Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Luka 20:1-47

20  I se tasi o aso, a o aʻoaʻo e ia tagata i le malumalu, ma folafola atu le tala lelei, ona ō mai ai lea o le ʻaufaitaulaga sili, ma le ʻautusiupu, ma le ʻautoeaina iā te ia,+  ua latou faapea mai iā te ia: “Ia e taʻu mai iā i matou, po o le pule a ai ua e faia ai nei mea, po o ai na tuuina atu lenei pule+ iā te oe.”  Ua ia tali atu iā i latou: “E iai foʻi le mea lea ou te fia fesili atu ai iā te outou, ae ia outou tali mai:+  Pe e mai i le lagi ea pe e mai i tagata le papatisoga a Ioane?”+  A ua latou talatalanoa ma faapea ane: “Afai tatou te fai atu, ‘E mai i le lagi,’ ona ia faapea mai lea, ‘Aiseā la ua outou lē talitonu ai iā te ia?’+  Ae afai tatou te faapea atu, ‘E mai i tagata,’ o le a fetogia i tatou+ uma e tagata i maa, auā ua talitonu i latou o Ioane+ o le perofeta.”+  Ona latou tali mai lea, e latou te lē iloa pe mai i fea.  Ona fetalai atu lea o Iesu iā i latou: “Ou te lē taʻuina atu foʻi la iā te outou, po o le pule a ai ua ou faia ai nei mea.”+  Ua toe fetalai atu o ia i tagata i lenei talafaatusa: “E iai se tagata o lē na totō lona togāvine,+ ona ia lisi atu lea i ē e galulue vine, ae alu malaga i se nuu mamao mo se vaitaimi.+ 10  Ua oo i le taimi o le seleselega, ona ia auina atu lea o se pologa+ i ē e galulue vine,+ ina ia maua mai ai ni fua mai i le togāvine.+ Peitaʻi, ina ua uma ona latou fasi iā te ia, ona tuliese lea o ia e aunoa ma se mea.+ 11  Ua ia toe auina atu le isi pologa iā i latou. Ua latou fasi foʻi ma faileagaina o ia, ma tuliese e aunoa ma se mea.+ 12  Ua ia toe auina atu foʻi le lona tolu;+ a ua latou faamanuʻalia o ia ma tuliese. 13  Ona faapea ifo ai lea o lē e ana le togāvine, ‘O le ā se mea e tatau ona ou faia? Ou te auina atu loʻu atalii pele.+ E lē taumatea e latou te āva iā te ia.’ 14  Ina ua iloa atu o ia e ē galulue vine, ona latou taupulepule lea ma faapea ane le tasi i le isi, ‘O le suli lenei. Seʻi o tatou fasiotia o ia, ma fai mo i tatou le tofi.’+ 15  Ona latou lafo ai lea o ia i tua+ o le togāvine ma fasioti+ iā te ia. O le ā le mea o le a faia e lē e ona le tovine iā i latou?+ 16  O le a sau o ia ma faaumatia ē e galulue vine, ma lisi atu le togāvine i isi.”+ I le faalogo atu i lenei mea, ona latou faapea mai lea: “Aua lava neʻi tupu lenā mea!” 17  A ua silasila atu o ia iā i latou ma faapea atu: “O le ā le uiga o lenei mea ua tusia, ‘O le maa na tuulafoaʻiina+ e tufuga, ua avea ma maa tulimanu sili’?+ 18  O sē e paʻū i luga o le maa e nutililii+ o ia. Ae o sē e paʻū+ i ai le maa, e nutipalaina o ia.”+ 19  Ua lamalama le ʻautusiupu ma le ʻaufaitaulaga sili e puʻe iā te ia i lenā taimi, ae ua fefefe i latou i tagata; auā ua latou iloa ua ia faatatau atu le talafaatusa iā i latou.+ 20  Ua latou tulimataʻia o ia, ona totogi faalilolilo lea o ni tagata e ō atu e peiseaʻī o ni tagata amiotonu, ina ia latou maua se mea e maileia+ ai o ia i ana upu, ina ia molia ai o ia i le malo ma le kovana.