Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Levitiko 19:1-37

19  Ua toe fetalai mai Ieova iā Mose e faapea:  “Ia e fai atu i le faapotopotoga atoa o le fanauga a Isaraelu, ia e faapea atu iā i latou, ‘E ao ona paia outou,+ auā o aʻu o Ieova o lo outou Atua, e paia lava aʻu.+  “ ‘Ia taʻitasi outou ma mataʻu i lona tinā ma lona tamā+ ma e ao ona outou tausia oʻu sapati.+ O aʻu o Ieova o lo outou Atua.  Aua tou te liliu atu i atua e lē aogā+ ma aua neʻi outou faia mo outou ni atua uʻamea.+ O aʻu o Ieova o lo outou Atua.  “ ‘Afai e tou te faia se taulaga iā Ieova,+ o se taulaga faifaatasi, e ao ona faia lea taulaga ina ia talileleia ai outou e le Atua.+  E mafai ona outou aai i a outou taulaga i le aso ua fai ai po o le aso e sosoo ai, ae o mea e totoe i le aso lona tolu, ia susunuina i le afi.+  Afai e ʻai lava i le aso lona tolu, o se mea matuā leaga lea.+ E lē taliaina lea mea.+  O lē e ʻai ai i lea taulaga e tali atu o ia i lana agasala,+ auā ua ia faaleagaina se mea paia a Ieova; e fasiotia lava lea tagata.  “ ‘Pe a outou selesele fua o lo outou laueleele, e lē tatau ona e selesele uma pito o le fanua, e lē tatau foʻi ona e ao mai fatu o lau seleselega ua paʻuʻū i le eleele.+ 10  E lē tatau foʻi ona e ao mai mea o totoe+ o lou togāvine, e lē tatau ona e ao mai vine ua paʻuʻū o lou togāvine. E tatau ona e tuu ia mea mo lē ua puapuagatia ma le tagata ese e aumau.+ O aʻu o Ieova o lo outou Atua. 11  “ ‘Aua tou te gaoi,+ aua tou te taufaasesē,+ ma aua foʻi neʻi faapiʻopiʻo se tasi o outou i lona tuaoi.+ 12  Aua tou te tautō pepelo+ i loʻu igoa, neʻi outou faaleagaina le igoa o lo outou Atua. O aʻu o Ieova. 13  Aua neʻi e fai mea faapiʻopiʻo i lou uso a tagata,+ ma aua e te faomea.+ Aua neʻi e tuua le totogi o se tagata na e faafaigaluegaina mo le pō atoa seʻia oo i le taeao.+ 14  “ ‘Aua e te fetuu i le tagata logonoa, aua e te tuu se mea i luma e faalavelave ai i le tagata tauaso;+ ae ia e mataʻu i lou Atua.+ O aʻu o Ieova. 15  “ ‘Aua tou te faia faamasinoga lē tonu. Aua e te faaʻauʻau+ atu i lē ua faatauvaa, ma aua e te faasili le tagata mauʻoa.+ E ao ona e faamasino ma le tonu lou tuaoi. 16  “ ‘Aua e te fealuaʻi solo i lou nuu e faia ai ni tala taufaaleaga.+ Aua neʻi e lamalama i se mea e aveesea ai le ola o lou uso a tagata.+ O aʻu o Ieova. 17  “ ‘Aua e te ʻinoʻino i lou uso i lou loto.+ E ao ona e matuā aʻoaʻi atu i lou tuaoi,+ neʻi e agasala faatasi ma ia. 18  “ ‘Aua e te tauimasui+ pe ita faamoemoe i fanau a lou nuu;+ ia e alofa atu i lou uso a tagata e pei o oe lava.+ O aʻu o Ieova. 19  “ ‘Ia outou tausia aʻu tulafono: Aua e te faafeusuaʻi manu lalata o ituaiga eseese e lua. Aua e te totō fatu o ituaiga eseese+ e lua i lou fanua, aua foʻi e te ofu i se ofu ua lalaga i filo o ituaiga eseese e lua, e faafefiloi faatasi.+ 20  “ ‘Afai e momoe se tamāloa ma se fafine ma ua alu i ai lona sua, a o ia o se auauna fafine ua filifilia e fai ma avā a se isi tamāloa, ae e leʻi uma lava ona totogi lona tau* pe tuusaʻoloto foʻi o ia, e tatau ona faasalaina. E lē tatau ona fasiotia i laʻua, auā e leʻi tuusaʻoloto le fafine. 