Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Kenese 42:1-38

42  Ua iloa e Iakopo ua iai meaʻai i Aikupito.+ Ona fai atu lea o Iakopo i ona atalii: “Aiseā ua outou fevaaiaʻi ai?”  Ua ia toe faapea atu: “Ua ou faalogo o loo iai meaʻai i Aikupito.+ Ia outou ō ifo ma faatau mai ni meaʻai, ina ia tatou ola ai ae lē feoti i le fia aai.”  Ua ō ifo uso e toʻasefulu+ o Iosefa e faatau mai ni fatu mai i Aikupito.  Ae ua lē tuu atu e Iakopo o Peniamina,+ le uso o Iosefa, e ō ma isi ona uso, auā ua faapea atu o ia: “Neʻi tupu iā te ia se faalavelave faafuaseʻi ma oti ai.”+  Ua ō atalii o Isaraelu faatasi ma isi o ē ō atu e faatau, auā ua iai pea le oge i le laueleele o Kanana.+  Ua pule Iosefa i le atunuu atoa.+ O ia lea o loo faatauina atu meaʻai i tagata e ō mai mai i atunuu eseese o le lalolagi.+ Ona ō mai lea o uso o Iosefa i ona luma, ma ifo toʻele iā te ia.+  Ina ua vaai atu Iosefa i ona uso, ona ia iloa lea o i latou, ae ua ia lē faailoa atu o ia iā i latou.+ Ua ia tautala paū atu iā i latou ma faapea atu: “O fea tou te ō mai ai?” ua latou tali mai: “Matou te ō mai mai i Kanana e faatau ni meaʻai.”+  Ua iloa e Iosefa ona uso a ua latou lē iloa o ia.  Ona manatua loa lea e Iosefa o ana miti sa fai e uiga iā i latou,+ ua ia faapea atu: “O outou o sipai!* Ua outou ō mai e vaavaai i se mea e osofaʻiagofie ai le atunuu!”+ 10  Ua latou fai mai iā te ia: “E leai, le alii e,+ ua ō mai au auauna+ e faatau ni meaʻai. 11  O i matou uma o atalii o le tagata e toʻatasi. O i matou o ni tagata faamaoni. E lē o ni sipai au auauna.”+ 12  A ua ia fai atu iā i latou: “E leai! Ua outou ō mai e vaavaai i se mea e osofaʻiagofie ai le atunuu!”+ 13  Ona latou faapea mai lea: “O au auauna, o le ʻauso e toʻasefulu lua.+ O i matou o atalii o le tagata e toʻatasi+ i le atunuu o Kanana; a o le uii, o loo iai ma lo matou tamā i le asō,+ a ua leai le isi.”+ 14  Ae peitaʻi, ua fai atu Iosefa iā i latou: “Ua saʻo upu ua ou fai atu ai iā te outou, ‘O outou o sipai!’ 15  O le a faapenei ona tofotofoina outou. O loo soifua Farao, e tou te lē ō ese mai i inei, seʻi vaganā ua sau lo outou uso aupito i laʻitiiti i inei.+ 16  Ia alu se tasi o outou e aumai lo outou uso a o saisaitia outou, ina ia tofotofoina ai a outou upu pe moni.+ Ae afai e leai, o loo soifua Farao, o outou o sipai.” 17  Ua ia taofia i latou i le falepuipui mo aso e tolu. 18  Ua mavae lea mea, ona faapea atu lea o Iosefa iā i latou i le aso lona tolu: “Ia faia lenei mea ma ia ola ai. Ou te mataʻu+ i le Atua moni. 19  Afai tou te faamaoni, ia saisaitia se tasi o o outou uso i lenei falepuipui,+ a ia ō isi o outou, ia ave meaʻai mo ē ua fia aai i lo outou aiga.+ 20  Ona outou aumaia ai lea o lo outou uso aupito i laʻitiiti iā te aʻu, ina ia faamaonia ai a outou upu; ma outou lē feoti ai.”+ Ua latou faia faapea. 21  Ona faapea ane lea o le tasi i le isi: “E lē taumatea ua tatou nofosala ona o lo tatou uso,+ auā na tatou vāai i ona puapuaga a o ia ʻaiʻoi mai ia tatou alolofa atu iā te ia, ae tatou te leʻi faalogo lava. O le mea lea ua oo mai ai nei puapuaga iā i tatou.”