Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Kenese 11:1-32

11  Sa tautatala le lalolagi uma i le gagana e tasi, ma e tutusa upu sa faaaogāina.  A o latou malaga atu i le itu i sasaʻe, na latou tau atu ai i se vanu laugatasi i laufanua o Senara,+ ma na latou nonofo ai i inā.  Ona faapea ane lea o le tasi i le isi: “Ō mai ia! Seʻi tatou faia ni piliki ma tunu i le afi.” Na avea piliki ma maa mo i latou, a o le tā sa fai ma mea e sosoo ai piliki.+  Ona latou faapea ane lea: “Ō mai ia! Seʻi o tatou fausia se aai ma se ʻolo e oo lona tumutumu i le lagi,+ ina ia taʻutaʻua ai i tatou,+ ina neʻi taapeape solo i tatou i le fogāeleele.”+  Ona afio ifo ai lea o Ieova e silasila i le aai ma le ʻolo lea o loo faia e atalii o tagata.+  Ua fetalai ane Ieova: “Faauta! e tasi le nuu ma e tasi foʻi le gagana e tautatala ai,+ a o lea ua latou faia lenei mea. Po o ā lava mea latou te mananaʻo e fai, e mafai lava ona latou faia.+  Sau ia! Seʻi o ta*+ ō ifo ma faafenuminumiaʻi+ la latou gagana, ina ia lē malamalama ai le tasi i le gagana a le isi.”+  Ona faataapeapeina lea o i latou e Ieova mai i lea mea i le lalolagi atoa,+ ma ua latou tuua ai le fausiaina o le aai.+  O le mea lea ua faaigoa ai lea nofoaga o Papelu,+ auā o i inā na faafenuminumiaʻi ai e Ieova le gagana a le lalolagi, ma na faataapeapeina+ e Ieova i latou mai i lea mea i le lalolagi atoa. 10  O le talaaga lenei o Semu.+ O le selau o tausaga o Semu, na fanaua ai e ia o Afasata,+ i le lua o tausaga talu ona mavae le lolo. 11  Na ola Semu mo le isi lima selau tausaga, ina ua mavae ona fanaua e ia o Afasata. Ua fanaua foʻi e ia o atalii ma afafine.+ 12  Na ola Afasata* mo le tolu sefulu lima tausaga. Ona fanaua lea e ia o Selaa.+ 13  E fā selau ma le tolu isi tausaga sa ola ai Afasata ina ua mavae ona fanaua e ia o Selaa. Ua fanaua foʻi e ia o atalii ma afafine. 14  Na ola Selaa mo le tolu sefulu tausaga. Ona fanaua lea e ia o Eperu.+ 15  E fā selau ma le tolu isi tausaga sa ola ai Selaa, ina ua mavae ona fanaua e ia o Eperu. Ua fanaua foʻi e ia o atalii ma afafine. 16  Na ola Eperu mo le tolu sefulu fā tausaga. Ona fanaua lea e ia o Peleko.+ 17  E fā selau ma le tolu sefulu isi tausaga sa ola ai Eperu, ina ua mavae ona fanaua e ia o Peleko. Ua fanaua foʻi e ia o atalii ma afafine. 18  Na ola Peleko mo le tolu sefulu tausaga. Ona fanaua lea e ia o Reu.+ 19  E lua selau ma le iva isi tausaga sa ola ai Peleko, ina ua mavae ona fanaua e ia o Reu. Ua fanaua foʻi e ia o atalii ma afafine. 20  Na ola Reu mo le tolu sefulu lua tausaga. Ona fanaua lea e ia o Seruka.+ 21  E lua selau ma le fitu isi tausaga sa ola ai Reu, ina ua mavae ona fanaua e ia o Seruka. Ua fanaua foʻi e ia o atalii ma afafine. 22  Na ola Seruka mo le tolu sefulu tausaga. Ona fanaua lea e ia o Nakori.+ 23  E lua selau isi tausaga sa ola ai Seruka ina ua mavae ona fanaua e ia o Nakori. Ua fanaua foʻi e ia o atalii ma afafine. 24  Na ola Nakori mo le lua sefulu iva tausaga. Ona fanaua lea e ia o Tara.+ 25  E selau sefulu iva isi tausaga sa ola ai Nakori ina ua mavae ona fanaua e ia o Tara. Ua fanaua foʻi e ia o atalii ma afafine. 26  Na ola Tara mo le fitu sefulu tausaga. Ona fanaua lea e ia o Aperamo,+ o Nakori+ ma Karana. 27  O le talaaga lenei o Tara. Na fanaua e Tara o Aperamo, o Nakori, ma Karana; ma na fanaua e Karana o Lota.+ 28  Mulimuli ane ona oti lea o Karana a o ola pea Tara lona tamā i le nuu na ia fanau ai, o Uro+ i Kaletaia.+ 29  Ona fai avā ai lea o Aperamo ma Nakori. O le igoa o le avā a Aperamo o Sarai,+ a o le igoa o le avā a Nakori o Meleka,+ o le afafine o Karana, o le tamā o Meleka ma le tamā foʻi o Iseka. 30  A o Sarai ua faaauau pea ona lē fanau o ia;+ e leai sana tama. 31  Ona ave lea e Tara o lona atalii o Aperamo, ma Lota le atalii o Karana, o le atalii lea o lona atalii,+ ma Sarai+ le avā a lona atalii, o le avā lea a Aperamo. Na latou ō ese faatasi mai i le aai o Uro i Kaletaia ina ia malaga atu i Kanana.+ Mulimuli ane, na latou taunuu i Karana,+ ma nonofo ai i inā. 32  Na ola Tara mo le lua selau ma le lima tausaga. Ona maliu ai lea o Tara i Karana.

Faamatalaga Pito i Lalo

I le gagana Eperu e mafai foʻi ona faasino atu lenei upu i le “toʻalua” po o le “toʻatele.”
O loo taʻua e le Tusi Paia Eleni o le Septuagint le igoa o Kainano i le va o Selaa ma Afasata. Tagaʻi i le Lu 3:36.