Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Kenese 31:1-55

31  Ua faalogo Iakopo i tala ua faia e atalii o Lapana e faapea: “Ua ave e Iakopo mea uma a lo tatou tamā; ma ua tamaoaiga+ o ia ona o oloa a lo tatou tamā.”  Ua vaai atu Iakopo i foliga o Lapana, ua lē fiafia mai o ia e pei o le taimi muamua.+  Ona fetalai mai lea o Ieova iā Iakopo: “Ia e toe foʻi i le laueleele o ou tamā ma lou aiga,+ ou te faatasi pea ma oe.”+  Ua aami foʻi e Iakopo o Rasela ma Lea e ō atu i le fanua i le mea ua iai lana lafu,  ma ua ia faapea atu iā i laʻua: “Ua ou vaai atu i foliga o lo oulua tamā, ua lē fiafia mai o ia iā te aʻu e pei o le taimi muamua;+ ae ua faatasi ma aʻu le Atua o loʻu tamā.+  Ua oulua iloa na ou galue ma loʻu malosi atoa mo lo oulua tamā.+  Ua taufaaʻoleʻole foʻi lo oulua tamā iā te aʻu ma ua faasefulu ona ia fesuiaʻi loʻu totogi, ae ua lē faatagaina e le Atua o ia e faia se mea leaga iā te aʻu.+  Auā afai e faapea mai o ia, ‘O manu e ilailā o lou totogi,’ ona fanaua lea e le lafu atoa o manu e ilailā; ae afai e faapea mai o ia, ‘O manu e tusitusi o lou totogi,’ ona fanaua lea e le lafu uma o manu tusitusi.+  O le mea lea e faaauau ai ona aveese e le Atua le lafu a lo oulua tamā ma tuuina mai iā te aʻu.+ 10  Ina ua oo i le taimi ua fia feusuaʻi ai manu o le lafu, ona ou tepa aʻe lea ma ou vaaia se vaaiga i se miti,+ e tusitusi, ilailā ma pulepule+ ʻoti poʻa ua feosofi i luga o ʻoti fafine. 11  Ua faapea mai le agelu a le Atua moni iā te aʻu i le miti, ‘Iakopo e!’ ona ou tali atu lea, ‘O aʻu lenei.’+ 12  Ua ia faapea atili mai, ‘Faamolemole ia tepa aʻe ma vaai, e tusitusi, ilailā ma pulepule ʻoti poʻa ua feosofi i luga o ʻoti fafine, auā ua ou iloa mea uma ua faia e Lapana iā te oe.+ 13  O aʻu o le Atua moni o lē na faaali iā te oe i Peteli,+ i le mea na e uuina ai le maa faamanatu+ ma le mea sa e faia ai se tautoga iā te aʻu.+ O lea, inā tulaʻi ia ma alu ese mai i lenei laueleele ma toe foʻi atu i le laueleele na e fanau ai.’ ”+ 14  Ua tali mai Rasela ma Lea ma faapea mai iā te ia: “Po ua lē toe iai sa maʻua vaega o le tofi i le aiga o lo ma tamā?+ 15  Po ua lē avea ea i maʻua ma tagata ese iā te ia talu ona ia faatauina i maʻua, ua ia saga faaaogā foʻi le tupe ua tuuina mai mo i maʻua?+ 16  O tamaoaiga uma ua aveesea e le Atua mai i lo ma tamā, o mea ia a maʻua ma a ma fanau.+ O lea o mea uma ua fetalai atu ai le Atua iā te oe, ia e faia.”+ 17  Ua tulaʻi Iakopo ma faatiʻetiʻe lana fanau ma ana avā i luga o kamela;+ 18  ua ave lana lafu ma oloa uma na ia maua,+ o le lafu na ia maua mai i Patanarama, ina ia ō atu iā Isaako lona tamā i le atunuu o Kanana.+ 19  O le taimi foʻi lea ua alu atu ai Lapana e sele fulufulu o ana mamoe. Ae ua gaoia e Rasela faatagata*+ a lona tamā. 20  Ua faavalea e Iakopo iā Lapana le Suria, ona ua ia sola ae e leʻi taʻuina atu iā te ia. 21  Ua ia sola ese, o ia ma mea uma ua iā te ia ma ua sopoʻia le vaitafe o Eufirate.