Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Levitiko 15:1-33

15  Ua fetalai mai pea Ieova iā Mose ma Arona e faapea:  “Ia fai atu i le fanauga a Isaraelu, ma e ao ona oulua fai atu iā i latou, ‘Afai e sau se vavale+ mai i totogasā o se tane, e lē mamā lea mea.  E lē mamā o ia ona ua sau le vavale mai iā te ia: E tusa pe sau mai i ona totogasā, po ua punitia ona totogasā ona o le vavale ua sau ai, e lē mamā ai o ia.  “‘E lē mamā so o se moega e taoto ai lē ua sau ai le vavale, ma e lē mamā foʻi so o se mea e saofaʻi ai o ia.  O se tagata e paʻi i lona moega e ao ona tatā ona ofu ma tāʻele i le vai, ma e lē mamā o ia seʻia oo i le afiafipō.+  O so o se tasi e nofo i luga o se mea na nofo ai lē ua sau ai le vavale, e ao ona tatā+ ona ofu ma tāʻele i le vai, ma e lē mamā o ia seʻia oo i le afiafipō.  O so o se tasi e paʻi i le tino o lē ua sau ai le vavale,+ e ao ona ia tatā ona ofu ma tāʻele i le vai, ma e lē mamā o ia seʻia oo i le afiafipō.+  Ae afai e feanu se tasi o lē ua sau ai le vavale i se tasi e mamā, e ao ona ia tatā ona ofu ma tāʻele i le vai, ma e lē mamā o ia seʻia oo i le afiafipō.  E lē mamā foʻi so o se nofoa o se manu+ na tiʻetiʻe ai lē ua sau ai le vavale. 10  O se tasi e paʻi i se mea na nofo ai o ia, e lē mamā seʻia oo i le afiafipō; o lē na te aveina na mea e ao ona tatā ona ofu ma tāʻele i le vai, ma e lē mamā o ia seʻia oo i le afiafipō. 11  O se tasi foʻi e paʻi i ai lē ua sau ai le vavale+ ae e leʻi fufuluina ona lima i le vai, e ao ona tatā ona ofu ma tāʻele i le vai, ma e lē mamā o ia seʻia oo i le afiafipō. 12  Afai e paʻi lē ua sau ai le vavale i se tanoa omea, e ao ona nutililiia;+ ma po o se tanoa laau,+ e ao ona fufulu i le vai. 13  “‘Afai ua uma ona sau o le vavale o lea tane, e ao ona ia faitau aso e fitu mo lona faamamāina,+ ona ia tatā lea o ona ofu ma tāʻele i le vaitafe;+ ona mamā ai lea o ia. 14  I le aso lona valu, e tatau ona ia ave mo ia ni manutagi+ se lua po o ni tamaʻi lupe se lua, ma e ao ona ia alu i luma o Ieova i le faitotoʻa o le faleʻie o le feiloaʻiga, ma avatu ai i le ositaulaga. 15  E osi e le ositaulaga le taulaga i ia mea, o le tasi mo le taulaga o agasala, a o le isi mo le taulaga mū;+ e fai e le ositaulaga le togisala mo ia i luma o Ieova, ona o le vavale ua sau mai iā te ia. 16  “‘Afai e sau le sua+ o se tane, e ao ona tāʻele lona tino atoa i le vai ma e lē mamā o ia seʻia oo i le afiafipō. 17  O se ofu foʻi po o so o se paʻu e alu i ai le sua, e ao ona tatā i le vai ma e lē mamā ai seʻia oo i le afiafipō.+ 18  “‘O se fafine foʻi e momoe ma se tane ma ua alu i ai le sua, e ao ona la tāʻeele i le vai ma e lē mamā+ ai seʻia oo i le afiafipō. 19  “‘Afai ua iai se mea ua sau mai i se fafine, ma o lenei mea e sau mai i lona tino o le toto lea,+ e ao ona faaauau ona lē mamā+ ona o lona maʻi masina+ i aso e fitu, o se tasi foʻi e paʻi iā te ia, e lē mamā ai seʻia oo i le afiafipō. 20  O se mea e taoto ai o ia, e lē mamā+ ona o lona maʻi masina, ma o mea uma lava e saofaʻi ai o ia, e lē mamā. 21  O se tasi e paʻi i lona moega, e ao ona tatā ona ofu ma tāʻele i le vai, ma e lē mamā o ia seʻia oo i le afiafipō.+ 22  O se tasi foʻi e paʻi i se mea na nofo ai o ia, e ao ona tatā ona ofu ma tāʻele i le vai, ma e lē mamā o ia seʻia oo i le afiafipō.+ 23  Afai na nofo le fafine i luga o le moega po o se isi lava mea ae paʻi+ atu i ai le tane, e lē mamā o ia seʻia oo i le afiafipō. 24  Pe afai e feusuaʻi lava le tane ma le fafine, ae alu ai le toto o lona maʻi masina ma oo atu i le tane,+ e lē mamā le tane i aso e fitu, atoa foʻi ma so o se moega e taoto ai o ia. 25  “‘Afai e alu le toto o se fafine mo le tele o aso+ ae lē o le taimi lea mo lona maʻi masina,+ pe afai foʻi e umi ona alu lona maʻi masina lea e lē mamā ai o ia, e pei o aso uma e alu ai lona toto, e faapea foʻi aso o lona maʻi masina, e lē mamā ai o ia. 26  O se moega e taoto ai o ia i aso o loo alu ai lona toto ae e lē o le taimi lea e alu ai, o le a pei lava o le moega i le taimi o lona maʻi masina,+ ma o so o se mea e saofaʻi ai o ia e lē mamā, e pei ona lē mamā o ia i le taimi o lona maʻi masina. 27  O se tasi e paʻi+ i ia mea e lē mamā ai, ma e ao ona ia tatā ona ofu ma tāʻele i le vai, ma e lē mamā o ia seʻia oo i le afiafipō. 28  “‘Ae afai ua uma le alu o lona toto ae e lē o le taimi lea e alu ai, e ao ona ia faitau aso e fitu mai i le aso na uma ai, a mavae lea ona mamā ai lea o ia.+ 29  I le aso lona valu, e tatau ona ia ave mo ia ni manutagi+ se lua po o ni tamaʻi lupe se lua, ma e ao ona ia avatu ai i le ositaulaga i le faitotoʻa o le faleʻie o le feiloaʻiga.+ 30  E osi e le ositaulaga le taulaga o agasala i le tasi manulele a o le isi e fai ai le taulaga mū;+ e fai e le ositaulaga le togisala+ mo ia i luma o Ieova, ona o le alu o lona toto ae e lē o le taimi lea e alu ai ma e lē mamā ai o ia. 31  “‘E ao ona oulua vāai ua taumamao le fanauga a Isaraelu mai i mea e lē mamā ai i latou, ina neʻi latou feoti ona ua lē mamā, auā ua latou faaleagaina loʻu faleʻie paia, lea e iai i le mea o loo latou nonofo ai.+ 32  “‘O le tulafono lenei e faatatau i le tane ua sau le vavale+ mai iā te ia, ma le tane e sau ai le sua+ mai iā te ia, ma ua lē mamā ai o ia; 33  ma le fafine ua lē mamā ona o lona maʻi masina,+ ma so o se tasi e sau se mea+ mai i lona tino e tusa lava po o le tane po o le fafine, po o se tamāloa ua feusuaʻi ma se fafine ua lē mamā.’”

Faamatalaga Pito i Lalo