Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Kenese 44:1-34

44  Mulimuli ane, ua ia faatonuina le tamāloa o lē e na te vaaia lona maota,+ e faapea: “Ia faatutumu taga a tamāloloa i meaʻai i le tele e latou te mafaia ona ave, ma tuu tupe a le tagata lava ia i le gutu o lana lava taga.+  Ae ia tuu laʻu ipu, le ipu siliva i le gutu o le taga a le uii ma le tupe mo ana meaʻai.” Ona faia lea e le tamāloa e pei ona faatonuina ai o ia e Iosefa.+  Ua malama aʻe le taeao, ona tuuina atu lea o nei tagata e ō,+ o i latou ma a latou asini.  Ua ō atu i latou i fafo mai i le aai. E leʻi mamao se mea ua oo i ai, ae faapea atu loa Iosefa i le tamāloa o lē e na te vaaia lona maota: “Ia e alu! Ia tuliloa ma ia maua i latou ma fai atu iā i latou, ‘Aiseā ua outou taui mai ai le lelei i le leaga?+  Pe e lē o le ipu ea lenei e taumafa ai loʻu matai ma o le mea foʻi lea e na te faitau ai ma le saʻo faailoga o mea o le a tutupu?+ Ua matuā leaga le mea ua outou faia.’”  Mulimuli ane, ua ia maua i latou ma fai atu iā i latou ia upu.  A ua latou fai mai iā te ia: “Aiseā ua saunoa ai faapena lo matou alii? E lē taitai lava ona faia e au auauna se mea faapena.  Auā foʻi, o tupe na maua i gutu o a matou taga, na matou ō mai mai i Kanana ma toe aumai iā te oe.+ E faapefea la ona matou gaoia se siliva po o se auro mai i le maota o lou matai?+  O le pologa e maua ai le ipu, ia oti o ia, ma ia fai foʻi i matou ma pologa i lo matou matai.”+ 10  Ona ia faapea atu lea: “Ia faapea ona faia e pei ona outou fai mai ai.+ O lea, o lē e maua i ai le ipu e fai o ia ma aʻu pologa,+ ae e mamā lava outou.” 11  Ua taʻitasi ma faavave ona tuu i lalo lana taga i le eleele, ma taʻitasi ma tatala lana taga. 12  Ua ia suʻe māeʻaeʻa i taga a i latou uma. Ua ia amata i le taga a le ulumatua ma faaiʻu i le taga a le uii. Mulimuli ane, ona maua lea o le ipu i le taga a Peniamina.+ 13  Ona latou saeia lea o o latou ofu tele+ ua taʻitasi ma faaee lana avega i luga o lana asini, ma toe foʻi atu i le aai. 14  Ua ō Iuta+ ma ona uso i le maota o Iosefa, a o iai pea o ia i inā; ona latou faapaʻuʻū faō lea i ona luma.+ 15  Ua fai atu Iosefa iā i latou: “O le ā ea lenei mea ua outou faia iā te aʻu? Pe tou te lē iloa ea o aʻu o le tagata e mafai ona faitau ma le saʻo faailoga o mea o le a tutupu?”+ 16  Ua tali mai Iuta: “O le ā se mea matou te fai atu ai i lo matou matai? O le ā sa matou upu? E faapefea ona matou faailoa atu e tonu i matou?+ Ua silafia e le Atua moni le agasala a au pologa.+ Ia fai i matou uma ma lē na maua i ai le ipu i lona lima ma pologa i lo matou matai!”+ 17  Ae peitaʻi ua ia faapea atu: “E leai, e lē taitai ona ou faia lenei mea!+ O le tagata na maua i ai le ipu i lona lima, o le a fai o ia ma aʻu pologa.+ Ae ia ō ma le saogalemu isi o outou, i lo outou tamā.”+ 18  Ona sōsō mai lea o Iuta iā te ia ma faapea mai: “Loʻu alii e, ou te talosaga atu iā te oe, faamolemole seʻi tuu mai i lau pologa e fai atu se tala a o faafofoga mai loʻu matai,+ ma ia aua e te soona toʻatamaʻi+ i lau pologa, auā ua faapei lava oe o Farao.+ 19  Na fesili mai loʻu matai i ana pologa e faapea, ‘Pe e iai so outou tamā po o so outou uso?’ 20  Ona matou fai atu lea i lo matou matai, ‘E iai lo matou tamā ua toeaina, ma e iai foʻi le tama na fanaua e ia ina ua toeaina, o ia lea o le uii.+ Ua oti lona uso, ae ua toe o ia le tama a lona tinā,+ ma ua matuā alofa lona tamā iā te ia.’ 21  Mulimuli ane na e saunoa mai i au pologa, ‘Ia aumai o ia iā te aʻu ina ia ou vaai ai iā te ia.’+ 22  Ae na matou fai atu i lo matou matai, ‘E lē mafai ona tuua e le tama lona tamā. Auā afai e tuua e ia lona tamā, e oti ai lava lona tamā.’+ 23  Ona e saunoa mai lea i au pologa, ‘E lē mafai ona outou toe vāai iā te aʻu, vaganā ua outou ō mai ma lo outou uso aupito i laʻitiiti.’+ 24  “Ina ua matou oo atu i lau auauna, o lo matou tamā, ona matou faamatala atu lea iā te ia o upu a lo matou matai. 25  Mulimuli ane, na faapea mai lo matou tamā, ‘Ia toe ō atu, e faatau mai ni nai meaʻai mo i tatou.’+ 26  Ae na matou fai atu, ‘E lē mafai ona matou ō ifo. Afai matou te ō ma lo matou uso aupito i laʻitiiti, o le a matou ō ifo, auā e lē mafai ona matou toe vāai i le tamāloa pe a lē avatua lo matou uso aupito i laʻitiiti.’+ 27  Ua faapea mai lau pologa, o lo matou tamā iā i matou, ‘Ua outou iloa lelei, e na o le toʻalua oʻu atalii na fanaua e laʻu avā.+ 28  Mulimuli ane, na alu ese mai iā te aʻu le tasi ma na ou faapea ane ai: “Oi auē, e mautinoa ua saeia o ia!”+ ma ou te leʻi toe vaai lava iā te ia e oo mai i le asō. 29  Ae afai e tou te ave foʻi o ia ma tupu ai se faalavelave faafuaseʻi ma oti ai o ia, ona outou aveina ifo lea o oʻu lauulu sinā i le Tuugamau*+ ma le tigā tele.’ 30  “Talu ai ua sili le alofa o lau pologa, o lo matou tamā i le tama nai lo o lona naunau i lona lava ola, o le taimi lava ou te alu atu ai e aunoa ma le tama,+ 31  ae e iloa e ia e lē o alu atu le tama, ona oti ai lea, ma o le a aveina ifo e au pologa o lauulu sinā o lau pologa o lo matou tamā, i le Tuugamau ma le faanoanoa. 32  Auā o lau pologa e na te vaaia lelei+ le tama i le taimi e alu ese ai mai i lona tamā, ma na ou faapea atu, ‘Afai ou te lē toe aumaia o ia iā te oe, ona ou agasala ai lea i loʻu tamā e faavavau.’+ 33  Faamolemole lava, ia tuu aʻu e fai ma pologa iā te oe e sui ai le tama, ae ia toe foʻi le tama ma ona uso.+ 34  E faapefea ona ou alu atu i loʻu tamā ae e lē o iā te aʻu le tama, ma iʻu ai ina ou vaai atu i le mala e oo i loʻu tamā?”+

Faamatalaga Pito i Lalo

Tagaʻi i le Faaopoopoga 6.