21  E ao i le tamāloa ona aumaia lana taulaga o le nofosala iā Ieova i le faitotoʻa o le faleʻie o le feiloaʻiga, o se mamoe poʻa e fai ai le taulaga o le nofosala.+ 22  E ao i le ositaulaga ona faia le togisala mo ia i le mamoe poʻa, lea e fai ai le taulaga o le nofosala i luma o Ieova ona o lana agasala na fai; ona faamagaloina ai lea o lana agasala na fai.+ 23  “ ‘Afai tou te ō atu i le laueleele, ma outou totō ai so o se laau e ʻaina, e ao foʻi ona outou manatu e lē mamā ona fua e pei o le “paʻu”* o se tane e leʻi peritomeina. E faaauau pea ona lē peritomeina iā te outou i tausaga e tolu. Aua tou te aai ai. 24  Ae i le tausaga lona fā, o le a paia ona fua uma,+ e avea ma taimi e matuā fiafia ai iā Ieova.+ 25  Ae o le tausaga lona lima tou te aai ai i ona fua, ona faateleina ai lea iā te outou o ona fua.+ O aʻu o Ieova o lo outou Atua. 26  “ ‘Aua neʻi outou aai i so o se mea faatasi ma le toto.+ “ ‘Aua tou te saʻili i ni faailoilo o mea o le a tutupu,+ aua foʻi tou te faia faiga faaagaga.+ 27  “ ‘Aua tou te sele faapupuu autafa ma faataamilomilo i le isi pito o outou ulu, aua foʻi neʻi e faasaunoa* i lau pito ʻava.+ 28  “ ‘Aua tou te selei i o outou tino ona o se tasi ua oti,+ aua foʻi tou te tā se peʻa i o outou tino. O aʻu o Ieova. 29  “ ‘Aua e te faaleagaina lou afafine e ala i le faia o ia o se talitane,+ ina neʻi masani le atunuu i amioga faatalitane ma tumu ai le atunuu i amioga lē mamā.+ 30  “ ‘E ao ona outou tausia oʻu sapati,+ ma e ao ona outou matuā faaaloalo i loʻu faleʻie paia.+ O aʻu o Ieova. 31  “ ‘Aua tou te liliu atu i ē e saʻili i agaga,*+ aua foʻi tou te fesili atu i ē e vavalo i mea e tutupu,+ neʻi lē mamā ai outou ona o i latou. O aʻu o Ieova o lo outou Atua. 32  “ ‘Ae ia e tulaʻi i luma o ē ua ulusinā,+ ia e faaaloalo i le tagata ua loa le soifua,+ ma ia e mataʻu i lou Atua.+ O aʻu o Ieova. 33  “ ‘Afai e aumau se tagata ese faatasi ma oe i lo outou atunuu, aua neʻi outou agaleaga atu iā te ia.+ 34  Ia pei le tagata ese ua aumau faatasi ma outou o se tagatānuu iā te outou; ma e ao ona e alofa iā te ia e pei lava o oe iā te oe,+ auā na outou nonofo aumau foʻi i le atunuu o Aikupito.+ O aʻu o Ieova o lo outou Atua. 35  “ ‘Aua neʻi outou faia ni faiga faapiʻopiʻo i faamasinoga,+ i le fuaina o le umi o se mea, i le fuaina o le mamafa,+ po o le fuaina o mea faasuavaia. 36  E ao ona saʻo a outou fua faatautau,+ e faapea foʻi maa e fua ai le mamafa, ma e ao ona saʻo le efa ma le sinu.* O aʻu o Ieova o lo outou Atua, o lē na aumaia outou mai i le atunuu o Aikupito. 37  E tatau ona outou tausia aʻu tulafono ma iʻuga o aʻu faamasinoga uma, ma e tatau ona outou faia.+ O aʻu o Ieova.’ ”

Faamatalaga Pito i Lalo

Po o lona “togiola.”
 O le “paʻu” lenei e faasino atu i le paʻu o totogasā o tamāloloa.
E foliga mai e faatatau lenei faatonuga i ni faiga faapaupau ae e lē faapea e sā ona sele faalelei a latou ʻava.
O se tagata e faaaogā e temoni e faaauala mai ai a latou valovaloga.
O le efa ma le sinu ua saʻo e faasino atu i ipu e fua ai mea.