+ Mulimuli ane ona ia agaʻi atu lea i le vaega maugā o Kiliata.+ 22  Ua mavae aso e tolu, ona taʻu atu ai lea iā Lapana ua sola Iakopo. 23  Ona latou ō lea ma ona uso ua tuliloa+ atu iā te ia i le mamao e malaga ai i aso e fitu, ma maua atu ai o ia i le vaega maugā o Kiliata. 24  Ua faaali mai le Atua iā Lapana le Suria+ i se miti i le pō,+ ma fetalai mai iā te ia: “Ia e faaeteete ina neʻi e faia se tala lelei pe e leaga iā Iakopo.”+ 25  Ua alu atu Lapana iā Iakopo, auā ua faatū e Iakopo lona faleʻie i le mauga ma ua faatūina e Lapana ma lona ʻauaiga o latou faleʻie i le vaega maugā o Kiliata. 26  Ua faapea atu Lapana iā Iakopo: “O le ā lenei mea ua e faia, ua e faavaleaina aʻu ma ave oʻu afafine e pei o ni pagota o le taua?+ 27  Aiseā ua e sola faalilolilo ai ma faavalea aʻu ae e lē taʻu maia iā te aʻu, ina ia ou auina atu oe ma le olioli ma pesega,+ o topa* ma kitara?+ 28  E te leʻi tuuina mai foʻi se taimi ou te sogi ai i laʻu fanau ma oʻu afafine.+ Ua e faia ma le faavalea lenei mea. 29  E mafai ona ou faia se mea leaga iā te outou,+ ae peitaʻi na fetalai mai iā te aʻu anapō le Atua o lo outou tamā e faapea, ‘Ia e faaeteete ina neʻi e faia se tala lelei pe e leaga iā Iakopo.’+ 30  O lea ua e alu lava ona ua e matuā manaʻo e alu i le aiga o lou tamā, ae aiseā la ua e gaoia ai oʻu atua?”+ 31  Ua tali mai Iakopo iā Lapana: “Na ou alu ona o loʻu fefe.+ Ua ou faapea ifo iā te aʻu lava: ‘Atonu e te fao ese ou afafine mai iā te aʻu.’ 32  O le tagata e maua ai ou atua, ia aua neʻi ola o ia.+ I luma o o tatou uso ia e suʻe i aʻu mea po o iā te aʻu, ona e ave ai lea.”+ Ae e leʻi iloa e Iakopo na gaoi e Rasela ia faatagata.+ 33  Ona ulufale atu lea o Lapana i le faleʻie o Iakopo, ma le faleʻie o Lea, ma le faleʻie o teine pologa e toʻalua,+ ae na te leʻi maua ai. Ua ulufafo mai i le faleʻie o Lea ma ulufale atu i le faleʻie o Rasela. 34  Ua ave e Rasela ia faatagata ma tuu i totonu o le taga o le nofoa e nofo ai le fafine i luga o le kamela, ma ua nofo pea o ia i luga o ia mea. Ua alu atu Lapana ma suʻe le faleʻie atoa, ae ua lē maua ai faatagata. 35  Ua ia fai atu i lona tamā: “Loʻu alii e,+ aua e te ita, ina ua lē mafai ona ou tū i ou luma, ona ua oo iā te aʻu le tulaga e masani ai fafine.”+ Ua ia matuā saʻili ae e leʻi maua lava ia faatagata.+ 36  Ua ita+ Iakopo ma finau ma Lapana, ma ua tali mai Iakopo iā Lapana: “O le ā laʻu mea sesē na fai,+ o le ā foʻi laʻu agasala, ua ala ai ona e matuā tuliloaina mai aʻu?+ 37  O lenei ua uma ona e suʻesuʻe i aʻu mea uma, o ā la ni au mea ua e maua ai?+ Ia tuu ia mea i luma o oʻu uso ma ou uso,+ ina ia latou faia se faaiʻuga mo i taʻua.+ 38  O tausaga e lua sefulu na ou nofo ai ma oe. E leʻi fanau lē au au mamoe fafine ma au ʻoti fafine,+ ma ou te leʻi ʻaina foʻi mamoe poʻa o lau lafu. 39  Ou te leʻi avatua iā te oe se meaola ua saeia e se isi manu.