Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Kenese 43:1-34

43  Ua mataʻutia tele le oge i le atunuu.+  Ua faasolo foʻi ina uma ona ʻai meaʻai na latou aumaia mai i Aikupito,+ ona fai atu lea o lo latou tamā iā i latou: “Ia toe ō atu ma faatau mai ni nai meaʻai mo i tatou.”+  Ua tali mai Iuta iā te ia:+ “Na matuā lapataʻia i matou e le tamāloa e faapea, ‘E lē mafai ona outou toe vāai mai iā te aʻu, seʻi vaganā ua outou aumaia lo outou uso.’+  Afai e te tuu mai lo matou uso matou te ō,+ matou te lotomalilie e ō ifo e faatau mai meaʻai mo oe.  Ae afai e te lē tuu mai o ia, e matou te lē ō, auā na faapea mai lava le tamāloa iā i matou, ‘E lē mafai ona outou toe vāai mai iā te aʻu, seʻi vaganā ua outou aumaia lo outou uso.’”+  Ua faapea atu Isaraelu:+ “Aiseā ua outou faatigā ai iā te aʻu? Aiseā foʻi na outou taʻu ai i le tamāloa e iai le isi o outou uso?”  Ua latou tali mai: “Na fesili saʻo mai lava le tamāloa e faatatau iā i tatou ma o tatou aiga, e faapea, ‘Po o soifua pea lo outou tamā?+ Pe e iai se isi o outou uso?’ ma na matou taʻu atu iā te ia e tusa ma ia mea moni.+ O ai na iloa o le a faapea mai o ia, ‘Ia aumai i inei lo outou uso’?”+  Mulimuli ane, ona fai mai lea o Iuta i lona tamā o Isaraelu: “Ia tuu mai le tama ma te ō,+ ia matou sauni ma ō atu, ina ia tatou ola pea ae e lē feoti ai,+ o i matou, o oe, ma a matou fanau iti.+  E faitalia aʻu ma vaai lelei o ia.+ Ia e faasalaina aʻu ona o ia.+ Afai ou te lē toe aumaia o ia ma tuuina atu iā te oe, ona ou agasala ai lea iā te oe mo le olaga atoa. 10  Ana matou lē faatuai, semanū ua faalua+ ona matou ō ma ō mai.” 11  Ona faapea atu lea o Isaraelu lo latou tamā iā i latou: “Afai o le tulaga lea,+ ia fai lenei mea: Ia ave mea aupito lelei o le laueleele i a outou ato, ma avatu i le tamāloa e fai ma meaalofa:+ O sina pasama,+ o sina meli,+ o pulu mai i se laau, o pulu mai i paʻu o laau,+ o fua o le petuni ma le sekati.*+ 12  Ia faaluaina tupe i o outou lima; o tupe foʻi na toe faafoʻi mai i gutu o a outou taga, ia outou ave foʻi i o outou lima.+ Atonu o se mea sesē na tupu.+ 13  Ia sauniuni loa ma toe foʻi i le tamāloa, ma ave lo outou uso. 14  Tau ina ia faapogaia e le Atua e ona le malosi uma lava, le alofa mutimutivale o le tamāloa iā te outou,+ ma ia faasaʻoloto mai ai le isi o outou uso ma Peniamina. A o aʻu, afai e ao ona aveesea laʻu fanau, ia faapea ia ona faia!”+ 15  Ua latou ave le meaalofa, ua latou ave foʻi tupe ua faaluaina i o latou lima atoa ma Peniamina. Ona latou ō lea ma agaʻi ifo i Aikupito, ma mulimuli ane ua tutū i luma o Iosefa.+ 16  Ina ua iloa atu e Iosefa ua latou ō mai ma Peniamina, ona ia fai atu lea i le tamāloa o lē na te vaaia lona fale: “Ia ave tamāloloa i le fale, ia fasi ni manu ma sauni se taumafataga,+ auā matou te aai faatasi ma tamāloloa i le aoauli.” 17  Ona faia loa lea e le tamāloa e pei ona fai atu ai Iosefa.+ Ua ave i latou e le tamāloa i le maota o Iosefa. 