Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Levitiko 14:1-57

14  Ua toe fetalai mai Ieova iā Mose e faapea:  “O le tulafono lenei i le tagata lepela+ pe a taʻu atu ua mamā o ia, i le taimi e avatu ai o ia i le ositaulaga.+  E ao i le ositaulaga ona alu atu i tua o le togālauapi ma e ao ona vaai i ai le ositaulaga; afai ua teʻa+ le maʻi lepela mai i le tagata na maua i le lepela,  ona faatonuina lea o ia e le ositaulaga ia ave ni manulele ola se lua e mamā,+ se lālā arasi,+ o mea ua vali mūmū sesega+ ma le isopo+ mo lona faamamāina.  Ona poloaʻi atu lea o le ositaulaga ia fasia se manulele i luga o le tanoa omea ua iai vai+ mai i le vaipuna.  A o le manulele o loo ola e na te avatu ma le lālā arasi, o le mea ua vali mūmū sesega, ma le isopo ma lolō ia mea ma le manulele o loo ola i le toto o le manulele lea na fasia i luga o le vai mai i le vaipuna.  E ao ona ia sausau+ faafitu+ i luga o lē o loo faamamāina mai i le lepela, e ao foʻi ona ia taʻu atu ua mamā o ia,+ ma e na te auina atu le manulele o loo ola i le fanua.+  “E ao i lē o loo faamamāina ona tatā ona ofu,+ ia tafi ona fulufulu uma ma tāʻele+ i le vai, ona mamā ai lea, mulimuli ane ona sau ai lea o ia i le togālauapi. Ae e ao ona ia nofo i fafo o lona faleʻie i aso e fitu.+  A oo i le aso lona fitu, e ao ona tafi ona lauulu uma i lona ulu,+ ma lana ʻava, ma ona fulufulu mata. E ao ona ia tafi i ona fulufulu uma, ma tatā ona ofu, ma tāʻele lona tino i le vai; ona mamā ai lea o ia. 10  “O le aso lona valu+ e na te ave ai ni tamaʻi mamoe poʻa+ se lua e matuā lelei lava, o se tamaʻi mamoe fafine e matuā lelei lava e faatoʻā atoa le tausaga, o le tolu vaesefulu o le efa o le falaoamata lelei ua iai sina suāuu, e fai ma taulaga i meaʻai,+ ma le fua e tasi o le loka* o le suāuu;+ 11  e ao i le ositaulaga o lē na te taʻu atu ua mamā o ia, ona avatu lē o loo faamamāina ma ia mea i luma o Ieova, i le faitotoʻa o le faleʻie o le feiloaʻiga. 12  E ave e le ositaulaga le tamaʻi mamoe poʻa e tasi, ma avatu e fai ai le taulaga o le nofosala,+ faatasi ma le fua e tasi o le loka+ o le suāuu, ma lūlū i le isi itu ma le isi itu, e fai ma taulaga lūlū+ i luma o Ieova. 13  E ao ona ia fasi le tamaʻi mamoe poʻa i le nofoaga+ e masani ona fasi ai manu mo taulaga o agasala ma le taulaga mū i se nofoaga paia,+ auā e pei ona fai ma le ositaulaga+ le taulaga o agasala, e faapena foʻi le taulaga o le nofosala. O le mea lea e sili ona paia. 14  “Ona ave lea e le ositaulaga sina toto o le taulaga o le nofosala, ma e tuu e le ositaulaga i le lautaliga o le taliga taumatau o lē o loo faamamāina, i luga foʻi o le limamatua o lona lima taumatau, ma le vaematua o lona vae taumatau.+ 15  E ao i le ositaulaga ona ave sina vaega o le fua o le loka+ o le suāuu, ma sasaa i luga o le alofilima o lona lima tauagavale. 16  E ao i le ositaulaga ona fufui le tamatamaʻilima o lona lima taumatau i le suāuu ua i le alofilima o lona lima tauagavale, ma sausau faafitu+ i lona tamatamaʻilima le suāuu i luma o Ieova. 17  A o le suāuu ua totoe i le alofilima o le ositaulaga, e na te tuuina sina vaega i le lautaliga o le taliga taumatau o lē o loo faamamāina, i luga o le limamatua o lona lima taumatau, i luga o le vaematua o lona vae taumatau, ma i luga o le toto o le taulaga o le nofosala.