Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Levitiko 21:1-24

21  Ua toe fetalai mai Ieova iā Mose: “Ia e fai atu i ositaulaga o atalii ia o Arona, ma e ao ona e fai atu iā i latou, ‘Aua neʻi faaleaga e se tasi o ia lava i se tagata ua oti o le nuu.*+  E mafai ona faaleagaina o ia lava ona o se tasi o ona toto ma aano o lē e vavalalata la laʻua faiā, o lona tinā, o lona tamā, o lona atalii, o lona afafine, o lona uso,  ma lona tuafafine, o le teine muli e la te nonofo faatasi, o lē e leʻi nofotane, e mafai ona leaga ai o ia lava ona o lona tuafafine.  Aua neʻi leaga o ia lava ona o se fafine mai i ona tagata ua iai sana tane, ina ia lē faalumaina ai o ia.  Aua neʻi o latou sele mamā o latou ulu,+ aua foʻi neʻi o latou tafi pito uma o a latou ʻava,+ ma aua neʻi o latou selei i o latou tino.+  E ao ona paia i latou mo lo latou Atua,+ ma aua neʻi o latou faalumaina le suafa o lo latou Atua,+ auā o i latou e faia taulaga i le afi iā Ieova, o le falaoa a lo latou Atua;+ e ao ona paia lava i latou.+  Aua neʻi o latou faaipoipo atu i se fafine talitane+ po o se fafine ua faaleagaina lona teine muli; aua foʻi neʻi o latou faaipoipo+ atu i se fafine ua teteʻa+ ma lana tane, auā e paia le ositaulaga i lona Atua.  E ao ona e faapaia o ia+ auā e avatu e ia le falaoa a lou Atua. E tatau ona paia o ia iā te oe,+ auā o aʻu o Ieova, o lē ua faapaiaina outou, e paia lava aʻu.+  “ ‘Afai e faaleagaina e le afafine o le ositaulaga o ia lava ina ua fai o ia ma fafine talitane, ua ia faalumaina la lona tamā. E ao ona fasiotia o ia, ma susunu i le afi.+ 10  “ ‘A o le ositaulaga sili mai i ona uso, o lē na liligi+ i lona ulu le suāuu e faauu ai, ma o lē na tuu atu i ai le pule* e ofu i ofu paia,+ aua neʻi lē teuina lona lauulu,+ ma aua foʻi neʻi saeia ona ofu.+ 11  Aua neʻi alu atu o ia i se tino oti.+ Aua neʻi faaleagaina o ia lava ona o lona tamā po o lona tinā. 12  Aua neʻi ulufafo atu o ia mai i le faleʻie paia ma aua foʻi neʻi faaleagaina e ia le faleʻie paia o lona Atua,+ talu ai ua i ona luga le faailoga o le tuuina atu, o le suāuu lea e faauuina ai a lona Atua.+ O aʻu o Ieova. 13  “ ‘Ae e ao iā te ia ona faiavā i se teine muli.+ 14  Aua neʻi faiavā o ia i se fafine ua oti lana tane, po o se fafine ua teteʻa ma lana tane, ma lē ua faaleagaina lona teine muli, po o se talitane, ae e ao ona ia faiavā i se teine muli mai i ona tagata. 15  Aua neʻi leaga lana fanau i le nuu+ ona o ia, auā o aʻu o Ieova o lē ua faapaiaina o ia.’ ”+ 16  Ua fetalai mai pea Ieova iā Mose e faapea: 17  “Ia e fai atu iā Arona e faapea, ‘E lē mafai e se tasi o lau fanau e oo lava i o latou tupulaga o loo mulimuli mai, o lē e iai se faalētonu+ i lona tino, ona faalatalata mai e avatu le falaoa a lona Atua.+ 18  Afai ua iai se tasi e iai se faalētonu i lona tino, aua lava neʻi faalatalata mai lea tagata: o se tane e tauaso, pe vae piʻo, pe e pū lona isu, po o ni mea e faalēgatusa i lona tino,+ 19  po o se tane ua gau le vae pe gau le lima, 20  pe tua piʻo, pe tino vale, pe leaga ona mata, pe poʻupoʻua le tino, pe lafā po ua manuʻa ona fuāmanava.+ 21  Aua neʻi faalatalata mai se tagata o le fanau a Arona, o lē ua iai se faalētonu i lona tino e faia se taulaga iā Ieova i le afi.+ Ua iai le faalētonu i lona tino. Aua neʻi faalatalata mai o ia e avatu le falaoa a lona Atua.+ 22  E mafai ona ʻai o ia mai i le falaoa a lona Atua mai i mea e sili ona paia,+ ma mai i mea paia.+ 23  Peitaʻi e lē mafai ona ulu atu o ia i totonu e latalata atu i le ʻie puipui+ ma e lē mafai ona ia faalatalata atu i le fata faitaulaga,+ ona ua iai se mea e faalētonu i lona tino;+ ma aua neʻi faaleagaina e ia aʻu mea paia,+ auā o aʻu o Ieova o lē ua faapaiaina i latou.’ ”+ 24  Ua faapea lava ona fai atu o Mose iā Arona, ma ona atalii, ma le fanauga uma a Isaraelu.

Faamatalaga Pito i Lalo

E leaga le ositaulaga pe a paʻi atu i se tino oti pe faavauvau mo lē ua maliu.
I le gagana Eperu, “ia faatumu le lima i le pule” ma e faasino atu i le tuu atu o le pule atoa i lima o ē e auauna o ni ositaulaga.