Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Kenese 26:1-35

26  Ua iai se oge i le atunuu e ese mai i le oge na iai i aso o Aperaamo,+ ona alu ai lea o Isaako i Kira+ iā Apimeleko le tupu o tagata Filisitia.  Ona faaali mai lea o Ieova iā te ia ma fetalai mai:+ “Aua e te alu i Aikupito. Ia e nofo i faleʻie i le atunuu ua ou taʻu atu iā te oe.+  Ia e aumau o se tagata ese i lenei atunuu,+ ou te faatasi pea iā te oe ma faamanuia iā te oe, auā ou te tuuina atu iā te oe ma lau fanau o ia atunuu+ uma, ma ou te faataunuuina foʻi le tautoga na ou tautō ai i lou tamā o Aperaamo,+  ‘Ou te faatoʻateleina lau fanau e pei o fetu o le lagi, ou te tuuina atu i lau fanau ia atunuu uma;+ o lau fanau foʻi e maua ai e nuu uma o le lalolagi faamanuiaga,’+  talu ai sa faalogo Aperaamo i loʻu leo, ma faaauau ona tausia mea uma na ou fai atu ai iā te ia, o aʻu poloaʻiga, o aʻu aiāiga faaletulafono ma tulafono.”+  Ona nofo ai pea lea o Isaako i Kira.+  Ua fesili pea tamāloloa o lea nofoaga e faatatau i lana avā, ae ua ia faapea atu: “O loʻu tuafafine o ia.”+ Auā ua fefe o ia e fai atu, “O ia o laʻu avā” auā na ia faapea, “e fasiotia aʻu e tamāloloa o lea nofoaga ona o Repeka,” auā ua matuā lalelei o ia.+  Ua fai si umi o nofo ai o ia i inā, ma a o tilotilo atu i fafo Apimeleko le tupu o tagata Filisitia mai i lona faamalama ma matamata solo, ua ia iloa atu ai Isaako o loo fusifusi ma lana avā o Repeka.+  Ona aami loa lea e Apimeleko o Isaako ma faapea atu: “Tafēfē o ia o lau avā! Aiseā ua e fai mai ai, ‘O loʻu tuafafine o ia’?” Ua faapea mai Isaako iā te ia: “Na ou faia ona ua ou fefe neʻi teʻi ua ou oti ona o ia.”+ 10  A ua toe fai atu Apimeleko: “O le ā lenei mea ua e faia iā i matou?+ Pe ana faaumiumi ona faia faapea, semanū e momoe se tasi ma lau avā, ma matou nofosala ai!”+ 11  Ona poloaʻi lea o Apimeleko i tagata uma e faapea: “O so o se tasi e paʻi i lenei tamāloa ma lana avā, e fasiotia lava o ia!” 12  Mulimuli ane ona totō lea e Isaako o fatu i lenā laufanua,+ ma na ia maua ai le taʻiselau o fua+ i lea tausaga, auā ua faamanuia Ieova iā te ia.+ 13  Ona faatamaoaigaina lea o ia ma ua faateleina ma saga faateleina ana ʻoa, seʻia oo ina matuā mauʻoa lava.+ 14  Ua iā te ia o lafu mamoe, o lafu povi ma le tele o ana auauna,+ ona o lea ua lotoleaga ai tagata Filisitia iā te ia.+ 15  O vaieli uma na eli e auauna a lona tamā i aso o Aperaamo lona tamā,+ ua tatanu e tagata Filisitia ma ua latou faatumu i palapala.+ 16  Mulimuli ane ua fai atu Apimeleko iā Isaako: “Ia e alu ese mai i lo matou vaipanoa, auā ua sili ona e lima malosi nai lo o i matou.”+ 17  Ua alu ese Isaako mai i inā ma ua nofo i faleʻie i le vanu* o Kira.+ 18  Ona toe elia lea e Isaako o vaieli na latou eliina i aso o Aperaamo lona tamā, ia na tatanu e tagata Filisitia ina ua maliu Aperaamo;+ ua ia toe faaigoa i igoa na faaigoa ai e lona tamā.