Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Kenese 19:1-38

19  Ua taunuu agelu e toʻalua i Sotoma i le afiafipō, a o nofo Lota i le faitotoʻa o le pā o Sotoma.+ Ina ua iloa atu e Lota i laʻua, ua ia alu atu ma faafeiloaʻi i laʻua ma ifo i le eleele.+  Ona ia faapea atu lea: “Faamolemole oʻu alii e, maliu mai ia i le fale o la oulua auauna, ma fufulu+ ai o oulua aao ma tofafā ai i le pō nei. A aulia taeao ona oulua malaga pō ai lea.”+ Ua la faapea mai: “E leai, e ma te momoe i le nofoaga faitele i le pō nei.”+  Ae ua ia tauanau iā i laʻua,+ ona la afe ai lea i lona fale. Ona ia faia lea o se taumafataga mo i laʻua,+ ua ia tao falaoa lē faafefeteina+ ma ua la taumamafa ai.  A o leʻi taooto i laʻua e momoe, ua siʻosiʻomia le fale e tamāloloa o le aai,+ o tamāloloa o Sotoma, o tama e oo lava i toeaina, o le motu o tagata o loo vāvāō.+  Ua latou valaau mai pea iā Lota: “O fea tamāloloa na ō mai i lou fale i le pō lenei? Aumai i laʻua seʻi matou feusuaʻi.”+  Ona alu atu lea o Lota i fafo iā i latou, a ua ia tapuni le faitotoʻa o le fale.  Ua ia fai atu: “Faamolemole oʻu uso e, aua tou te faia se mea matagā.+  Faamolemole seʻi faalogo mai, e iai oʻu afafine e toʻalua e leʻi feusuaʻi lava ma ni tane.+ Ou te aumaia i laʻua iā te outou. Ia faitalia outou i le mea e fai iā i laʻua.+ A ia aua neʻi faia se mea i nei tamāloloa,+ auā ua puipuia i laʻua i lalo ifo o loʻu fale.”+  Ua latou fai mai: “Alu ese ma le faitotoʻa!” Ua latou faapea ane: “Ua sau lenei tamāloa e aumau+ i nei, a o lea ua matuā fia fai ma faamasino.+ O le a sili atu la ona leaga le mea matou te faia iā te oe nai lo i laʻua.” Ua latou matuā tulei atu iā Lota,+ ma ua toetoe a malepe ai le faitotoʻa.+ 10  Ua aapa atu tamāloloa* ma toso mai Lota i totonu o le fale, ma ua la tapuni le faitotoʻa. 11  Ae ua la faatauasoina tamāloloa ua i le faitotoʻa o le fale,+ e mai lava i ē e lāiti e oo i ē e matutua,+ ma ua lailoa ai i latou e autago le faitotoʻa.+ 12  Ona fai atu lea o tamāloloa iā Lota: “Pe e iai nisi o lou aiga o i inei? Ia aveese mai i lenei mea o tane a ou afafine, o ou atalii, o ou afafine ma i latou uma ua iā te oe i lenei aai!+ 13  Auā o le a ma faaumatia lenei aai, ona ua leotele le alaga faaseā iā i latou i luma o Ieova,+ o lea ua aauina mai ai e Ieova i maʻua e faaumatia lenei aai.”+ 14  Ua alu atu Lota ma taʻu i tane a ona afafine o ē o le a faaipoipo i ona afafine, ma fai atu pea: “Ia faavave! Ia ō ese mai i lenei mea, auā o le a faaumatia e Ieova le aai!”+ Ae i manatu o tane a ona afafine e foliga mai o loo tausua+ o ia. 15  Ae peitaʻi, ina ua tafa mai o ata, ona faavave atu lea o agelu iā Lota ma faapea atu: “Ia faavave! Ia ave lau avā ma ou afafine e toʻalua o loo i inei,+ neʻi faaumatia oe pe a faaumatia le aai ona o ana agasala!”+ 16  Ua faifaiaga pea o ia,+ ae ona o le alofa mutimutivale o Ieova iā te ia,+ ua fetagofi atu ai tamāloloa i lona lima, ma lima o lana avā, ma lima o ona afafine e toʻalua, ua la aveese atu o ia ma tuu i fafo o le aai.+ 17  Ua taʻitaʻiina i latou e i laʻua i tua o le aai, ona ia faapea atu loa lea: “Inā sola ia e te ola ai!+ Aua neʻi toe tepa i tua+ ma aua neʻi tū i le vaipanoa o le Itumalo atoa!+ Ia sola i vaega maugā ina neʻi faaumatia oe!”