Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Levitiko 26:1-46

26  “ ‘Aua tou te faia mo outou+ ni atua e lē aogā, aua tou te faatūina se tupua ua tā+ po o se poutū paia* mo outou, aua foʻi tou te faia se maa ua teuteuina+ i lo outou atunuu ina ia ifo atu i ai;+ auā o aʻu o Ieova o lo outou Atua.  Ia outou tausia oʻu sapati+ ma matuā faaaloalo i loʻu faleʻie paia. O aʻu o Ieova.  “ ‘Pe afai tou te savavali pea i aʻu tulafono ma tausia aʻu poloaʻiga ma outou faia ia mea,+  ona ou faatotō ifo lea o le timu iā te outou i le taimi e tatau ai,+ e fua mai ai le laueleele,+ ma e fua mai foʻi laau o le fanua.+  E oo atu lava le soliga o a outou saito* i le taimi e aoina ai a outou vine, e oo atu foʻi le aoina o a outou vine i le taimi e lūlū ai fatu; e tou te aai i a outou meaʻai ma maoona ai,+ ma e tou te nonofo i lo outou fanua ma le saogalemu.+  Ou te tuuina le filemu i le atunuu+ ma e tou te taooto e aunoa ma se isi e faamataʻu mai iā te outou;+ ou te taofia manufeʻai o le atunuu+ mai i le osofaʻia o outou, ma e leai se tasi e faasagatau mai ma le pelu iā te outou.+  E tou te tuliloa i o outou fili,+ ma e tou te faatoʻilaloina i latou i le pelu.  E tuliloa le toʻaselau e le toʻalima o outou, e tuliloa le toʻasefulu afe e le toʻaselau o outou, ma e faatoʻilaloina o outou fili i o outou luma i le pelu.+  “ ‘Ou te liliu atu iā te outou,+ ou te faauluolaina outou ma faatoʻateleina,+ ou te tausia foʻi laʻu feagaiga ma outou.+ 10  E tou te aai lava mai i fuata tuai o le tausaga ua mavae,+ ma e tou te aumaia i fafo le fuata tuai ina ia teu ai le fuata fou i le fale. 11  Ou te tuuina loʻu faleʻie paia i le ogatotonu o le mea tou te nonofo ai,+ ma ou te lē ʻinoʻino iā te outou.+ 12  Ou te savali faatasi ma outou ma faailoa atu iā te outou o aʻu o lo outou Atua,+ ma tou te faaalia mai foʻi o outou o loʻu nuu.+ 13  O aʻu o Ieova o lo outou Atua, o lē na aumaia outou mai i le laueleele o Aikupito ina ia lē toe nofo pologa outou i tagata Aikupito,+ ma na ou gauia a outou amo ma mafai ai ona outou savavali saʻo ai.+ 14  “ ‘Peitaʻi, afai tou te lē faalogo mai iā te aʻu pe tausia foʻi ia poloaʻiga uma,+ 15  afai tou te teena aʻu tulafono,+ afai foʻi tou te ʻinoʻino i iʻuga o aʻu faamasinoga ma lē tausia ai aʻu poloaʻiga uma, ma oo ai ina outou solia laʻu feagaiga,+ 16  ona ou faia ai lea o ia mea iā te outou, ou te faasala outou i le tuuina atu iā te outou o ia mea e atuatuvale ai, o le māmāpala+ ma le maualuga o le fiva ia e māfua ai le tauaso,+ ma matuā vaivai ai le tino.+ E tou te lūlūina fua a outou fatu, auā e ʻaina e o outou fili.+ 17  Ou te teena outou, ma e faatoʻilaloina outou e o outou fili;+ e faasauā iā te outou o i latou e ʻinoʻino iā te outou,+ ma e tou te sosola ae e leai se tasi e tuliloaina outou.+ 18  “ ‘Afai e tou te lē faalogo mai iā te aʻu e ui i ia mea, ona ou faaopoopo faafitu ai lea ona aʻoaʻi iā te outou ona o a outou agasala.+ 19  Ou te gausia lo outou faamaualuga ua malosi tele, ou te faia ou lagi e pei o le uʻamea,+ ma lou lalolagi e pei o le ʻapamemea. 20  E faamaumau fua lo outou malosi, auā e lē fua mai ni fua i lo outou laueleele,+ ma e lē fua mai foʻi laau o le fanua.+ 21  “ ‘Ae afai o le a outou savavali pea e tetee mai iā te aʻu, ma mumusu e faalogo mai iā te aʻu, ona ou faaopoopo faafitu ai lea o mala iā te outou e tusa ma a outou agasala.+ 22  Ou te aauina atu iā te outou o manufeʻai,+ ia e toesea ai a outou fanau+ ma outou faanoanoa ai, e fano ai a outou manu lalata ma faaitiitia ai le aofaʻi o outou, ma e gaogao foʻi o outou ala.+ 23  “ ‘Peitaʻi, afai o le a outou lē taliaina laʻu aʻoaʻiga+ e ala i ia mea, ma outou savavali pea e tetee mai iā te aʻu, 24  a o aʻu, e ao ona ou savali e tetee atu iā te outou;+ o aʻu foʻi, o le a ou taia faafitu outou ona o a outou agasala.+ 25  O le a ou faaoo iā te outou le pelu e taui+ atu ai ona o lo outou solia o le feagaiga;+ e tou te lalafi lava i o outou aai, ae ou te auina atu le faamaʻi iā te outou,+ ma e tuuina atu foʻi outou i lima o outou fili.