Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Kenese 48:1-22

48  Ua mavae ia mea, ona faapea mai lea o nisi iā Iosefa: “Silasila foʻi! ua vaivai lou tamā.” Ona ia ave lea o ona atalii e toʻalua o Manase ma Efaraima,+ ma ō atu iā Iakopo.  Ua oo atu le tala iā Iakopo e faapea: “Ua sau lou atalii o Iosefa iā te oe.” Ona taumafai malosi lea o Isaraelu ma nofo i luga o lona moega.  Ona fai atu lea o Iakopo iā Iosefa: “Na faaali mai le Atua o Lē e ona le malosi uma lava iā te aʻu i Lusa+ i le laueleele o Kanana, ma na ia faamanuia mai iā te aʻu.+  Na ia fetalai mai iā te aʻu, ‘Ou te faauluolaina+ oe, ma ou te faatoʻateleina oe, ou te fai oe ma faapotopotoga o nuu,+ ou te avatu lenei laueleele i lau fanau pe a mavae oe, e fai mo i latou mo se taimi umi lava.’+  O lenei, o ou atalii e toʻalua o ē na fananau iā te oe i Aikupito, ae ou te leʻi sau i Aikupito, o oʻu lava i laʻua.+ O Efaraima ma Manase e avea ma oʻu atalii e pei lava o Reupena ma Simeona.+  O lau fanau foʻi e te fanaua mulimuli ane iā i laʻua, o lau fanau i latou. O le a latou maua le vaega o le laueleele lea e maua e o latou uso e fai ma o latou tofi.+  A o aʻu, ina ua ou sau mai i Patana,+ na maliu Rasela+ i le ala a o ma faatasi i le laueleele o Kanana, ae ua fai si mamao o le ō atu i Efarata,+ o le mea lea na ou tanu ai o ia i le ala i Efarata, o Peteleema foʻi lea.”+  Ua vaai atu Isaraelu i atalii o Iosefa ma faapea atu: “O ai i laʻua nei?”+  Ua tali mai Iosefa i lona tamā: “O oʻu atalii ia na foaʻi mai e le Atua iā te aʻu i lenei mea.”+ Ona ia fai atu lea: “Faamolemole aumai i laʻua iā te aʻu, ina ia ou faamanuia iā i laʻua.”+ 10  Ua nenefu le vaai a Isaraelu auā ua toeaina lava o ia.+ Ua leaga lana vaai. Ua aumaia e Iosefa i laʻua e faalatalata iā te ia, ua ia sogi ma fusi iā i laʻua.+ 11  Ua toe faapea atu Isaraelu iā Iosefa: “Ou te leʻi manatu ou te toe vaai iā te oe,+ a o lenei, ona o le Atua ua mafai ai foʻi ona ou vaai i lau fanau.” 12  Ona aveese lea e Iosefa o i laʻua mai i tala ane o ona tuli; ma ua ia ifo toʻele.+ 13  Ua ave e Iosefa i laʻua, ua ia tago i le lima taumatau o Efaraima a o le itu tauagavale lea o Isaraelu,+ a ua ia tago i le lima tauagavale o Manase a o le itu taumatau lea o Isaraelu,+ ma avatu i laʻua iā te ia. 14  Ae peitaʻi, ua tuu e Isaraelu lona lima taumatau i luga o le ulu o Efaraima,+ e ui lava o ia o le uii,+ ma ua ia tuu lona lima tauagavale i luga o le ulu o Manase.+ Na ia tuu faapea ona lima ma le mautinoa, e ui ua ia iloa o Manase le ulumatua.+ 15  Ua ia faamanuia iā Iosefa ma faapea atu:+ “O le Atua moni o lē na savavali ai i ona luma oʻu tamā o Aperaamo ma Isaako,+ O le Atua moni o lē ua tausia aʻu i loʻu olaga atoa seʻia oo mai i le asō,+ 16  O le agelu o lē na faasaoina aʻu mai i oʻu puapuaga uma,+ ia faamanuia i nei tama.+ Ia faaigoa foʻi i laʻua i loʻu igoa ma igoa o oʻu tamā, o Aperaamo ma Isaako,+ Ia matuā faatoʻateleina i laʻua i le lalolagi.”+ 17  Ina ua vaai atu Iosefa o loo tuu pea le lima taumatau o lona tamā i luga o le ulu o Efaraima, ona lē malie ai lea o ia,+ ma ua ia taumafai e tago atu e aveese le lima o lona tamā mai le ulu o Efaraima, ae tuu i luga o le ulu o Manase.+ 18  Ua fai mai Iosefa i lona tamā: “Loʻu tamā e, aua le faia faapea, auā o le ulumatua lea.+ Ia tuu lou lima taumatau i luga o lona ulu.” 19  A ua musu pea lona tamā ma faapea atu: “O lea ou te iloa, loʻu atalii e, ua ou iloa. E fai foʻi o ia ma nuu ma o le a faatoʻateleina o ia.+ Ae e ui i lea, o le a sili lona uso laʻitiiti nai lo o ia,+ ma o le a faatoʻateleina ana fanau ina ia avea ma nuu e tele.”+ 20  Ona ia faaauau lea ona ia faamanuia atu iā i laʻua i lenā aso+ e faapea: “O le a faamanuia pea tagata o Isaraelu ona o oe e faapea, ‘Tau ina ia faamanuia le Atua iā te oe e pei ona ia faamanuia iā Efaraima ma Manase.’ ”+ O lea, ua ia faamuamua pea Efaraima nai lo o Manase.+ 21  Ua mavae lea, ona faapea atu lea o Isaraelu iā Iosefa: “Vaai oe, o le a ou oti,+ ae o le a faatasi pea le Atua ma outou, ma toe faafoʻi outou i le laueleele o o outou augātamā.+ 22  A o aʻu, ou te avatu iā te oe se isi fasi fanua e sili atu i lea ua maua e ou uso,+ lea na ou aumaia mai i lima o tagata Amorī e ala i laʻu pelu ma laʻu ʻaufana.”

Faamatalaga Pito i Lalo