Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Kenese 41:1-57

41  Ua mavae tausaga atoatoa e lua ona fai ai lea o le miti+ a Farao e faapea, ua tū o ia i autafa o le vaitafe o le Naila.  Ua ō aʻe mai i le vaitafe o le Naila ni povi se fitu e tino lelei ma pepeti, ua aai i le vao o loo i autafa o le vaitafe o le Naila.+  Ona sosoo lea ma le ō aʻe o isi povi e fitu mai i le vaitafe o le Naila, e tino leaga ma paeee,+ ua tutū i tafatafa o isi povi i le auvai o le vaitafe o le Naila.  Ua ʻai e povi tino leaga ma paeee, povi e fitu e tino lelei ma pepeti.+ Ona ala ai lea o Farao.+  Ua toe moe o ia ma ua toe fai se isi ana miti. E faapea ua tutupu mai fuifui saito e fitu e lapopoʻa ma lelei+ mai i se ʻau e tasi.  Ona sosoo lea ma le tutupu+ mai o fuifui saito e fitu e mimiti ma ua mamae ona o le vevela o le matagi mai i sasaʻe.+  Ua ʻai e fuifui saito mimiti ia fuifui saito e fitu e lapopoʻa ma matutua.+ Ona ala lea o Farao ma iloa ai o se miti.  Ua oo i le taeao ona atuatuvale+ ai lea o ia. Ua ia aami ositaulaga uma e faia faiga faaagaga o Aikupito+ ma ona tagata atamamai uma,+ ma ua faamatala atu e Farao ana miti iā i latou.+ Ae ua leai se tasi e mafai ona faamatalaina le uiga o ia miti iā Farao.  Ona faapea atu lea o le pule o le ʻautautū uaina iā Farao:+ “Ua ou manatua i le asō aʻu agasala ma oʻu masei.+ 10  Na toʻatamaʻi Farao i ana auauna.+ Ona ia tuuina lea o aʻu i le falepuipui o le fale o le pule o le ʻauleoleo a le tupu,+ o aʻu atoa ma le pule o le ʻaufaifalaoa. 11  Ua mavae lea ona fai lea o a ma miti i le pō e tasi, o aʻu ma ia. Na taʻitasi ma fai lana miti ae e tofu le miti ma lona uiga.+ 12  Na matou iai faatasi i inā ma se tama talavou Eperu,+ o le auauna foʻi a le pule o le ʻauleoleo a le tupu.+ Na ma faamatala iā te ia+ a maʻua miti, ona ia faamatala mai lea o uiga o ia miti iā i maʻua. Na ia faamatalaina le uiga o le miti a le tagata lava ia. 13  Na taunuu lava e pei ona ia faamatalaina iā i maʻua. Na ia toe faaeaina aʻu i loʻu tulaga,+ a o ia na ia faatautauina.”+ 14  Ona auina atu lea o le feʻau a Farao ina ia faavave ona aumai Iosefa+ mai i le lua lea na fai ma falepuipui.+ Ua sele lana ʻava*+ ma sui ona ofu+ ma alu atu i luma o Farao. 15  Ua fai atu Farao iā Iosefa: “Sa fai laʻu miti, ae e leai se tasi na mafai ona ia faamatalaina mai le uiga. Ae ua ou faalogo e uiga iā te oe, pe a e faalogo i se miti, e mafai ona e faamatala lona uiga.”+ 16  Ua tali mai Iosefa iā Farao: “E lē o aʻu! O le Atua na te aumaia se faamatalaga e logolelei iā Farao.”+ 17  Ua faamatala e Farao iā Iosefa e faapea: “I laʻu miti na ou tū i le auvai o le vaitafe o le Naila. 18  Na ō aʻe mai i le vaitafe o le Naila ni povi se fitu e tino lelei ma pepeti, ma aai i le vao i autafa o le vaitafe o le Naila.+ 19  Na sosoo ma le ō aʻe o isi povi e fitu, e tino vale ma leaga ma paeee.+ Ou te leʻi vaai muamua i ni povi leaga faapea i Aikupito. 20  Na ʻai e povi e tino paeee ma leaga ia povi pepeti e fitu ia na ō aʻe muamua.