+ 19  Ua eli e auauna a Isaako totonu o le vanu ma ua latou maua ai le vai mamā. 20  Ua finau leoleo mamoe o Kira ma leoleo mamoe a Isaako,+ ua latou faapea atu: “O lo matou vai lea!” Ona ia faaigoa lea o le vaieli o Eseti, auā na latou fefinauaʻi ai ma ia. 21  Ua latou elia le isi vaieli, ma ua latou finau ai foʻi. Ona ia faaigoa lea o le vaieli o Setani. 22  Mulimuli ane, ua ia alu ese mai i lea mea, ma eli le isi vaieli,+ ae latou te leʻi finau ai. Ona ia faaigoa lea o lea vaieli o Reopo ma faapea: “Auā ua aumai e Ieova iā i tatou se fanua telē,+ ma ua ia faatoʻateleina i tatou i le laueleele.”+ 23  Ona ia alu ae ai lea mai lea mea i Peresepa.+ 24  Ua faaali mai Ieova iā te ia i le pō, ma fetalai mai: “O aʻu o le Atua o Aperaamo lou tamā.+ Aua e te fefe,+ auā ou te faatasi ma oe, ou te faamanuia atu iā te oe, ma faatoʻateleina lau fanau ona o Aperaamo laʻu auauna.”+ 25  Ua ia fausia se fata faitaulaga i inā ma valaau atu i le suafa o Ieova,+ ua ia faatū lona faleʻie i inā,+ ma ua ō atu auauna a Isaako ma eli ai se vaieli i lea mea. 26  Mulimuli ane, ua ō mai iā te ia o Apimeleko mai i Kira faatasi ai ma lana uō mamae o Aasata, ma Fikolu le pule o ana ʻautau.+ 27  Ua fai atu Isaako iā i latou: “Aiseā ua outou ō mai ai iā te aʻu, ae sa outou ʻinoʻino iā te aʻu ma tuliese aʻu mai i o outou vaipanoa?”+ 28  Ona latou faapea mai lea: “Ua matou matuā mautinoa ua faatasi Ieova ma oe.+ Ua matou faapea ane, ‘Seʻi o tatou faia se maliega o le filemu i lo tatou va,+ ma seʻi o matou osia se feagaiga ma oe,+ 29  e faapea e te lē faia se mea leaga iā i matou e pei ona matou lē faia o se mea leaga iā te oe, e pei foʻi ona matou faia na o mea lelei iā te oe, auā na matou auina ese oe ma le filemu.+ O lenei ua faamanuiaina oe e Ieova.’”+ 30  Ona ia faia lea o se taumafataga mo i latou, ma ua latou aai ma feinu.+ 31  Ua latou usupō i le taeao ma ua tautō le tasi i le isi.+ Ona aauina atu lea e Isaako o i latou ma le filemu.+ 32  O le aso foʻi lea ua ō mai ai auauna a Isaako ma taʻu mai iā te ia e uiga i le vaieli na latou elia,+ ua latou fai mai iā te ia: “Ua matou maua le vai!” 33  Ua ia faaigoa o lea vaieli o Sepa.* O le mea lea ua taʻua ai le aai o Peresepa,+ e oo mai i aso nei. 34  Ua oo ina fā sefulu tausaga o Esau. Ona ia fai avā lea iā Iutiti le afafine o Peeri le tagata Hetī, atoa foʻi ma Pasemeta le afafine o Aluna le tagata Hetī.+ 35  Ua avea i laʻua ma faatigā ulu iā Isaako ma Repeka.+

Faamatalaga Pito i Lalo

O le “vanu.” O le upu Eperu e mafai ona faasino atu i se vanu lea o loo tafe ai se ālia (Ke 26:19; 2Tu 3:16; Iop 30:6; Pe 6:11) po o le ālia. (1Tu 17:4; Sl 110:7) E tele ina mātūtū lenei vanu ae e iai taimi e tafe malosi mai ai le vai.
O lona uiga, o le “Tautoga,” po o le “Fitu.”