+ 18  Ona fai mai lea o Lota iā i laʻua: “Se faamolemole Ieova, e leai! 19  Faamolemole, ua e finagalo malie i lau auauna,+ ua e faaali le tele o lou alofa faamaoni+ i le faasaoina o aʻu,+ ae o aʻu, ou te lē mafai ona ou sola atu i vaega maugā, neʻi maua aʻu i se mala ma ou oti ai.+ 20  Faamolemole lava, o loo latalata mai se aai ou te sola atu i ai, ma o se mea itiiti+ lea. Pe e mafai ona ou sola atu i inā ma ou ola ai pea,+ po ua lē na o sina mea itiiti ea?” 21  Ona faapea atu lea o ia: “O lenei, ou te faaali atu loʻu manatu mamafa iā te oe,+ i loʻu lē faaumatiaina o le aai ua e fai mai ai.+ 22  Ia faavave! Ia sola atu i o, auā ou te lē faia lava se mea seʻi vaganā ua e taunuu i o!”+ O le mea lea ua ia faaigoa ai le aai o Soara.*+ 23  Ua alu aʻe le lā i luga o le laueleele ina ua taunuu Lota i Soara.+ 24  Ona faatotō faaua ifo lea e Ieova mai i le lagi, o le teiō* ma le afi mai iā Ieova, i luga o Sotoma ma Komoro.+ 25  Ua ia faaumatia nei aai ma le Itumalo atoa, o i latou sa nonofo ai i ia aai atoa foʻi ma laau o le fanua.+ 26  Ua tepa i tua lana avā o lē sa mulimuli atu iā te ia, ona liu tupua masima+ ai lea o ia. 27  Ua alu atu Aperaamo i le taeaopō i le mea na ia tū ai i luma o Ieova.+ 28  Ona ia vaai ifo lea agaʻi i Sotoma ma Komoro ma le vaipanoa uma o le Itumalo, ma ua ese le vaaiga ua ia iloa atu. Auā foʻi, ua alu aʻe mai i le laueleele le asu tele e pei o se asu mai i se ogaumu e tunu ai piliki!+ 29  Ina ua faaumatia e le Atua aai o le Itumalo, na manatua pea e le Atua Aperaamo i le faia o se gaoioiga e aveesea ai Lota mai i le faaumatiaga, ina ua ia faaumatia aai sa nofo ai Lota.+ 30  Mulimuli ane, ona ō aʻe lea o Lota faatasi ma ona afafine e toʻalua+ mai i Soara, ma nonofo ai i vaega maugā, auā ua fefe o ia e nonofo pea i Soara.+ Ona nonofo lea o ia ma ona afafine e toʻalua i le ana. 31  Ua fai atu le ulumatua i le teine laʻitiiti: “Ua matua lo taʻua tamā, ma ua leai se tamāloa i inei ta te faaipoipo i ai e pei ona masani ona faia e tagata.+ 32  Seʻi ta avatu i lo taʻua tamā le uaina e inu ai,+ ona tatou momoe ai lea ma ia, ina ia faaauau ai le gafa o lo taʻua tamā.”+ 33  Ua la avatu pea i lo laʻua tamā le uaina e inu ai i lenā pō;+ ona alu atu lea o le ulumatua ma ua momoe ma lona tamā, a ua lē iloa e lona tamā le taimi na la momoe ai, ma toe alu ese ai o ia. 34  Ua oo i le aso na sosoo ai, ua fai atu le ulumatua i le laʻitiiti: “O lea na ma momoe ma loʻu tamā anapō. Seʻi o ta toe avatu le uaina iā te ia nanei. Ona e alu lea lua te momoe ma ia ina ia faaauau ai le gafa o lo taʻua tamā.” 35  Ua la avatu pea i lo laʻua tamā le uaina e inu ai i lenā foʻi pō; ona alu atu lea o le teine laʻitiiti ma momoe ma ia, a ua lē iloa e lona tamā le taimi na la momoe ai ma toe alu ese ai o ia. 36  Ua totō uma afafine o Lota i lo laʻua tamā.+ 37  Ua mavae se taimi, ona fanaua lea e le ulumatua o se tama tama, ma ua ia faaigoa o ia o Moapi.+ O ia o le tamā o tagata Moapi i aso nei.+ 38  A o le laʻitiiti ua ia fanaua se tama tama, ua ia faaigoa o Pename. O ia o le tamā o tagata Amoni+ i aso nei.

Faamatalaga Pito i Lalo

O nei tamāloloa o agelu ia na liutino tagata.
O lona uiga, o le “Itiiti.”
O le elemeni samasama e faigofie ona mū e iai sona manogi malosi. I le faa-Peretania o le sulphur.