+ 21  Na ʻai e nei povi ia povi pepeti ae pei lava e leai ni mea na ʻai e ia povi, auā na tino leaga pea e pei ona iai muamua.+ Ona ou ala ai lea. 22  “Ua mavae lenā mea, ona ou vaaia lea i laʻu miti, ua tutupu mai o fuifui saito e fitu e matutua ma lelei mai i se ʻau e tasi.+ 23  Ona sosoo lea ma le tutupu mai o fuifui saito mamago e fitu, e mimiti ma ua mamae ona o le vevela o le matagi mai i sasaʻe.+ 24  Na ʻai e fuifui saito mimiti ia fuifui saito lelei e fitu.+ Na ou faamatala atu i ositaulaga e faia faiga faaagaga,+ ae e leai se tasi na mafai ona ia taʻu mai iā te aʻu.”+ 25  Ona fai mai lea o Iosefa iā Farao: “E tasi lava le uiga o le miti a Farao. O mea o le a faia e le Atua moni, ua ia faamatala mai iā Farao.+ 26  O povi lelei e fitu, o tausaga ia e fitu. E faapena foʻi fuifui saito lelei e fitu, o tausaga ia e fitu. E tasi lava le uiga o le miti. 27  O povi paeee ma leaga e fitu na sosoo mai, o tausaga ia e fitu; o fuifui saito e fitu ia e leaga ma ua mamae ona o le vevela o le matagi mai i sasaʻe,+ o tausaga ia e fitu o le oge.+ 28  O le mea lenei ua ou taʻu atu iā Farao: O mea o le a faia e le Atua moni, ua ia faaali mai iā Farao.+ 29  “E oo mai tausaga e fitu e mau ai le atunuu o Aikupito. 30  Peitaʻi ane, e sosoo mai ma tausaga e fitu e oge ai, o le a galo le mau sa iai le laueleele o Aikupito ma o le a matuā afāina le atunuu i le oge.+ 31  E lē toe iloa foʻi le mau sa iai i le atunuu ona o le oge lea e sosoo mai, auā o le a matuā mataʻutia lava. 32  O le faaalia faalua mai o le miti iā Farao, ua faamaonia ai ua faamausalī e le Atua moni lenei mea,+ ma e vave foʻi ona faataunuu e le Atua moni lenei mea.+ 33  “O lea, ia saʻili e Farao se tagata e faautauta ma atamai, ma tofia o ia e fai ma pule i le atunuu o Aikupito.+ 34  Ia tofia e Farao ni ovasia i le atunuu,+ ma a o faagasolo tausaga e fitu o le mau, ia faaputu e ia le tasi vaelima o faaeleeleaga o le fanua o le atunuu o Aikupito.+ 35  Ia latou ao mai meaʻai i tausaga o le mau, ma ia faaputu i totonu o aai+ ma leoleo ai, o nei fatu o Farao e ana. 36  O nei faaputuga o meaʻai o le a fafaga ai le nuu mo tausaga e fitu o le oge, lea o le a oo iā Aikupito,+ ina ia aua neʻi faaumatia le atunuu ona o le oge.”+ 37  Ua lelei lea faamatalaga i le manatu o Farao ma ana auauna uma.+ 38  Ona faapea atu lea o Farao i ana auauna: “Pe e mafai ea ona maua se isi e pei o lenei tagata o lē ua iai le agaga o le Atua?”+ 39  Ona fai atu lea o Farao iā Iosefa: “Talu ai ua faaalia mai e le Atua iā te oe nei mea uma,+ ua leai se tasi e faautauta ma atamai e pei o oe.+ 40  O le a e pule i loʻu fale,+ ma e usitaʻi foʻi oʻu tagata iā te oe i mea uma.+ Ae ou te sili iā te oe, ona ua ou nofo i le nofoālii.”+ 41  Ua faapea atili atu Farao iā Iosefa: “O le mea lea, ua ou tofia ai oe e pule i le atunuu atoa o Aikupito.”