Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Kenese 32:1-32

32  Ua alu le malaga a Iakopo, ma ua fetaui ai o ia ma agelu a le Atua.+  Ona faapea ane lea o Iakopo ina ua ia vaai iā i latou: “O le ʻautau lenei a le Atua!”+ O le mea lea ua ia faaigoa ai lea mea o Maanaima.*+  Ona aauina atu lea e Iakopo o avefeʻau+ e muamua atu iā te ia i lona uso o Esau, i le laueleele o Seira+ le laufanua o Etoma,+  ua ia faatonu i latou e faapea: “O le tala lenei e fai atu iā Esau loʻu alii,+ ‘Ua faapea mai Iakopo lau auauna: “Ua leva ona ou aumau o se tagata ese ma Lapana seʻia oo mai lava i lenei vaitaimi.+  Ua oo foʻi ina ou maua o povi poʻa, o asini, o mamoe, o auauna tane, ma auauna teine,+ ma ua ou manaʻo e auina atu lenei feʻau i loʻu alii, ina ia e fiafia mai ai iā te aʻu.”’”+  Mulimuli ane ua toe foʻi mai avefeʻau iā Iakopo, ua faapea mai: “Na matou feiloaʻi ma lou uso o Esau, ma o loo sau foʻi o ia e faafetaui iā te oe faatasi ma tagata e toʻafā selau.”+  Ua matuā fefe lava Iakopo ma ua popole.+ Ona ia vaevae lea o tagata ua faatasi ma ia, o lafu mamoe ma ʻoti, o povi, ma kamela i vaega e lua,+  ua ia faapea atu: “Pe afai e sau Esau ma osofaʻia le tasi vaega, ae o loo totoe le isi vaega e mafai ona faasaoina ai.”+  Ua faapea atu Iakopo: “Ieova e, le Atua o loʻu tamā o Aperaamo, o le Atua foʻi o loʻu tamā o Isaako,+ o oe o lē ua fetalai mai iā te aʻu, ‘Ia e toe foʻi i lou laueleele ma lou aiga, ma ou te tausia lelei oe,’+ 10  e lē tatau iā te aʻu lou alofa faamaoni ma le agalelei uma ua e faaalia i lau auauna,+ auā na ou sopoʻia na o aʻu ma loʻu tootoo lenei Ioritana, a o lenei ua lua aʻu vaega.+ 11  Ou te tatalo atu iā te oe+ ina ia e laveaʻiina aʻu mai i lima o loʻu uso o Esau, ona ua ou fefe iā te ia neʻi sau ma osofaʻi iā te aʻu,+ o tinā atoa ma fanau. 12  A o oe, na e fetalai, ‘Ou te tausia lelei lava oe, ou te faatoʻateleina lau fanau e pei o le oneone i le sami, lea e lē mafai ona faitaulia ona o le tele.’”+ 13  Ua nofo ai pea o ia i inā i lenā pō. Ua ia sauni ni meaalofa mai i ana mea mo lona uso o Esau:+ 14  e lua selau ʻoti fafine, e lua sefulu ʻoti poʻa, e lua selau mamoe fafine, ma mamoe poʻa e lua sefulu, 15  e tolu sefulu kamela fafine ma a latou tama, e fā sefulu povi, e sefulu povi poʻa, e lua sefulu asini fafine ma asini e sefulu.+ 16  Ona ia tuuina atu lea o lafu taʻitasi i ana auauna, ma faaauau ona faapea atu i ana auauna: “Ia outou muamua atu iā te aʻu ma sopoʻia le ālia, ma ia va aʻi lea lafu ma lea lafu.”+ 17  Ua ia faatonu le auauna muamua e faapea: “Pe afai e faafetaui mai oe e loʻu uso o Esau ma fesili mai iā te oe, ‘O ai lou matai, ma o fea a e alu i ai, ma o ai e ona ia manu o loo muamua atu iā te oe?’ 18  Ona e fai atu lea, ‘O mea ia a lau auauna o Iakopo. O se meaalofa+ ua aumai mo oe loʻu alii+ Esau, faauta! o loo mulimuli mai o ia iā i matou.’” 19  Ua ia faatonu foʻi le lona lua, ma le lona tolu, faapea foʻi ma i latou uma o mulimuli i lafu, e faapea: “Ia faapenei ona outou fai atu iā Esau pe a outou fetaui ma ia.+ 20  E tou te faapea atu foʻi, ‘O loo mulimuli mai lau auauna o Iakopo iā i matou.’”+ Auā ua ia faapea ifo: “Atonu e mafai ona ou faafiafia lona loto i le meaalofa ua ou faamuamua atu,+ ma mulimuli ane ma te feiloaʻi ma ia. Atonu foʻi e na te talia lelei mai ai aʻu.”+ 21  Ua faamuamua ona sopoʻia atu o auauna ma meaalofa, a ua nofo o ia i le pō i le togālauapi.*+ 22  Ua ia tulaʻi foʻi i lenā pō ma ave ana avā e toʻalua,+ o ana auauna teine e toʻalua,+ o ona atalii e toʻasefulu tasi,+ ma sopoʻia le asaga o Iapoka.+ 23  Ua ia ave i latou ma momoli i le isi itu o le vanu ua iai le ālia,+ ua ia aumaia foʻi ma mea uma ua iā te ia. 24  Mulimuli ane ua tuua toʻatasi na o Iakopo. Ua sau se tamāloa ma ua la tauivi seʻia tafa mai o ata.+ 25  Ina ua iloa e le tamāloa o le a faiaʻina o ia,+ ua ia paʻi atu i le faʻiga o lona ogāvae; ona see ai lea o le faʻiga o le ogāvae o Iakopo a o la tauivi ma ia.+ 26  Ua mavae lea, ona ia fai mai lea: “Tuu mai aʻu seʻi oʻu alu, ona ua tafa mai ata.” Ua tali atu Iakopo: “Ou te lē tuu atu oe e te alu seʻiloga ua e faamanuia muamua mai iā te aʻu.”+ 27  Ua ia fai mai iā te ia: “O ai lou igoa?” ua tali atu o ia: “O Iakopo.” 28  Ona ia faapea mai lea: “E lē toe taʻua oe o Iakopo, ae o Isaraelu,*+ auā ua lua finau+ ma le Atua atoa ma tagata, ma ua e manumalo ai.” 29  Ua fesili atu Iakopo e faapea: “Faamolemole, seʻi taʻu mai lava lou suafa.” Ae ua ia faapea mai: “Aiseā ua e fesili ai i loʻu igoa?”+ Ona ia faamanuia lea iā te ia i inā. 30  Ua faaigoa e Iakopo lenā mea o Penieli,*+ auā ua faapea o ia, “Ua ou vaai i fofoga o le Atua ma ua laveaʻiina ai aʻu.”+ 31  Ua amata ona susulu atu le lā iā te ia a o ia agaʻi ese mai i Penueli, ae ua setusetu o ia ona o lona vae.+ 32  O le mea lea ua fai ai ma tū a tagata Isaraelu le lē aai i le uaua o le neula o le ogāvae, lea e maua i le faʻiga o le ogāvae, e oo mai lava i aso nei, ona ua paʻi le tamāloa i le faʻiga o le ogāvae o Iakopo, i le uaua o le neula o le ogāvae.+  

Faamatalaga Pito i Lalo

O lona uiga, o “ʻAutau e lua.”
O le upu Peretania o le camp. Tagaʻi i le Faaopoopoga e 13.
O lona uiga, ua “Finau le Atua” po o “Lē e Finau (pe finafinau) ma le Atua.”
O lona uiga, o “Fofoga o le Atua.”