+ 18  A o le suāuu ua totoe i le alofilima o le ositaulaga, e na te tuuina i luga o le ulu o lē o loo faamamāina, ma e faia e le ositaulaga le togisala+ mo ia i luma o Ieova. 19  “E osi e le ositaulaga le taulaga o agasala+ ma fai le togisala mo lē o loo faamamāina mai i lona tulaga lē mamā, ae mulimuli ane e na te fasi le manu e fai ai le taulaga mū. 20  E ao i le ositaulaga ona fai le taulaga mū ma le taulaga i meaʻai+ i luga o le fata faitaulaga, ma e faia e le ositaulaga+ le togisala mo ia;+ ona mamā ai lea o ia.+ 21  “Ae afai e lē tagolima+ o ia ma lē gafatia ia mea,+ e ao ona ia ave se tamaʻi mamoe poʻa e fai ma taulaga o le nofosala, ina ia lūlūina e fai ai le togisala mo ia, atoa ma le tasi vaesefulu o le efa o le falaoamata lelei ua iai sina suāuu e fai ma taulaga i meaʻai, ma le fua o le loka o le suāuu, 22  ma manutagi+ e lua po o tamaʻi lupe e lua e tusa ma mea e gafatia e ia, e ao ona fai le tasi o le taulaga o agasala, a o le isi e fai ma taulaga mū. 23  O le aso lona valu+ e ao ona ia aumai ai ia mea i le ositaulaga i le faitotoʻa o le faleʻie o le feiloaʻiga,+ i luma o Ieova ina ia taʻu atu ai ua mamā+ o ia. 24  “E ao i le ositaulaga ona ave le tamaʻi mamoe poʻa o le taulaga o le nofosala+ ma le fua o le loka o le suāuu, e ao foʻi ona ia lūlū ia mea i le isi itu ma le isi itu e fai ma taulaga lūlū i luma o Ieova.+ 25  E na te fasia le tamaʻi mamoe poʻa o le taulaga o le nofosala, ona ave lea e le ositaulaga sina toto o le taulaga o le nofosala, ma tuu i le lautaliga o le taliga taumatau o lē o loo faamamāina, i luga foʻi o le limamatua o lona lima taumatau, ma le vaematua o lona vae taumatau.+ 26  E liligi foʻi e le ositaulaga sina suāuu i le alofilima o lona lima tauagavale.+ 27  E ao i le ositaulaga ona sausau+ faafitu i luma o Ieova i le tamatamaʻilima o lona lima taumatau sina vaega o le suāuu ua i le alofilima o lona lima tauagavale. 28  E tuu e le ositaulaga sina vaega o le suāuu ua i lona alofilima i luga o le lautaliga o le taliga taumatau o lē o loo faamamāina, i luga o le limamatua o lona lima taumatau, i luga o le vaematua o lona vae taumatau, ma i luga o le mea ua iai le toto o le taulaga o le nofosala.+ 29  A o le suāuu ua totoe i le alofilima o le ositaulaga, e na te tuuina i luga o le ulu+ o lē o loo faamamāina, ina ia faia ai le togisala mo ia i luma o Ieova. 30  “E fai taulaga le ositaulaga i le manutagi e tasi po o le tamaʻi lupe lea ua ia gafatia,+ 31  o le tasi o ia mea ua ia gafatia e fai ai le taulaga o agasala,+ a o le isi e fai ai le taulaga mū+ faatasi ma le taulaga i meaʻai; ma e ao i le ositaulaga ona faia le togisala+ mo lē o loo faamamāina i luma o Ieova. 32  “O le tulafono lenei mo lē na maua i le maʻi o le lepela, ae na te lē gafatia mea e tatau mo le taʻuina atu ua mamā o ia.” 33  Ona fetalai mai lea o Ieova iā Mose ma Arona e faapea: 34  “Afai tou te ō atu i le atunuu o Kanana,+ lea ou te avatu iā te outou e fai mo o outou laufanua,+ ma ou tuuina le mea leaga o le lepela i se fale i le atunuu lea e fai mo outou,+ 35  e ao i lē e ona le fale ona alu atu i le ositaulaga ma taʻu atu e faapea, ‘Ua iai se pisia i le puipui o loʻu fale, e foliga mai o le mea leaga lea o le lepela.’ 