Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Kenese 23:1-20

23  Na ola Sara mo le selau lua sefulu fitu tausaga; o le umi lea o lona olaga.+  Ona maliu lea o Sara i Kiriata-arapa,+ o Heperona+ lea i Kanana,+ ua alu atu Aperaamo i le faleʻie ua faavauvau ma tagiauē ona o Sara.  Ona tulaʻi ese lea o Aperaamo mai i lana avā ua maliu, ma talanoa atu i atalii o Heti+ e faapea:  “O aʻu o se tagata ese ma lē e aumau iā te outou.+ Ia faatau mai iā te aʻu se fasi fanua mai i o outou fanua, e fai ma tuugamau e tanu ai laʻu avā ua maliu.”+  Ua tali mai atalii o Heti iā Aperaamo e faapea:  “Le alii e,+ ia e faafofoga mai iā i matou. O oe o le taʻitaʻi ua filifilia e le Atua ma ua nonofo faatasi ma i matou.+ Ia tanu lou faletua ua maliu i o matou tuugamau aupito lelei.+ E leai se isi o i matou e na te vavao iā te oe mai i le tuuina o lou faletua i o matou tuugamau.”+  Ona tulaʻi lea o Aperaamo ma ifo atu i tagatānuu,+ o atalii o Heti,+  ma faapea atu iā i latou: “Pe a outou malilie ou te tanu i laʻu avā, ia ou lē toe vaai i ai, ia faafofoga mai iā te aʻu ma talosaga atu mo aʻu iā Eferona le atalii o Soaro,+  ina ia tuuina mai e ia iā te aʻu le ana o Makapelu,+ o loo iā te ia i le taufaasiʻusiʻuga o lona fanua. Ia faatau mai iā te aʻu i o outou luma e tusa ma le aofaʻiga o siliva e tatau ona faatau ai, ina ia fai ma tuugamau.”+ 10  Ae ua nofo Eferona faatasi ma atalii o Heti. Ona tali mai lea o Eferona le tagata Hetī+ iā Aperaamo a o faafofoga atalii o Heti ma i latou uma ua ulu mai i le faitotoʻa o le aai e faapea:+ 11  “E leai, loʻu alii e! Ia faafofoga mai iā te aʻu. Ou te foaʻi atu iā te oe le fanua, ma le ana o loo iai ou te foaʻi atu iā te oe. Ou te foaʻi atu iā te oe i luma o atalii o oʻu tagata.+ Ia e tanu ai lou faletua ua maliu.” 12  Ona ifo atu lea o Aperaamo i luma o tagatānuu 13  ma fai atu iā Eferona a o faafofoga tagatānuu: “E lelei pe a e faalogo mai iā te aʻu! Se e leai, ia e faalogo mai iā te aʻu! Ou te avatu iā te oe le aofaʻiga o siliva mo le fanua. Ia ave nei siliva+ ina ia ou tanu ai si aʻu avā i inā.” 14  Ona tali mai lea o Eferona iā Aperaamo e faapea: 15  “Loʻu alii e, faafofoga mai ia iā te aʻu. Po o se mea telē ea i lo taʻua va le tau o le fasi fanua e fā selau sekeli siliva?* Ia tanu ai lou faletua ua maliu.”+ 16  Ua faalogo Aperaamo iā Eferona ma ua fua e Aperaamo le aofaʻiga o siliva iā Eferona, lea na ia taʻu atu a o faafofoga mai atalii o Heti, e fā selau sekeli siliva e tusa ma fefaatauaʻiga e masani ai ē e faatauʻoa.+ 17  O le fanua o Eferona o loo i Makapelu lea o loo i luma o Mamere, o le fanua ma le ana o loo iai ma laau uma o le fanua,+ i ona tuaoi uma e soo ai, ua faamaonia+ 18  iā Aperaamo o lona lava fanua lenei ua ia faatauina i luma o atalii o Heti ma i latou uma ua ulu mai i le faitotoʻa o lana aai.+ 19  Ona tanu ai lea e Aperaamo o lana avā o Sara i le ana o le fanua o Makapelu lea o loo i luma o Mamere, o Heperona lea i Kanana.+ 20  O lea, ua faamaonia ai iā Aperaamo le fanua ma le ana o loo iai, e fai ma ona fanua e tanu ai ē ua oti, ma ua tutupu nei mea i luma o atalii o Heti.+

Faamatalaga Pito i Lalo

O le “sekeli” o le mamafa lea o le tupe Eperu. Tagaʻi i le Faaopoopoga e 14.