Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Kenese 45:1-28

45  Ina ua faalogo Iosefa i ia faamatalaga, ona lē mafai ai lea ona taofiofia ona faalogona i luma o ē o loo tutū i ona autafa.+ Ua ia leotele atu: “Ia ō ese uma tagata mai i oʻu luma!” E leʻi tū mai foʻi se isi a o faailoa atu e Iosefa o ia i ona uso.+  Ua amata ona leotele aʻe lana tagi,+ ua faalogo i ai tagata Aikupito, ma ua logotala ai foʻi tagata i le maota o Farao i lenei mea.  Ona fai atu lea o Iosefa i ona uso: “O aʻu o Iosefa. Po o soifua mai pea loʻu tamā?” Ae ua lē magagana ona uso i se tali e fai atu iā te ia, ona ua meia i latou iā te ia.+  Ua fai atu Iosefa i ona uso: “Faamolemole, sōsō mai iā te aʻu.” Ona latou sōsō atu lea iā te ia. Ua ia faapea atu: “O aʻu o Iosefa lo outou uso, o lē na outou faatau atu i Aikupito.+  Aua tou te faanoanoa,+ ma aua foʻi tou te feita iā te outou lava, ona o lo outou faatauina o aʻu i inei; auā na auina mai aʻu e le Atua e muamua iā te outou ina ia faasaoina ai ola.+  O le tausaga lona lua lenei o le oge i le lalolagi,+ ma o loo totoe isi tausaga e lima e lē toe suaina ai le laueleele pe faia ai foʻi se seleselega.+  Ua auina mai aʻu e le Atua e muamua iā te outou ina ia faatotoe+ ai nisi o outou i le lalolagi, ma faasaoina ai outou i se laveaʻiga tele.  O lea, e lē o outou na auina mai aʻu i inei,+ ae o le Atua moni, ina ia tofia aʻu e fai ma tamā+ o Farao, ma alii i lona maota atoa, o lē foʻi e pule i le atunuu atoa o Aikupito.  “Ia faavave ona outou ō atu i loʻu tamā, ma outou fai atu iā te ia, ‘O le tala lenei a lou atalii o Iosefa: “Ua tofia e le Atua aʻu e fai ma alii i Aikupito atoa.+ Sau ia iā te aʻu. Aua e te tuai mai. 10  E te nofo i le laueleele o Kosena,+ ia e nofo latalata mai ai iā te aʻu, o oe ma ou atalii, o atalii o ou atalii, o au lafu mamoe ma lafumanu, ma mea uma ua iā te oe. 11  Ou te avatu foʻi iā te oe meaʻai i inā, auā ua toe lima tausaga o totoe o le oge;+ ina neʻi faamativaina ai oe ma lou aiga, ma fano ai au mea uma.” ’ 12  Ua iloa mai e o outou mata ma mata o loʻu uso o Peniamina, o loʻu lava gutu o loo tautala atu iā te outou.+ 13  Ia outou taʻu atu i loʻu tamā loʻu mamalu i Aikupito, ma mea uma ua outou vāai i ai; ia outou faavave ma aumai loʻu tamā i inei.” 14  Ona ia fusi lea o le ua o Peniamina lona uso ma tagi, ua tagi foʻi Peniamina i lona ua.+ 15  Ua ia sogi i ona uso uma ma tagi ona o i latou,+ ona talanoa atu lea o ona uso iā te ia. 16  Ua oo atu le tala i le maota o Farao e faapea: “Ua ō mai uso o Iosefa!” Ua fiafia Farao ma ana auauna i lea tala.+ 17  Ua fai atu Farao iā Iosefa: “Ia fai atu i ou uso, ‘Ia faapenei ona fai: Ia faaee mea i a outou manu ave avega ma ō atu i Kanana,+ 18  ma aumai lo outou tamā ma ē uma i o outou fale ma ō mai i inei iā te aʻu, ou te avatu iā te outou mea lelei o le laueleele o Aikupito; ma e aai foʻi i mea e sili ona lelei mai i le fanua.+ 19  O oe foʻi ia e faatonu atu iā i latou:+ “Ia faapenei ona fai: Ia outou ave ni taavale toso+ mai i Aikupito e aumai ai a outou fanau iti, o a outou avā, ma ia tuu lo outou tamā i luga o se tasi o ia mea, ma ō mai i inei.+ 20  Aua foʻi neʻi outou manumanu i a outou meatotino,+ auā e fai mo outou mea lelei uma lava o le laueleele o Aikupito.” ’ ”+ 21  Ona faia lea faapea e atalii o Isaraelu, ua avatu e Iosefa iā i latou ni taavale toso e pei ona faatonuina e Farao, ma avatu iā i latou ni meaʻai+ mo le malaga. 22  Ua ia avatu iā i latou taʻitoʻatasi se ofu tele,+ ae ua ia avatu iā Peniamina tupe siliva e tolu selau ma ofu tetele e lima.+ 23  A ua ia aauina atu i lona tamā mea nei: o asini e sefulu o loo ave ai mea lelei mai i Aikupito, ma asini fafine e sefulu o loo ave ai fatu, o falaoa ma isi meaʻai mo le malaga a lona tamā. 24  Ua ia fai atu iā i latou: “Aua neʻi outou femisaaʻi a o outou ō atu.”+ Ona ia tuu atu lea o ona uso e ō, ma latou ō ai loa. 25  Ona latou ō atu lea mai i Aikupito, ma mulimuli ane ua latou taunuu i le atunuu o Kanana i lo latou tamā o Iakopo. 26  Ua latou taʻu atu iā te ia e faapea: “O loo ola Iosefa, ma o ia lea o loo pule i le atunuu atoa o Aikupito!”+ Ae ua lotovaivai o ia ona e lē talitonu iā i latou.+ 27  A o latou faamatala atu upu uma a Iosefa na fai atu iā i latou, ma ua ia vaai foʻi i taavale toso ia na auina mai e Iosefa e aami atu ai o ia, ona toe malosi+ ai lea o le loto o Iakopo, o lo latou tamā. 28  Ua faapea atu Isaraelu: “Ua ou talitonu nei! O loo ola pea loʻu atalii o Iosefa! Seʻi oʻu alu atu e vaai iā te ia ae ou te leʻi oti!”+

Faamatalaga Pito i Lalo