*+ 21  Ua latou fesili mai iā te ia: “Le Aʻoaʻo e, matou te iloa e moni au upu ma au aʻoaʻoga, ma e te lē faailoga tagata foʻi, a ua e aʻoaʻo atu le ala o le Atua e tusa ma le upu moni:+ 22  Pe e taga i le tulafono ona matou totogi atu lafoga iā Kaisara pe e leai?”+ 23  A ua ia silafia lo latou faitogafiti ma fetalai atu iā i latou:+ 24  “Ia faaali mai iā te aʻu se tenari. O ai e ona le ata ma le igoa lea?” Ua latou tali mai: “O Kaisara.”+ 25  Ona ia fetalai atu lea iā i latou: “O lea la, ia totogi atu mea a Kaisara iā Kaisara,+ a o mea a le Atua ia avatu i le Atua.”+ 26  O lea, ua lē mafai ai ona latou maua se mea e molia ai o ia i luma o tagata, ae ua matuā maofa i lana tali, ma ua lē magagana ai i latou.+ 27  A ua ō mai nisi o le ʻau Satukaio iā te ia,+ o ē e faapea mai e leai se toetū, ma fai mai 28  e faapea: “Le Aʻoaʻo e, na tusi mai Mose+ iā i tatou, ‘Afai e oti se tagata ae tuua lana avā e leai se fanau, e tatau ona fai le fafine ma avā a lona uso,+ ina ia maua mai ai se fanau ma lona uso.’+ 29  Sa iai le ʻauso e toʻafitu, na faaipoipo lē e muamua ma ua oti o ia, ae e leai sana fanau.+ 30  E faapea foʻi le uso lona lua, 31  ma le uso lona tolu, seʻia oo lava i le uso lona fitu: A ua feoti i latou uma ae leai ni fanau.+ 32  Mulimuli ane na oti foʻi le fafine.+ 33  O lea la, i le toetū, o ai o le toʻafitu o le a fai ma ia le avā? Auā na faaipoipo uma le toʻafitu iā te ia.”+ 34  Ona faapea atu lea o Iesu iā i latou: “Ua faaipoipo+ fanau a tagata o lenei lalolagi,* 35  a o i latou ua taʻuaogāina+ e maua le olaga i le lumanaʻi+ ma le toetū mai i le oti,+ e lē faaipoipo i latou. 36  O le mea lea, e lē toe oti+ ai i latou, auā e pei i latou o agelu, ma e avea ma fanau a le Atua, ona e toetutū mai i latou.*+ 37  Ae e toe faatutūina ē ua oti e pei ona tusia e Mose i le tala i le laau tuitui,+ ina ua ia taʻua Ieova o ‘le Atua o Aperaamo, o le Atua o Isaako, o le Atua o Iakopo.’+ 38  O ia o le Atua, o ē e ola ae lē o ē ua oti, auā ua latou ola uma iā te ia.”+ 39  Ua tali mai nisi o le ʻautusiupu: “Le Aʻoaʻo e, ua tonu au fetalaiga.” 40  A ua lē lototetele i latou e toe fesili mai iā te ia i se mea e tasi. 41  O le mea lea, ua ia fetalai atu ai iā i latou: “E faapefea ona latou fai mai o Keriso o le alo lea o Tavita?+ 42  Auā ua faapea mai Tavita i le tusi o le Salamo, ‘Ua fetalai atu Ieova i loʻu Alii: “Ia e nofo i loʻu itu taumatau 43  seʻia ou faia ou fili ma mea e tū ai ou vae.” ’+ 44  O lea la, ua taʻua o ia e Tavita o le ‘Alii’; e faapefea la ona avea o ia ma ona atalii?” 45  A o faalogologo uma ane tagata, ona fetalai atu lea o ia i le ʻausoo:+ 46  “Ia faaeteete i le ʻautusiupu o ē e mananaʻo e feoaʻi solo ma o latou ofu talaloa, ma ia faafeiloaʻi aloaʻia i latou i nofoaga faitele,* ua latou fiafia i nofoa pito i luma i sunako, ma nofoaga sili i faigaʻai,+ 47  o i latou ia ua faoa fale o fafine ua oti a latou tane,+ ma ua faaumiumi a latou tatalo ona o le faalialiavale. E sili atu ona mamafa lo latou faasalaga.”+

Faamatalaga Pito i Lalo

I le gagana Eleni, o le “pule a le kovana.”
Po o “fanau a tagata o faiga o mea a lenei lalolagi.”
I le gagana Eleni, “ona o i latou o ni fanau o le toetū.”
Po o “maketi.”