Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Levitiko 20:1-27

20  Ua fetalai mai foʻi Ieova iā Mose e faapea:  “Ia e fai atu i le fanauga a Isaraelu, ‘O so o se tasi o le fanauga a Isaraelu, ma so o se tagata ese o lē e aumau i Isaraelu, e avatu* se tasi o lana fanau iā Moloka,+ ia fasiotia lava o ia. E ao i tagata o le atunuu ona fetogi o ia i maa ia oti ai.  A o aʻu, ou te teena lenā tagata, ou te fasiotia o ia+ auā ua ia avatu nisi o lana fanau iā Moloka, ina ia faaleagaina ai loʻu faleʻie paia+ ma faalumaina ai loʻu igoa paia.+  Afai ua loto i ai tagata o le atunuu e liliuese o latou mata mai i lenā tagata a o ia avatu nisi o lana fanau iā Moloka, ma latou lē fasiotia o ia,+  ona ou teena lea o lenā tagata ma lona aiga,+ ou te fasiotia lava o ia ma i latou uma ua lē faamaoni faatasi ma ia, i le faia o le faitaaga+ ma Moloka.  “‘A o lē e liliu atu i ē e saʻili i agaga+ ma ē e vavalo i mea e tutupu+ ina ia faitaaga faatasi ai ma i latou, ou te teena lea tagata ma fasiotia o ia.+  “‘E ao ona vavaeese outou o ni tagata mamā ma ia paia outou,+ auā o aʻu o Ieova o lo outou Atua.  Ia outou tausia aʻu tulafono ma faia.+ O aʻu o Ieova o lē e faapaiaina outou.+  “‘Afai e iai se tagata e upuleaga i lona tamā ma lona tinā,+ e ao ona fasiotia lava o ia.+ O lona tamā ma lona tinā ia ua ia upuleaga i ai. Ua i ona lava luga lona toto.+ 10  “‘Afai e feusuaʻi se tane ma le avā a se isi tamāloa, ua mulilua o ia ma le avā a lona uso a tagata.+ E ao ona fasiotia lava o ia, o le tane mulilua atoa ma le fafine mulilua.+ 11  O le tane e momoe ma le avā a lona tamā, ua ia faalumaina ai lona tamā.+ E ao ona fasiotia lava i laʻua. Ua i o laʻua lava luga o la toto. 12  Afai e momoe se tane ma le avā a lona atalii, e ao ona fasiotia lava i laʻua.+ Ua la solia le tū e masani ai. Ua i o laʻua lava luga o la toto.+ 13  “‘Afai e momoe se tane ma se isi tane e pei ona momoe ma le fafine, ua la faia le mea e inosia.+ E ao ona fasiotia lava i laʻua. Ua i o laʻua lava luga o la toto. 14  “‘Afai e fai avā se tane i se fafine, ae toe feusuaʻi ma le tinā o le fafine, o se amioga matagā tele lea.+ E ao ona fasiotia o ia ma i laʻua ma susunu ai i le afi,+ ina ia lē faaauau ai pea ona iai amioga matagā+ iā te outou. 15  “‘Afai e faamatuu atu e se tane lona sua i se manu,+ e ao ona fasiotia lava o ia, ma e ao foʻi ona outou fasimate le manu. 16  Afai e alu atu se fafine i se manu ina ia la+ feusuaʻi, e ao ona fasiotia le fafine ma fasimate le manu. E ao ona fasiotia lava i laʻua. Ua i o laʻua lava luga o la toto. 17  “‘Afai e tago se tane i lona tuafafine, o le afafine o lona tamā po o le tama teine a lona tinā, ma iloa lona telenoa ma iloa foʻi e le fafine lona telenoa, o se mea e māsiasi ai.+ E ao ona fasiotia i laʻua i luma o tagata o lo latou nuu. Ua ia faatelenoa lona tuafafine. E tatau ona ia tali atu mo lana agasala. 18  “‘Afai e feusuaʻi se tane ma se fafine a o fai lona maʻi masina, ma ua ia faatelenoa iā te ia, ua lē amanaʻia e i laʻua le alu o lona palapala.+ E tatau ona fasiotia i laʻua uma. 19  “‘Aua foʻi e te faatelenoa i le uso o lou tinā+ ma le tuafafine o lou tamā,+ auā o le faatelenoa lea e le tagata i ona lava toto ma aano.+ E tatau ona la tali atu mo la laʻua agasala. 20  O le tane e feusuaʻi ma le avā a le uso o lona tamā, e faalumaina ai le uso o lona tamā.+ E ao ona la tali atu mo la laʻua agasala. E tatau ona fasiotia i laʻua ae leʻi maua ni fanau.+ 21  Afai e faaipoipo se tane i le avā a lona uso, o se mea e inosia lea.+ Ua ia faalumaina lona uso. Ia leai sa laʻua fanau. 22  “‘E ao ona outou tausia aʻu tulafono+ uma ma iʻuga o aʻu faamasinoga+ uma ma ia faia, neʻi luai mai outou e le laueleele lea ou te avatu i ai outou tou te nonofo ai.+ 23  Aua tou te mulimuli i tulafono a nuu ia ou te tuliesea mai i o outou luma,+ auā ua latou faia ia mea uma ma ua ou ʻinoʻino i ai.+ 24  O le mea lea ou te fai atu ai iā te outou:+ “E maua lava e outou lo latou laueleele, a o aʻu, ou te avatu lenei laueleele iā te outou e fai mo outou, o le laueleele o loo tafe ai le suāsusu ma le meli.+ O aʻu o Ieova o lo outou Atua, o lē ua vavaeeseina outou mai i isi nuu.”+ 25  E ao ona outou faaeseese le manu e mamā mai i le manu e lē mamā, ia faaeseese foʻi le manufelelei e lē mamā mai i le manufelelei e mamā;+ ma aua neʻi avea outou ma ē ua inosia+ ona o se manu po o se manufelelei, po o so o se mea e fealuaʻi i luga o le laueleele, ia ua ou vavaeesea mai iā te outou e ala i le taʻu atu e lē mamā ia mea. 26  E ao ona paia outou mo aʻu,+ auā o aʻu o Ieova, e paia lava aʻu;+ ua ou vavaeese outou mai i tagata e fai ma oʻu nuu.+ 27  “‘A o se tane po o se fafine ua iai le mana faataulāitu, po o le mana e faia ai valovaloga,+ ia fasiotia lava ia.+ E ao ona latou fetogi i latou i maa ina ia feoti ai. Ua i o latou lava luga o latou toto.’”+

Faamatalaga Pito i Lalo

Atonu na aofia ai i lenei mea le avatu o se tasi o le fanau e osi ai le taulaga.