Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Luka 14:1-35

14  I se tasi sapati, ua ulufale atu ai o ia i le fale o se alii pule o le ʻau Faresaio e taumafa ai,+ ma ua latou tulimataʻi uma o ia.+  Faauta! Ua i ona luma se tagata ua maua i le maʻi fulafula.  Ua fetalai atu Iesu iā i latou uma e atamamai i le Tulafono ma le ʻau Faresaio e faapea: “Pe e taga i le tulafono ona faamālōlō i le sapati pe leai?”+  A ua lē tali mai i latou. Ona ia tago atu ai lea i le tagata maʻi, ua faamālōlō ma tuu atu o ia e alu.  Ona ia fetalai atu lea iā i latou: “O ai se tasi o outou, pe afai e paʻū sona atalii po o sana povi poʻa i se vaieli+ i le aso sapati, pe e lē vave ea ona ia tago atu ma ave aʻe i luga?”+  A ua lē mafai ona latou tali ane.+  Ona ia faamatala atu lea o se talafaatusa i tagata na valaaulia, a o ia mātauina ua latou filifilia nofoaga sili mo i latou, ona ia fetalai atu lea:+  “Pe afai e valaaulia oe e se tasi i le ʻaiga o se faaipoipoga, aua e te taoto i le nofoaga sili.+ Auā atonu na valaaulia foʻi e ia se tasi e sili atu ona tāua nai lo o oe,  ona ō atu ai lea o ia ma lē na ia valaaulia ma faapea atu iā te oe, ‘Seʻi nofo atu le alii nei i le nofoaga lenā.’ Ona e alu ai lea ma le māsiasi i le nofoaga e aupito i maulalo.+ 10  Ae pe a valaaulia oe, ia e alu ma taoto i le nofoaga e aupito i maulalo,+ pe a sau lē na ia valaaulia oe, o le a faapea atu, ‘Laʻu uō e, ia e alu atu i le nofoaga sili.’ Ona faaaloalogia ai lea o oe i luma o mālō uma.+ 11  Auā o sē e faaeaina o ia lava e faamaulaloina lea, a o sē e faamaulalo o ia iā te ia, e faaeaina lea.”+ 12  Ua ia fai atu i le tagata na valaauina o ia: “Pe a e faia se taumafataga i le aoauli po o le pō, aua e te valaauliaina au uō, ou uso, aiga, po o ou tuaoi mauʻoa. Atonu latou te toe valaaulia foʻi oe ma toe totogi mai iā te oe. 13  Ae a e faia se taumafataga, ona valaaulia lea o ē e matitiva, o ē e pipili, o ē e pipiʻo o latou vae, ma ē e tauaso;+ 14  ma o le a e fiafia ai, auā e lē mafai ona latou toe totogi mai iā te oe. Ae e tauia oe i le toetutū+ mai o ē e amiotonu.” 15  I le faalogo atu i nei mea, ona faapea mai lea o se tasi o mālō iā te ia: “E fiafia o lē e ʻai i le malo o le Atua.”+ 16  Ua fetalai atu Iesu iā te ia: “Ua faia e se tagata se taumafataga tele i le pō, ma ua ia valaauliaina ai tagata e toʻatele.+ 17  Ua ia auina atu lana pologa i le itula e faia ai le taumafataga i le pō, ma faapea atu i ē ua valaaulia, ‘Ō mai loa,+ auā o lea ua saunia mea uma.’ 18  A ua tofu lava i latou uma ma le faamolemolega e fai mai.+ Ua faapea mai lē na muamua iā te ia, ‘E faamalie atu e lē mafai ona ou alu atu; ona ua ou faatauina se fanua ma e tatau ona ou alu seʻi vaai i ai.’+ 19  A ua faapea mai le isi, ‘E faamalie atu e lē mafai ona ou alu atu, ona ua uma ona faatau aʻu povi e sefulu ma e tatau ona ou alu e siaki.’+ 20  A ua faapea mai le tasi, ‘E lē mafai ona ou alu atu, ona o lea faatoʻā uma ona ma faaipoipo+ ma laʻu avā.’ 21  Ona sau lea o le pologa ma faamatala mai nei mea uma i lona matai. Ona matuā ita ai lea o ia, ma faapea atu i lana pologa, ‘Alu vave nei i ala tetele ma ala vaiti o le aai, ma aumai i inei o ē e matitiva, o ē e pipili, o ē e tauaso ma ē e pipiʻo o latou vae.’+ 22  Ua faapea mai le pologa, ‘Le Alii e, ua uma ona faia o mea na e fetalai mai ai, ma o loo tele pea avanoa.’ 23  Ua fai atu le matai i le pologa, ‘Ia e alu atu i auala+ ma nofoaga ua siʻomia i le pā, ma pulunaunau i latou e ō mai, ina ia tumu ai loʻu fale.+ 24  Auā ou te fai atu iā te outou, E leai se tasi o na tagata ua valaaulia e ʻai i laʻu taumafataga o le pō.’”+ 25  Ua malaga faatasi o ia ma le motu o tagata, ona ia faliu lea ma fetalai atu iā i latou: 26  “Afai e sau se tasi iā te aʻu ae e lē ʻinoʻino i lona tamā, lona tinā, o lana avā ma le fanau, i ona uso ma tuafāfine, e oo foʻi i lona lava ola,+ e lē mafai ona avea o ia ma oʻu soo.+ 27  E lē mafai ona avea se tasi ma oʻu soo, pe a lē amoina e ia le laau e faapuapuagatia* ai o ia ma mulimuli mai iā te aʻu.+ 28  Auā o ai foʻi se tasi o outou e manaʻo e fau se ʻolo, e lē muamua ea ona nofo i lalo ma faitau tupe o le a faaalu,+ ina ia iloa ai po ua lava mea e faauma ai? 29  A lē faia faapea, e ono faataatia e ia le faavae ae lē mafai ona faauma, ona tauemu uma ane lea i ai o ē o vaavaai i ai, 30  ma faapea ane, ‘O le tagata lenei na amata ona fau le ʻolo, ae na lē mafai ona faaumaina.’ 31  Po o ai foʻi se tupu ua alu atu e faafetaiaʻi le isi tupu i se taua, e lē muamua ea ona ia nofo i lalo ma talanoa ma isi pe e mafai e lana ʻautau e toʻasefulu afe, ona tau ma le tupu o loo faasagatau mai iā te ia ma lana ʻau e toʻalua sefulu afe?+ 32  Ae afai e lē mafai ona ia faia faapea, ona ia aauina atu lea o ni sāvali a o mamao lava, ma talosaga atu mo le filemu.+ 33  Ia outou mautinoa, e lē mafai ona avea se tasi o outou ma oʻu soo pe afai e lē tuua ana mea uma.+ 34  “O le mea moni, e lelei le masima. Ae afai e magalo le masima, e faapefea ona toe faamāi?+ 35  E lē toe aogā mo le eleele po o se faalelei eleele.* E lafoina i fafo e tagata. O lē ua iai taliga e faalogo ai, inā faalogo mai ia o ia.”+

Faamatalaga Pito i Lalo

Tagaʻi i le Faaopoopoga e 10.
I le gagana Eleni, o “otaota o manu.”