+ 26  Pe a uma ona ou gauia o outou tootoo ia e tautau ai falaoa lapotopoto,+ ona tao lea e fafine e toʻasefulu a outou falaoa i le ogaumu e tasi, ma tufatufa atu e tusa ma le mamafa o le falaoa;+ e tou te aai ae tou te lē maoona.+ 27  “ ‘Afai e tou te lē faalogo mai lava iā te aʻu e ui i ia mea, ma outou savavali pea e tetee mai ai iā te aʻu,+ 28  ona ou savali lea ma tetee atu iā te outou ma le ita,+ ma ou te aʻoaʻia faafitu outou ona o a outou agasala.+ 29  O le a outou aai i tino o o outou atalii, ma e tou te aai foʻi i tino o o outou afafine.+ 30  O le a ou faaumatia a outou mea maualuluga paia+ ma aveesea a outou fata faitaulaga e mū ai mea manogi, ou te lafo o outou tino oti i luga o tino o a outou tupua inosia;+ ou te ʻinoʻino foʻi iā te outou.+ 31  Ou te tuuina atu foʻi o outou aai i le pelu+ ma faatafunaina ai a outou mea paia,+ e lē oo mai foʻi iā te aʻu le manogi o mea manogi e faamalieina ai.+ 32  A o aʻu, ou te matuā faatafunaina le laueleele,+ e matuā ofo foʻi o outou fili o ē e nonofo ai.+ 33  Ou te faataapeapeina outou i atunuu,+ ou te seʻi aʻe le pelu e tuliloa atu iā te outou;+ e faatafunaina lo outou atunuu,+ ma e faatamaʻia o outou aai. 34  “ ‘O lea taimi, o le a faaatoatoaina ai le totogi o sapati o le laueleele i aso uma e gaogao ai, pe a outou iai i le laueleele o o outou fili. I lenā taimi o le a tausia e le laueleele le sapati, auā e ao ona faaatoatoaina o totogi o ona sapati.+ 35  O ona aso uma e gaogao ai e tausia ai le sapati, ona e leʻi tausia le sapati i le taimi o o outou sapati, a o outou nonofo ai. 36  “ ‘A o i latou o totoe iā te outou,+ o le a ou faavaivaia o latou loto i atunuu o o latou fili; o le a tuliloa i latou e le gasē o se laulaau ua lelea, e sosola foʻi i latou e pei ona sosola o tagata mai i le pelu, e paʻuʻū e aunoa ma se tasi e tuliloaina.+ 37  O le a paʻuʻū foʻi i latou o le tasi i luga o le isi e peiseaʻī ua i luma o le pelu ae leai se isi o tuliloaina, e lē mafai ona outou tetee atu i o outou fili.+ 38  O le a fano foʻi outou i isi atunuu,+ ma o le a outou feoti ai i le laueleele o o outou fili. 39  A o i latou ua totoe iā te outou, o le a faaumatia+ i latou ona o a latou agasala i le atunuu o o outou fili. O le a tupu lenei mea, ona o agasala a o latou tamā,+ o le a faaumatia foʻi i latou e pei o o latou tamā. 40  O le a latou taʻutino mai a latou agasala,+ ma agasala a o latou tamā i lo latou lē faamaoni, ua latou lē faamaoni ai iā te aʻu, ma latou savavali e tetee mai iā te aʻu.+ 41  A o aʻu, ua ou savali ma tetee atu iā i latou,+ ma o le a ou aumaia i latou i le laueleele o o latou fili.+ “ ‘I lenā taimi atonu o le a iʻu ina faamaulalo+ ai o latou loto+ e lē o peritomeina, ma totogi atu a latou agasala. 42  Ona ou manatua lea o laʻu feagaiga ma Iakopo;+ o laʻu feagaiga ma Isaako,+ atoa ma laʻu feagaiga ma Aperaamo+ ou te manatua ai, ou te manatua ai foʻi le laueleele. 43  I lea taimi a o tuulafoaʻiina e i latou le laueleele, a o faaatoatoaina foʻi le totogi o ona sapati,+ ma faatafunaina e aunoa ma i latou, ma ua latou totogi atu a latou agasala,+ auā foʻi ua latou teena iʻuga o aʻu faamasinoga,+ ma ʻinoʻino i aʻu tulafono.+ 44  E ui i nei mea uma, a o iai pea i latou i le laueleele o o latou fili, ou te lē tuulafoaʻia i latou+ pe ʻinoʻino iā i latou+ ma ou faaumatia ai i latou, ma faalēaogāina ai laʻu feagaiga+ ma i latou; auā o aʻu o Ieova o lo latou Atua. 45  Ona o i latou, ou te manatua ai le feagaiga na faia ma o latou augātamā,+ o ē na ou aumaia mai i le atunuu o Aikupito i luma o isi atunuu,+ ina ia faailoa atu iā i latou o aʻu o lo latou Atua. O aʻu o Ieova.’ ” 46  O aiāiga ma iʻuga o aʻu faamasinoga+ ma tulafono ua faataatia e Ieova i le va o ia ma le fanauga a Isaraelu, i le Mauga o Sinai e ala mai iā Mose.+

Faamatalaga Pito i Lalo

E faasino atu i maa na faatū e tagata. Ua fai ma mea e tapuaʻi ai tagata faapaupau.
Pe e faasino atu foʻi i le karite (barley).