Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Kenese 30:1-43

30  Ua iloa e Rasela ua lē fanau o ia iā Iakopo, ona lotoleaga ai lea o Rasela i lona uso ma faapea mai iā Iakopo:+ “Ia aumai iā te aʻu se fanau, auā a leai o le a pei ai aʻu o se fafine ua oti.”+  Ona matuā ita ai lea o Iakopo iā Rasela ma ua ia faapea atu:+ “Po o aʻu ea o le Atua, o lē ua lē avatu iā te oe ni fanau?”+  Ua ia fai mai: “O laʻu teine pologa lenei o Pila.+ Ia lua feusuaʻi ma ia ina ia fanaua ai e ia se tamaitiiti e avea ma aʻu* tama, ina ia ou maua ai se fanau mai iā te ia.”+  Ua ia aumai iā te ia o Pila lana auauna teine e fai ma ana avā, ona feusuaʻi ai lea o Iakopo ma ia.+  Ua tō Pila ma mulimuli ane ua ia fanaua mai iā Iakopo se tama tama.+  Ua faapea ane Rasela: “Ua avea le Atua ma oʻu faamasino+ ma ua ia faafofoga mai i loʻu leo, o lea ua ia aumaia ai se tama tama.” O le mea lea ua ia faaigoa ai o ia o Tanu.*+  Ua toe tō foʻi Pila le auauna teine a Rasela, ma mulimuli ane ua ia fanaua mai iā Iakopo se tama tama lona lua.  Ua faapea ane Rasela: “O tauiviga malolosi na ma tauivi ai ma loʻu uso. Ua ou manumalo mai ai!” Ona ia faaigoa lea iā te ia o Nafatali.*+  Ua iloa e Lea ua lē toe fanau o ia, ona ia avatu lea o Selepa lana auauna teine iā Iakopo e fai ma ana avā.+ 10  Mulimuli ane, ua fanaua mai e Selepa o le auauna teine a Lea, se tama tama mai iā Iakopo. 11  Ua faapea ane Lea: “Maʻeu se faamanuiaga!” Ona ia faaigoa lea iā te ia o Kato.*+ 12  Mulimuli ane, ua fanaua e Selepa o le auauna teine a Lea, se tama tama lona lua mai iā Iakopo. 13  Ua faapea ane Lea: “Maʻeu loʻu fiafia! Auā o le a faaamuia+ mai fafine iā te aʻu.” Ona ia faaigoa lea iā te ia o Asera.*+ 14  I ona pō o le seleselega o saito,+ ua savali atu Reupena+ ma ia maua ai ni tutaima* i le fanua. Ona ia avatu lea i lona tinā o Lea. Ua fai atu Rasela iā Lea: “Faamolemole, seʻi aumai ni tutaima a lau tama ma aʻu.”+ 15  Ona fai mai lea o Lea iā te ia: “Po o se mea māmā ea, lou faoa o laʻu tane,+ a o lenei foʻi ua e toe manaʻo i tutaima a laʻu tama?” Ona faapea atu lea o Rasela: “O le mea lea, o le a lua momoe ai ma ia i le pō nei ae aumai ma aʻu tutaima a lau tama.” 16  A o sau Iakopo mai i le fanua i le afiafipō,+ ua alu atu Lea e faafetaui o ia ma faapea atu: “O le a ta momoe nanei auā ua ou faatauina lava oe i tutaima a laʻu tama.” Ona la momoe ai lea i le pō+ lenā. 17  Ua faafofoga ma tali mai le Atua iā Lea, ona tō ai lea o ia, ma mulimuli ane ua ia fanaua se tama tama lona lima mai iā Iakopo.+ 18  Ona fai ane lea o Lea: “Ua foaʻi mai e le Atua loʻu taui, auā na ou avatu laʻu auauna teine i laʻu tane.” Ona ia faaigoa lea iā te ia o Isakara.*+ 19  Ua toe tō Lea ma mulimuli ane ua ia fanaua se tama tama lona ono mai iā Iakopo.+ 20  Ua fai ane Lea: “Ua foaʻi mai e le Atua iā te aʻu se olaga talileleia. O le mea lea, o le a faapalepale ai laʻu tane iā te aʻu,+ auā ua ou fanaua ni tama tama se toʻaono mai iā te ia.”+ Ona ia faaigoa lea iā te ia o Sepulona.*+ 21  Mulimuli ane ua ia fanaua se tama teine ma ua ia faaigoa iā te ia o Tina.*+ 22  Ona manatua ai lea e le Atua o Rasela, ua faafofoga ma tali mai le Atua iā te ia, ma ua mafai ai ona fanau o ia.+ 23  Ua tō o ia ma fanaua se tama tama. Ona ia faapea ane lea: “Ua aveesea e le Atua loʻu luma!”+ 24  Ua ia faaigoa iā te ia o Iosefa,*+ i lona faapea ane: “Ua toe faaopoopo mai e Ieova iā te aʻu se isi tama tama.” 25  Ina ua mavae ona fanaua e Rasela o Iosefa, ona faapea atu lea o Iakopo iā Lapana: “Ia tuu mai aʻu ou te alu i loʻu nuu ma loʻu atunuu.+ 26  Tuu mai ia aʻu avā ma aʻu fanau, o ē na ou galue ai iā te oe, ina ia ou alu; auā ua e iloa na ou galue ma le faamaoni iā te oe.”