Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Kenese 39:1-23

39  Ua ave ifo Iosefa i Aikupito+ ma ua faatauina o ia e Potifara+ le tagata aloaʻia i le maota o Farao, o le pule o le ʻauleoleo a le tupu, o ia foʻi o se Aikupito, mai i lima o tagata Isamaeli+ o ē na avatua o ia i lea mea.  Ae ua faatasi Ieova ma Iosefa, ua iʻu ina manuia lava o ia+ ma ua ia vaavaaia nisi o mea i le maota o lona matai, o le tagata Aikupito.  Ua iloa e lona matai ua faatasi Ieova ma ia, ma ona o Ieova ua taulau manuia ai mea uma e na te faia.  Ua fiafia pea o ia iā Iosefa, ma ua ia auauna pea iā te ia, ua ia tofia o ia e pule i ana mea uma i lona fale,+ ma ua tuu atu i ona lima ana mea uma.  Talu mai le taimi na tofia ai o ia e pule i lona fale ma ana mea uma, ua faamanuia pea Ieova i le aiga o le tagata Aikupito ona o Iosefa, ma ua faamanuia e Ieova mea uma ua i lona fale atoa ma le fanua.+  Mulimuli ane, ua ia tuu atu le pule o ana mea uma i lima o Iosefa;+ e leʻi popole o ia i se mea e tasi seʻi vaganā ai le meaʻai ua ia ʻai ai. Ua oo ina atili aulelei ma manaia le fuaitino o Iosefa.  Ua mavae ia mea, ona vaavaai+ ane lea o le faletua o lona matai iā Iosefa ma faapea mai: “Seʻi ta momoe.”+  Ua teena+ e ia ma fai atu i le faletua o lona matai: “E te silafia e lē popole loʻu matai i mea ou te faia i le maota, ma ua ia tuuina mai i oʻu lima le pule i mea uma.+  E leai se isi e sili atu i lenei maota nai lo o aʻu, ma ua iā te aʻu le pule i mea uma seʻi vaganā ai oe, auā o oe o lona faletua.+ Pe faapefea ona ou faia lenei mea leaga tele ma ou agasala ai i le Atua?”+ 10  Ua fai ma ana masani le fai atu soo iā Iosefa i lea aso ma lea aso, ae e lē usitaʻi lava o ia iā te ia ina ia la momoe, pe faaumiumi se taimi e la te faatasi ai.+ 11  Ua oo i le isi aso, ua ia alu atu i le fale e fai ai ana galuega, ae ua leai ni auauna i le fale.+ 12  Ona tago atu lea o le fafine i lona ofu+ ma fai atu: “Inā ta momoe ia!”+ A ua sola Iosefa ma alu i fafo ae ua tiaʻi i ai lona ofu o loo uʻu i lona lima.+ 13  Ua ia iloa ua tiaʻi mai e Iosefa lona ofu lea o loo uʻu i lona lima, ina ia sola ai i fafo, 14  ona ia ee atu lea i auauna o loo i lona fale ma faapea atu iā i latou: “Faauta! O lenei tagata Eperu na aumai e laʻu tane, ua manaʻo o ia e fai i tatou ma mea e ula ai nisi. Ua sau iā te aʻu ma te momoe ae ua ou ee leotele.+ 15  Ae ina ua faalogo o ia ua ou ee leotele ma tauvalaau atu, ona ia tuu lea o lona ofu i oʻu autafa ma sola i fafo.” 16  Ua ia teu lona ofu i ona autafa seʻia sau i le fale le matai o Iosefa.+ 17  Ona ia faamatala atu lea iā te ia o ia upu: “O le auauna Eperu na e aumai, ua sau iā te aʻu ina ia fai aʻu ma mea e ula ai nisi. 18  Ae ina ua ou ee i luga ma tauvalaau, ona ia tuua lea o lona ofu i oʻu autafa ae sola i fafo.”+ 19  Ua faalogo le matai o Iosefa i upu a lana avā ua fai atu iā te ia: “E faapea ma faapenei le mea na faia e lau auauna iā te aʻu,” ona matuā ita ai lea o ia.+ 20  Ona ave lea e le matai o Iosefa o ia ma tuu i le falepuipui, i le mea o loo taofia ai pagota a le tupu, ma ua ia nofo ai pea i le falepuipui.+ 21  Ae ua faatasi pea Ieova iā Iosefa ma faaalia pea le alofa faamaoni iā te ia, ma māfua ai ona fiafia le leoleo sili o le falepuipui iā te ia.+ 22  Ua tuu atu e le leoleo sili o le falepuipui le pule i lima o Iosefa i pagota uma o loo i le falepuipui; o ia foʻi e faatonuina mea uma ua latou faia i inā.+ 23  E leʻi vaai le leoleo sili o le falepuipui i se mea e tasi ua i ona lima, auā ua faatasi Ieova ma Iosefa ma ua taulau manuia+ mea uma ua ia faia ona o Ieova.

Faamatalaga Pito i Lalo