te ia: “Iuta e, e te faalata ea le Atalii o le tagata i le sogi?”+ 49  Ua iloa atu e ē ua latou faatasi le mea o le a tupu, ona latou fai mai lea: “Le Alii e, pe matou te taia ea i latou i le pelu?”+ 50  Ona tā lea e se tasi o i latou le pologa a le ositaulaga sili, ma tipiesea ai lona taliga taumatau.+ 51  A ua tali atu Iesu: “Soia, ua lava lea.” Ua tago atu o ia i le taliga ma faamālōlō iā te ia.+ 52  Ona fetalai atu lea o Iesu i le ʻaufaitaulaga sili, ma taʻitaʻiʻau o le malumalu, ma toeaina o ē ua ō mai iā te ia: “Po ua outou ō mai ea ma pelu ma pouvai e pei o aʻu o se tagata faomea?+ 53  O aso taʻitasi na ou iai faatasi ma outou i le malumalu,+ ae tou te leʻi puʻeina ai aʻu.+ Ae o lo outou taimi*+ lenei ma le pule+ a le pogisa.”+ 54  Ona latou puʻe lea iā te ia ma taʻitaʻi+ ese atu ma avatu i le fale o le ositaulaga sili;+ a ua mulimuli mamao atu Peteru.+ 55  Ua latou tafu se afi i le lotoā ma nonofo i lalo, ma ua nofo ai foʻi Peteru faatasi ma i latou.+ 56  A ua iloa atu o ia e se auauna teine o loo nofo i autafa o le afi, ona ia tilotilo atu lea iā te ia ma faapea ane: “Sa faatasi foʻi lenei tagata ma ia.”+ 57  A ua ia faafiti+ o ia ma faapea atu: “Suga, ou te lē iloa o ia.”+ 58  E leʻi leva ae toe iloa mai o ia e se isi tagata ma faapea mai: “O oe o se tasi o i latou.” A ua fai atu Peteru: “Sole, e leai.”+ 59  Pe e tusa ma le itula ua mavae, ona faapea mai lea ma le mautinoa o le tasi: “E moni, sa faatasi lenei tagata ma ia, auā o ia o le Kalilaia!”+ 60  A ua fai atu Peteru: “Sole, ou te lē iloa le mea o loo e fai mai ai.” A o tautala o ia, ona vivini loa lea o le moa.+ 61  Ua faliu le Alii ma silasila atu iā Peteru, ma ua manatua ai e Peteru fetalaiga a le Alii iā te ia: “E te faafiti faatolu iā te aʻu a o leʻi vivini le moa i le asō.”+ 62  Ona alu ai lea o ia i fafo ma ua tagi masūsū.+ 63  Ona tauemu+ ai lea o tagata na puʻea o ia ma tatuʻi+ iā te ia.+ 64  Ua latou ufiufi i ona fofoga ma fesili mai iā te ia: “Afai o oe o se perofeta, ia taʻu mai po o ai na ia pō atu iā te oe?”+ 65  Ua faaauau ona latou fai atu upuleaga+ iā te ia. 66  Ua oo i le taeao, ona faapotopoto+ mai lea o le ʻautoeaina o le nuu, o le ʻaufaitaulaga sili, ma le ʻautusiupu, ma ua latou tuuina atu o ia i le maota o le Faamasinoga Sili, ma faapea mai:+ 67  “Afai o oe o le Keriso,+ ia taʻu mai iā i matou.” Ae ua ia fetalai atu: “E tusa lava po ou te taʻuina atu, ae tou te lē talitonu lava.+ 68  Afai foʻi ou te fesili atu iā te outou, tou te lē tali mai lava.+ 69  Ae peitaʻi, e amata atu nei ona nofo le Atalii o le tagata+ i le itu taumatau+ malosi o le Atua.”+ 70  Ona latou faapea mai lea: “Po o oe o le Alo o le Atua?” Ua fetalai atu o ia: “O lenā tonu lava ua outou fai mai ai.”+ 71  Ua latou fai ane: “Aiseā e toe manaʻomia ai fua nisi molimau?+ Auā o lea ua tatou faalogo atu i ana lava upu.”+

Faamatalaga Pito i Lalo

I le gagana Eleni, “e faamamā iā te outou e pei o saito.”
I le gagana Eleni, “ua maliu teisi ese o ia e pei o le mamao o le togi o le maa.”
I le gagana Eleni, “o lo outou itula lenei.”