Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Kenese 6:1-22

6  Ua oo ina amata ona toʻatele tagata i le fogāeleele, ma ua fanauina e i latou o afafine,+  ona vaavaai+ mai lea o atalii* o le Atua moni+ i afafine o tagata, ua lalelei lava i latou; ona latou ave lea o i latou e fai ma a latou avā, o fafine uma ua mananaʻo i ai.  Ua fetalai ane Ieova: “E lē faavavau+ ona faapalepale loʻu agaga+ i tagata, auā ua na o ni tagata i latou.+ O lea, o o latou aso e selau ma le lua sefulu tausaga ia.”+  I na aso ma mulimuli ane ai, sa iai foʻi Nefilimi* i le lalolagi, auā na faaauau pea ona feusuaʻi atalii o le Atua moni ma afafine o tagata, ma na fanaua e nei fafine ni atalii mai iā i latou, o nei atalii e taʻua o Nefilimi e malolosi ma taʻutaʻua i aso ua mavae.  O lea, ua silafia e Ieova ua matuā leaga amioga a tagata i le lalolagi, o manatu+ ma faanaunauga uma o o latou loto, e leaga i taimi uma lava.+  Ona faanoanoa+ ai lea o Ieova ona o tagata na ia faia i le lalolagi, ma ua tigā ai lona finagalo.+  Ua fetalai ane Ieova: “Ou te soloiesea tagata na ou foafoaina+ mai i le fogāeleele, o tagata, o manu lalata, o manu fetolofi ma manufelelei o le lagi,+ ua ou faanoanoa talu ai na ou faia i latou.”+  A o Noa ua ia maua le finagalo malie o Ieova.  O le talaaga lenei o Noa. O Noa o se tane amiotonu.+ E lē ponā o ia i ē na latou ola faatasi. Na savavali Noa ma le Atua moni.+ 10  Mulimuli ane ona fanaua lea e Noa o atalii e toʻatolu, o Semu, Hamo, ma Iafeta.+ 11  I le silasila a le Atua moni,+ ua faaleagaina le lalolagi ma ua tumu le lalolagi i faiga sauā.+ 12  Ona silasila mai lea o le Atua i le lalolagi, tagaʻi foʻi! ua faaleagaina,+ auā ua faia e tagata uma lava mea leaga.+ 13  Ua fetalai mai le Atua iā Noa: “Ua ou iloa ua oo mai le taimi e tatau ai ona faaumatia tagata uma lava,+ ona ua tumu le lalolagi i faiga sauā ona o i latou; ma ou te faaumatia i latou atoa ma le lalolagi.+ 14  Ia e faia se vaa* mo oe i le laau o le kofa.+ Ia e faia ni potu i totonu o le vaa, ma ia e puluti totonu ma fafo i le tā.+ 15  Ia faapenei ona e faia le vaa: e tolu selau kupita*+ le umi, lima sefulu kupita le lautele, ma e tolu sefulu kupita le maualuga. 16  Ia e faia se faamalama* o le vaa, ia e faaumaina le itu o le vaa e gata mai i le tasi kupita mai i le taualuga, ia e faia se faitotoʻa i lona itu;+ ia e faia le fogāvaa i le pito i lalo, le fogāvaa lona lua, ma lona tolu. 17  “O lea la, ou te faaoo le lolo+ i le lalolagi, ina ia fano ai tagata ma meaola uma o loo iai le malosi o le ola+ i lalo o le lagi. E faauma ai le ola o mea uma lava i le lalolagi.+ 18  Ou te faavaeina laʻu feagaiga ma oe; e ao ona e ulu atu i totonu o le vaa, o oe ma ou atalii ma lau avā, ma avā a ou atalii.+ 19  Ia e ave i totonu o le vaa o ituaiga o meaola uma,+ e taʻilua mai i ituaiga taʻitasi, o le manu poʻa ma le manu fafine, ina ia faasaoina ai faatasi ma oe.+ 20  O manufelelei e taʻitasi e tusa ma lona ituaiga, o manu lalata e taʻitasi e tusa ma lona ituaiga,+ o meaola fetolofi i le eleele e taʻitasi e tusa ma lona ituaiga, e taʻilua mai i ituaiga e ō atu iā te oe i inā ina ia faasaoina.+ 21  A o oe ia e ave o ituaiga o meaʻai uma e ʻaina,+ ia e faaputuina iā te oe, ia fai ma meaʻai mo oe atoa foʻi ma meaola.”+ 22  Ua faia e Noa mea uma lava e pei ona poloaʻi mai ai le Atua iā te ia. Ua faapea lava ona ia faia.+

Faamatalaga Pito i Lalo

Po o “agelu” e tusa ai ma nisi manusikulipi o le Tusi Paia Eleni o le Septuagint.
Po o “tagata maualuluga.” O le uiga o le upu Nefilimi, “O i latou o ē māfua ai ona paʻuʻū ai isi i lalo.”
O se mea e foliga mai e pei o se pusa.
O le fua o le “kupita” e tasi e tusa ma le 44.5 senitimita. Tagaʻi i le Faaopoopoga e 14.
O le upu Eperu e mafai ona faasino atu i le taualuga po o le faamalama.