+ Sa i oʻu luga lea manu ua leiloa. Pe a gaoia se manu i le ao po o le pō, e te tāpā mai iā te aʻu se totogi mo le manu.+ 40  O le mea na oo iā te aʻu, na ou tigāina i le vevela i le ao ma le mālūlū i le pō, ma e tau lē maua saʻu moe.+ 41  E lua sefulu tausaga na ou nofo ai i lou fale. Na ou galue iā te oe i tausaga e sefulu fā mo ou afafine e toʻalua, ma le ono tausaga mo lau lafu ma ua faasefulu ona e fesuiaʻi loʻu totogi.+ 42  Ana lē ʻau ma aʻu le Atua o loʻu tamā,+ o le Atua o Aperaamo ma le Atua na mataʻu i ai Isaako,+ semanū e te auina ese aʻu e aunoa ma se mea. Ua silasila mai le Atua i loʻu tigā ma galuega mamafa, ma sa ia aʻoaʻia ai oe anapō.”+ 43  Ua tali atu Lapana iā Iakopo: “O fafine nei o oʻu afafine i laʻua, o fanau nei, o fanau a aʻu fanau ma o le lafu o laʻu lafu, o mea foʻi o loo e vaai atu i ai o a matou mea ia ma oʻu afafine. O le ā se mea ou te faia iā i laʻua nei i le asō po o a la fanau ua la fanaua? 44  O lenei seʻi o ta osia se feagaiga,+ o oe ma aʻu, ina ia fai ma molimau i lo ta va.”+ 45  Ua ave e Iakopo se maa ma faatū e fai ma maa faamanatu.+ 46  Ona fai atu lea o Iakopo i ona uso: “Ia laʻu mai ni maa!” Ua latou laʻu maa ma fai ai se faaputuga maa.+ Ona latou aai ai lea i luga o le faaputuga maa. 47  Ua faaigoa e Lapana le faaputuga maa o Ikasetuta, ae ua faaigoa e Iakopo o Kaleta.* 48  Ua fai atu Lapana: “Ua fai lenei faaputuga maa ma molimau i lo ta va i le asō.” O lea, ua ia faaigoa ai lea mea o Kaleta,+ 49  ma le Olomatamata, ona ua ia faapea ane: “Ia silasila mai Ieova i lo ta va pe a teʻa eseese i taʻua.+ 50  Pe afai e te agaleaga i oʻu afafine+ ma afai foʻi e te toe faia nisi avā e ese mai i oʻu afafine, e ui e lē iloa e se tagata ae e silafia e le Atua o lē ua fai ma molimau iā i taʻua.”+ 51  Ua faapea atili atu Lapana iā Iakopo: “O le faaputuga maa lenei ma le maa faamanatu lenei ua ou faatūina e fai ma faailoga o le feagaiga i lo ta va. 52  Ua fai ma molimau lenei faaputuga maa ma ua fai foʻi ma molimau lenei maa faamanatu,+ ou te lē laasia lenei faaputuga maa ina ia tetee atu ai iā te oe, ma e te lē laasia foʻi lenei faaputuga maa ma lenei maa faamanatu e tetee mai iā te aʻu, ma faia se mea leaga iā te aʻu.+ 53  Ia fai le atua o Aperaamo,+ o le atua o Nakori,+ o le atua lea o lo laʻua tamā ma faamasino iā i taʻua.” Ae ua tautō Iakopo i le Atua na mataʻu i ai lona tamā o Isaako.+ 54  Ona faia lea e Iakopo o se taulaga i le mauga ma valaaulia lona ʻauaiga e aai i meaʻai.+ Ua latou aai i meaʻai ma momoe ai i lea pō i le mauga. 55  Ua usupō Lapana ma sogi+ atu i lana fanau, ma ona afafine ma faamanuia iā i latou.+ Ona alu malaga loa lea o ia ina ia toe foʻi atu i lona nuu.+

Faamatalaga Pito i Lalo

I le gagana Eperu, o le “Terafimi” o lona uiga o atua po o tupua o le aiga.
O se meafaifaaili e tagitagi. O le upu Peretania o le tambourine.
O le “Ikasetuta” o le upu Arama, ae o le “Kaleta” o le upu Eperu, o le uiga o nei igoa, o le “faaputuga maa e molimau ai.”