+ 27  Ona fai mai lea o Lapana iā te ia: “Afai ua e alofa mai iā te aʻu, ia e nofo pea ia, auā ua ou faitauina faailoga, ma ou iloa ai o loo faamanuia Ieova iā te aʻu ona o oe.”+ 28  Ua ia toe faapea mai: “Ia taʻu mai iā te aʻu lou totogi ma ou te avatu iā te oe.”+ 29  Ona ia faapea atu lea: “Ua e iloa lelei le auala na ou galue ai mo oe ma laʻu tausiga lelei i lau lafu;+ 30  ae ou te leʻi sau sa itiiti ni mea na iā te oe, ae ua faateleina seʻia oo ina matuā tele lava, ua faamanuia oe e Ieova talu ona ou sau.+ O lea, o afea ea ou te faia ai se mea mo loʻu lava aiga?”+ 31  Ua ia fai mai: “O le ā se mea ou te avatu iā te oe?” Ua fai atu Iakopo: “E te lē aumaia se mea e tasi iā te aʻu!+ Ae afai e te faia lenei mea iā te aʻu, ou te toe tausia lau lafu.+ Ou te leoleoina pea.+ 32  Ou te alu atu i lau lafu atoa i le aso nei. Ia e tuuesea mamoe uma e ilailā ma pulepule, ma tamaʻi mamoe poʻa lanu eena malosi uma, o ʻoti fafine uma e pulepule ma ilailā. O mamoe, ma mamoe poʻa ma ʻoti uma faapena e fananau mai, o loʻu totogi lenā.+ 33  Pe a e sau e vaavaai i loʻu totogi+ i se aso, ona e iloa ai lea o loʻu faamaoni i la taʻua feutagaʻiga; afai e maua iā te aʻu o so o se ʻoti fafine lava e lē ilailā ma pulepule, ma tamaʻi mamoe poʻa e eena malosi, ona e iloa lea, o manu gaoi ia.”+ 34  Ua fai mai Lapana: “Manaia tele lea fuafuaga! Ia faia ia faapea.”+ 35  I lenā aso ua ia tuuese ai ʻoti poʻa uma e tusitusi ma pulepule, ma ʻoti fafine uma e ilailā ma pulepule, ma so o se manu e iai mea papaʻe, ma tamaʻi mamoe poʻa uma e eena malosi, a ua ia avatu i ona atalii latou te vaavaaia. 36  Ina ua mavae lea, ona ave lea e Lapana o ana lafu ma ō atu i se nofoaga e tusa lona mamao ma se faigāmalaga i aso e tolu mai i le mea o loo iai Iakopo, a ua leoleo e Iakopo o lafu a Lapana o loo totoe. 37  Ua aumai e Iakopo o fasilaau mata o le laau o le lipeno,+ o le laau o le sekati,+ ma le laau o le aremoni,+ ua ia saesae ese paʻu o ia fasilaau+ ma ua aliali mai ai ni mea papaʻe. 38  Ona ia tuu lea o fasilaau na ia sae i luma o le lafu, i alāvai o le faatanoa vai,+ i le mea e feinu ai manu, ina ia faaoso ai le fia feusuaʻi o manu pe a ō mai e feinu. 39  O le mea lea, e masani ona oso ai le fia feusuaʻi o lafu i luma o nei fasilaau, ona latou fanaua lea o manu e tusitusi ma ilailā ma pulepule.+ 40  Ua tuuese e Iakopo o tamaʻi mamoe poʻa ona faafaasaga lea o le lafu ina ia vāai i manu e tusitusi ma eena malosi i le lafu a Lapana. Ona ia tuuese ai lea o lana lava lafu ae e leʻi tuufaatasia ma lafu a Lapana. 41  O taimi uma lava e fia feusuaʻi ai manu o le lafu e malolosi,+ e tuu ai e Iakopo fasilaau i alāvai+ i luma o ia lafu, ina ia faaoso ai le fia feusuaʻi o manu ona o ia fasilaau. 42  Ae o manu o le lafu e vaivai e na te lē tuuina ai ni fasilaau. O lea, o Lapana e ona manu vaivai uma, ae o manu malolosi o manu ia a Iakopo.+ 43  Ua faateleina ma saga faateleina le tamaoaiga o le tamāloa, ua tele ana lafumanu, o ana auauna teine, o auauna tane, o kamela ma asini.+

Faamatalaga Pito i Lalo

I le gagana Eperu, ina ia “fanau se tamaitiiti i luga o oʻu tuli”
O lona uiga, o le “Faamasino.”
O lona uiga, “O Aʻu Tauiviga.”
O lona uiga, “Amuia.”
O lona uiga, “Fiafia” po o “Fiafiaga.”
O se tamaʻi laau o le ituaiga o le pateta ma e iai ni ona fua.
O lona uiga, “O Ia o le Taui.”
O lona uiga, o le “Nofoaga” pe “Aumau,” atonu foʻi e uiga atu i le “Faapalepale” po o le “Tulaga Alii.”
O lona uiga, ua “Faamasinoina” (e faasino atu foʻi i le Solofua po o le Faaeaina).
O lona uiga, “Tau Ina ia Faaopoopo e Ioa” (pe faateleina.)