+ 42  Ona aveese lea e Farao o lana mama faamaufaailoga+ mai i lona lima ma tuu i le lima o Iosefa, ua faaofu o ia i ofu e fai i ʻie lino lelei, ma faaula i le asoa auro.+ 43  Ua ia faatiʻetiʻe o ia i le kariota lona lua ina ia faamamaluina ai o ia+ e tagata e ala i le muamua atu ma alalaga, “Avareki!”* o lea ua tofia ai o ia e pule i le atunuu atoa o Aikupito. 44  Ua toe faapea atu Farao iā Iosefa: “O aʻu o Farao, ae e leai se mea e mafai ona faia* i Aikupito atoa e aunoa ma lau faatagaga.”+ 45  Ua faaigoa e Farao o Iosefa iā Sapenapaenea* ma tuu atu iā te ia Asenati+ le afafine o Potifere, le ositaulaga o Onu,+ e fai ma ana avā. Ona femalagaaʻi solo lea o Iosefa i le atunuu atoa o Aikupito.+ 46  E tolu sefulu tausaga o Iosefa+ ina ua tū o ia i luma o Farao le tupu o Aikupito. Ona alu atu lea o Iosefa mai i luma o Farao ma femalagaaʻi solo i Aikupito atoa. 47  A o faagasolo le fitu tausaga o le mau, ua faateleina fua o faaeleeleaga o le laueleele.+ 48  Ua faaauau ona ia aoaoina meaʻai i tausaga e fitu na mau ai le atunuu o Aikupito, ma ua faaputu i aai+ taʻitasi. O meaʻai ua maua i le fanua ua siʻomia ai le aai, ua ia teuina i totonu o lea lava aai.+ 49  Ua faaauau ona faaputu e Iosefa o fatu ma ua matuā tele lava fatu,+ e pei o le oneone o le sami, seʻia oo ina lē toe faitauina auā ua lē mafaitaulia.+ 50  A o leʻi oo i le tausaga o le oge, ua fanaua e Iosefa ni atalii se toʻalua,+ ia na fanaua mai iā te ia e Asenati le afafine o Potifere le ositaulaga o Onu. 51  Ua faaigoa e Iosefa le ulumatua o Manase,*+ auā na ia faapea ane, “O le Atua ua māfua ai ona galo iā te aʻu oʻu mafatiaga, ma le aiga atoa o loʻu tamā.”+ 52  Ua ia faaigoa le lona lua o Efaraima*+ auā na ia faapea ane, “Ua faauluolaina aʻu e le Atua i le atunuu na ou puapuagatia ai.”+ 53  Ua faasolo ina faaiʻuiʻu tausaga e fitu o le mau i le atunuu o Aikupito,+ 54  ae ua amata ona oo mai tausaga e fitu o le oge, e pei ona fai atu ai Iosefa.+ Ua oo le oge i atunuu uma, ae i Aikupito ua maua ai meaʻai.+ 55  Mulimuli ane, ua oo atu le oge i le atunuu atoa o Aikupito, ma ua talosaga atu tagata iā Farao mo ni meaʻai.+ Ona fai atu lea o Farao i tagata Aikupito uma: “Ia ō atu iā Iosefa. O le ā lava le mea e fai atu ai o ia iā te outou, ia outou faia.”+ 56  Ua oo le oge i le lalolagi atoa.+ Ona tatala lea e Iosefa o fale na teu ai fatu ia ua iā i latou, ma faatau atu i tagata o Aikupito,+ auā ua mataʻutia tele le oge i Aikupito. 57  Ua gasolo ane foʻi tagata o le lalolagi uma i Aikupito e faatau mai ni meaʻai mai iā Iosefa, auā ua mataʻutia tele le oge i le lalolagi atoa.+

Faamatalaga Pito i Lalo

I le gagana Eperu, e ono uiga atu i le seleina o le ʻava faapea foʻi ma le ulu.
I le gagana Eperu, “A·vrékh” e lē o mautinoa le uiga tonu o lenei faaupuga auā o le upu i le gagana Aikupito ae ua sipelaina i mataʻitusi i le gagana Eperu.
I le gagana Eperu, “e lē sii e se tasi lona lima po o lona vae.”
 Atonu, “O Lē e Faaalia Mea Lilo.”
O lona uiga, “O Lē ua Māfua ai Ona Galo.”
O lona uiga, “Taulau Manuia.”