+ 22  Ona tali mai lea o Reupena e faapea: “Po ou te leʻi fai atu ea iā te outou, ‘Aua neʻi faia se mea leaga i le tama,’ ae e tou te leʻi faalogo lava?+ A o lenei, ua tatau ona tauia lona toto.”+ 23  A ua lē iloa e i latou o loo malamalama Iosefa i a latou tala, auā ua iā i latou ma ia le faaliliu upu. 24  Ua alu ese o ia mai iā i latou ma ua tagi.+ Ona toe foʻi mai lea o ia iā i latou ua talanoa atu, ma ave Simeona+ mai iā i latou ma saisaitia o ia i o latou luma.+ 25  Ua mavae lea, ona poloaʻi atu lea o Iosefa i ana auauna, ona latou faatutumu ai lea o a latou taga i meaʻai. Ia toe faafoʻi atu tupe a tamāloloa i a latou lava taga,+ ma avatu iā i latou ni meaʻai mo le malaga.+ Ona faia lea faapea iā i latou. 26  Ua faaee a latou taga o meaʻai i luga o a latou asini, ma ō ese loa mai i lea mea. 27  Ina ua oo i le mea e api ai, ona tatala lea e se tasi o lana taga ina ia avatu se meaʻai i lana asini,+ ona iloa ai lea e ia o ana tupe, auā foʻi o loo i le gutu o lana taga.+ 28  Ona ia fai atu lea i ona uso: “Ua toe faafoʻi mai aʻu tupe ma o loo i totonu o laʻu taga!” Ua latou popole ma gatete i le fefefe, ua faapea atu le tasi i le isi:+ “O le ā lenei mea ua faia e le Atua iā i tatou?”+ 29  Mulimuli ane, ua latou oo i Kanana iā Iakopo lo latou tamā, ma ua latou faamatala atu mea uma na tutupu iā i latou e faapea: 30  “Na tautala paū mai iā i matou le tamāloa o lē ua avea ma alii o le atunuu,+ auā na ia manatu o i matou o ni sipai i le atunuu.+ 31  Ae na matou fai atu iā te ia, ‘O matou o tagata faamaoni.+ E lē o matou o ni sipai. 32  O i matou o le ʻauso e toʻasefulu lua,+ o atalii o lo matou tamā.+ Ua lē o toe iai le tasi,+ ae o le uii o loo faatasi ma lo matou tamā i le asō i le atunuu o Kanana.’+ 33  A ua faapea mai le tamāloa o lē ua avea ma alii o le atunuu iā i matou,+ ‘O le mea lenei ou te iloa ai lo outou faamaoni:+ Ia nofo se toʻatasi o o outou uso faatasi ma aʻu.+ A ia outou ō ma ave meaʻai mo ē o fia aai i lo outou aiga.+ 34  Ia aumai lo outou uso aupito i laʻitiiti iā te aʻu, ina ia ou iloa ai e lē o outou o ni sipai a o ē e faamaoni. Ou te toe avatu lo outou uso iā te outou, ma outou faaauau ona faatau meaʻai mai i lo matou atunuu.’ ”+ 35  Ua latou saati a latou taga, ua iai fusi tupe a le tagata lava ia i lana lava taga. Ua latou vāai uma iai faatasi ma lo latou tamā i a latou fusi tupe, ona latou fefefe uma ai lea. 36  Ua fai atu Iakopo lo latou tamā iā i latou: “Ua outou aveese laʻu fanau!+ Ua lē toe iai Iosefa, ua lē toe iai foʻi Simeona,+ a o lenei o le a outou ave foʻi ma Peniamina! Aiseā ua tutupu ai nei mea uma ia te aʻu?” 37  Ua fai mai Reupena i lona tamā: “Pe afai ou te lē toe aumaia o ia iā te oe,+ ia e fasiotia oʻu atalii e toʻalua. Ia tuu mai o ia ou te vaaia, ma ou te toe aumaia foʻi o ia iā te oe.”+ 38  Peitaʻi ua ia faapea atu: “E lē alu ifo loʻu atalii faatasi ma outou, ona ua oti lona uso a ua tuua toʻatasi ai na o ia.+ Pe a tupu se faalavelave faafuaseʻi ma oti ai o ia i le ala tou te ō ai, ona outou aveina ifo lea o oʻu lauulu sinā i le Tuugamau,*+ ma le faanoanoa.”

Faamatalaga Pito i Lalo

Po o “ē ō atu faalilolilo e mataʻi le nuu.”
Tagaʻi i le Faaopoopoga e 6.