36  E ao i le ositaulaga ona avatu faatonuga iā i latou e laʻu ese mea mai i le fale a o leʻi alu atu o ia e vaai i le mea leaga, ina neʻi taʻu lē mamā uma ai mea ua i le fale; a mavae lea ona sau lea o le ositaulaga e vaai i le fale. 37  Pe a sau o ia e vaai i le mea leaga, ma afai o loo iai i puipui o le fale le mea leaga, o omoomo ia e samasama lanu meamata pe mūmū, ma iloa atu ua ati ia mea i le puipui, 38  e ao i le ositaulaga ona ia ulufafo mai i le fale ma pupuni+ le fale i aso e fitu. 39  “E ao i le ositaulaga ona toe foʻi i le aso lona fitu ma vaai i ai;+ afai ua sosolo le mea leaga i puipui o le fale, 40  ona avatu lea e le ositaulaga o faatonuga iā i latou e aveese+ maa ia ua iai le mea leaga, ma e ao ona latou tiaʻi i se nofoaga lē mamā i tua o le aai. 41  E na te faatonuina le valuina ese o le omea i puipui i totonu o le fale, ma e ao ona latou tiaʻi le omea na faapipii ai maa ua latou aveesea, i se nofoaga lē mamā i tua o le aai. 42  E ao ona latou ave isi maa ma tuu i tulaga o maa ua aveese, ma e na te ave foʻi isi paluga o omea ma faasimā ai le fale. 43  “Afai e toe tupu le mea leaga ma ua tupu i le fale ina ua uma ona aveese maa, ma ua uma foʻi ona aveese le omea na faapipii ai maa mai i le fale ma toe faasimā ai, 44  e ao i le ositaulaga+ ona alu atu i totonu ma vaai i ai; afai ua sosolo le mea leaga i le fale, o le lepela aati+ lea i le fale. Ua lē mamā ai. 45  E ao ona ia tala i lalo le fale, o ona maa, o laupapa, o omea uma, ma e ao ona avatu i se nofoaga lē mamā i tua o le aai.+ 46  A o se tasi e alu atu i le fale i aso ua pupuni ai,+ e lē mamā o ia seʻia oo i le afiafipō;+ 47  o se tasi foʻi e taoto i le fale e ao ona tatā ona ofu,+ ma o so o se tasi e ʻai i le fale e ao ona tatā ona ofu. 48  “Ae afai e alu atu lava le ositaulaga ma vaai i ai, o lea ua lē sosolo le mea leaga i le fale ina ua uma ona faasimā, e ao i le ositaulaga ona taʻu atu ua mamā le fale, auā ua teʻa le mea leaga.+ 49  Ina ia faamamā le fale e tusa ai ma le tulafono, e ao ona ia avatu ni manulele se lua,+ se lālā arasi,+ o mea ua vali mūmū sesega+ ma le isopo. 50  E fasia e le ositaulaga le isi manulele i luga o le tanoa omea ua iai vai+ mai i le vaipuna. 51  E ao ona ia avatu le lālā arasi, o le isopo,+ o le mea ua vali mūmū sesega, ma le manulele o loo ola, ma lolō ia mea i le toto o le manulele na fasia, ma i le vai mai i le vaipuna, e ao ona ia sausau+ ai faafitu+ agaʻi i le fale. 52  E ao ona ia faamamā le fale e tusa ma le tulafono i le toto o le manulele, ma le vai mai i le vaipuna, o le manulele o loo ola, o le lālā arasi, o le isopo ma le mea ua vali mūmū sesega. 53  E na te auina atu foʻi le manulele o loo ola i fafo o le aai i le fanua, ma e na te faia le togisala+ mo le fale; ona mamā ai lea. 54  “O le tulafono lenei e tusa ai ma maʻi lepela+ uma, ma le matuā toʻulu o lauulu po o fulufulu+ 55  e tusa ai foʻi ma le lepela o i le ofu+ ma le fale, 56  e tusa ai foʻi ma le poʻu, o le paʻupaʻu ma le ila,+ 57  ina ia avatu ai faatonuga+ e iloa ai pe e lē mamā pe e mamā se mea. O le tulafono lea e faatatau i le maʻi o le lepela.”+

Faamatalaga Pito i Lalo

O le fua o le “loka” e tusa ma le 0.31 lita (0.66 paina).