18  Ua fefefe i latou ona ua avatu i latou i le maota o Iosefa,+ ma ua latou faapea ane: “O tupe ia na toe tuu i a tatou taga i le taimi muamua, ua aumaia ai i tatou i nei, ina ia latou osofaʻia i tatou ma fai ma pologa ma ave a tatou asini!”+ 19  Ua latou sōsō atu i le tamāloa e vaaia le maota o Iosefa, ma talanoa atu iā te ia i luma o le faitotoʻa o le maota, 20  ma latou faapea atu: “Le alii e, matou te faamālūlū atu! Na matou ō mai lava i le taimi muamua e faatau ni meaʻai.+ 21  Ae o le mea na tupu, ina ua matou oo i le mea e api ai+ ma tatala a matou ato, vaai foʻi, na iai tupe a le tagata lava ia i le gutu o lana taga, o le aofaʻiga atoa o a matou tupe. O lea, ua matou mananaʻo ai e toe faafoʻi atu e o matou lima.+ 22  Ua matou aumaia nisi tupe i o matou lima e faatau ai ni meaʻai. Matou te lē iloa po o ai na tuua tupe i a matou taga.”+ 23  Ua ia faapea mai: “E lē afāina. Aua tou te fefefe.+ Na avatu e lo outou Atua ma le Atua o lo outou tamā oloa i a outou taga.+ Ua ou iloa na outou totogia meaʻai.” Ona ia aumaia lea o Simeona iā i latou.+ 24  Ua ave i latou e le tamāloa i totonu o le maota o Iosefa, ua ia avatu foʻi vai e fufulu ai o latou vae,+ ma avatu meaʻai mo a latou asini.+ 25  Ua latou sauniunia le meaalofa+ mo Iosefa a o leʻi sau o ia i le aoauli, auā na latou faalogo o i inā latou te aai ai.+ 26  Ua ulu atu Iosefa i le maota, ona latou avatu ai lea o le meaalofa mai i o latou lima iā te ia, ma faapaʻuʻū faō i ona luma.+ 27  Ua mavae lea, ona ia fesili atu lea po o manuia mai i latou, ma faapea atu:+ “Po o manuia lo outou tamā, le toeaina matua lea na outou taʻua? Po o soifua mai pea o ia?”+ 28  Ua latou faapea mai: “O loo manuia lo matou tamā, o lau auauna. O loo soifua pea o ia.” Ona latou punonou lea ma faapaʻuʻū faō.+ 29  Ua tepa aʻe o ia ma iloa atu Peniamina lona uso, o le tama a lona tinā,+ ona ia faapea atu lea: “Po o lo outou uso lea, o le uii lea na outou taʻua mai iā te aʻu?”+ Ona ia toe faapea atu lea: “Loʻu atalii e, tau ina ia alofagia oe e le Atua.”+ 30  Ua faatopetope ese Iosefa, ona ua matuā ootia ona faalogona ona o lona uso,+ ua ia suʻe se mea e tagi ai, ma ua alu i totonu o le potu, ua na o ia ma tagi ai.+ 31  Ona ia fufulu lea o ona mata, ua alu atu i fafo ma ua toʻa lelei ma faapea atu:+ “Ia laulau loa le meaʻai.”+ 32  Ona latou laulau ese atu lea o lana meaʻai, ua laulau ese foʻi meaʻai mo i latou, ua laulau ese foʻi meaʻai mo tagata Aikupito o ē ua aai faatasi ma ia, auā e lē mafai ona aai faatasi tagata Aikupito ma tagata Eperu, ona o se mea inosia i tagata Aikupito.+ 33  Ua latou nonofo i ona luma, ua nofo le ulumatua e tusa ma lana aiā o le ulumatua+ e oo lava i lē e aupito i laʻitiiti e tusa ma lona tulaga o le uii; ua fetilofaʻi solo i latou ma le ofo. 34  Ua ia faatonuina ina ia avatu pea meaʻai iā i latou mai i meaʻai ua i ona luma, ae e faalima ona ia faatelē le meaʻai a Peniamina nai lo o isi uma.+ Ua latou faaauau ona fai le taumafataga ma feinu seʻia oo ina faamalieina i latou.+

Faamatalaga Pito i Lalo

O le “petuni” i le faa-Peretania, o le Pistachio nut. O le “sekati” i le faa-Peretania, o le Almond.