Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Isaia 66:1-24

66  O le fetalaiga lenei a Ieova: “O le lagi o loʻu nofoālii lea,+ a o le lalolagi o le mea lea e tū ai oʻu vae.+ O fea la le fale e tou te faia mo aʻu,+ o fea foʻi le mea ou te mālōlō ai?”+  “O nei mea uma na faia e oʻu lava lima, o le mea lea ua māfua ai ona iai nei mea uma,”+ ua fetalai mai ai Ieova. “A o lenei le tagata ou te vaai i ai, o ia lea ua mafatia ma nutimomomo lona agaga,+ ma ua gatete i laʻu upu.+  “O lē ua fasia le povi poʻa, ua pei o lē ua fasiotia se tamāloa.+ O lē e faia taulaga i le mamoe, ua pei o lē ua gausia le ua o le taʻifau.+ O lē e ofoina atu se meaalofa, ua pei o lē e ofoina atu le toto o le puaa!+ O lē e ofoina atu se faamanatuga o lipano,+ ua pei o lē e fai atu se faamanuiaga i ni upu faataulāitu.+ O i latou foʻi ia ua latou filifilia o latou lava ala, ma ua fiafia o latou lava loto i a latou mea inosia.+  A o aʻu, ou te filifilia ala e faapuapuagatia ai i latou;+ ou te aumaia foʻi i o latou luga mea e faamataʻu ai i latou;+ talu ai na ou valaau atu, ae e leai se isi na tali mai;+ na ou tautala atu, ae e leai se isi na faalogo mai; na latou faia pea mea leaga i laʻu vaai, ma na latou filifilia le mea ou te lē fiafia i ai.”+  Inā faalogo mai ia i le afioga a Ieova, o outou o ē e gatete i ana upu:+ “O o outou uso o ē ua ʻinoʻino iā te outou,+ ua latou faaesea outou ona o loʻu igoa,+ ma faapea ane, ‘Ia faamamaluina Ieova!’+ E faaali mai o Ia ma le olioli ona o outou,+ ae o i latou ia o le a faamāina.”+  Ua iai le leo o le vāvāō mai i le aai, o le leo mai i le malumalu!+ O le leo o le vāvāō o le taui atu ua tatau a Ieova i ona fili.+  Ua fanau o ia a o leʻi oo ina tigā o le a fanau.+ Ua fanau mai e ia se tama tama a o leʻi oo ina faatigā o le a fanau.+  O ai na faalogo i se mea faapenei?+ O ai na vaai i ni mea faapenei?+ Pe e fanau mai ea se laueleele+ i le tigā a fanau i se aso e tasi?+ Pe e fanau ea se nuu+ i se taimi e tasi?+ Auā ua faatigā o le a fanau Siona ma ua fanaua mai e ia o lana fanau tama.  “A o aʻu, po ou te tatalaina ea le faaautama ae e taofia le fanau mai o le tama?”+ ua fetalai mai ai Ieova. “Po ou te faapogaia ea le fanau mai ae ou te toe punitia le faaautama?” ua fetalai mai ai lou Atua. 10  Ia olioli faatasi ma Ierusalema ma fiafia iā te ia,+ o outou o ē e alolofa iā te ia.+ Ia matuā fiafia faatasi ma ia, o outou uma o ē o loo faavauvau pea ona o ia;+ 11  talu ai o le a outou fesusui ma faamalieina ai mai i le susu o lona matuā faamāfanafana mai; auā foʻi o le a outou fesusui ma tofo i le matuā fiafia mai i le matāsusu o lona mamalu.+ 12  Auā o le fetalaiga lenei a Ieova: “O aʻu lenei, ou te avatu iā te ia le filemu e pei o le vaitafe,+ ou te avatu foʻi iā te ia le mamalu o atunuu e pei o se vaitafe ua tafe tetele,+ ma e tou te fesusui ai.+ O le a afisi outou i lona itu ma ave ai, e tausia ma le alofa outou i ona vae.+ 13  E pei o se tagata e faamāfanafana pea i ai lona tinā, e faapea foʻi ona ou faamāfanafana iā te outou;+ e faamāfanafanaina outou ona o Ierusalema.+ 14  O le a vāai outou, ona olioli ai lea o outou loto,+ e tupu olaola foʻi o outou ivi+ e pei o le mutia muʻamuʻa.+ O le a iloa e ana auauna+ le aao o Ieova, ae o le a ia taʻusalaina ona fili.”+ 15  “Auā e afio mai Ieova lava ia e pei o le afi,+ ma ana kariota e pei o le matagi malosi,+ o le a ia taui atu iā i latou i lona ita ma lona toʻasā ma le afi mumū o ana aʻoaʻiga malosi.+ 16  Auā e pei o le afi o le a faapea ona faaoo atu e Ieova lana faasalaga, atoa foʻi ma le pelu+ e faasagatau ai i tagata uma; ma e toʻatele o le a fasiotia e Ieova.+ 17  O i latou ua faapaiaina ma faamamāina i latou ina ia ō atu i togālaau,+ ma tutū i tua o lē o loo i le ogatotonu, e aai i le aano o le puaa,+ ma le mea inosia e oo i le isumu e osooso,+ o le a oo faatasi mai lo latou iʻuga,” ua fetalai mai ai Ieova. 18  “E tusa ai ma a latou galuega+ ma o latou manatunatuga,+ ou te alu atu ina ia faapotopotoina atunuu uma ma gagana;+ e latou te ō mai foʻi ma iloa loʻu mamalu.”+ 19  “O le a ou faatū se faailoga iā i latou,+ o le a ou aauina atu nisi o i latou ua sao i atunuu+ o Tasesa,+ o Pula ma Luti,+ o ē ua loloʻu le ʻaufana, o Tupalu ma Iavana,+ o motu tū mamao,+ o ē e leʻi faalogo i se faamatalaga e uiga iā te aʻu pe vāai i loʻu mamalu;+ o le a latou taʻutaʻu atu lava i atunuu loʻu mamalu.+ 20  E latou te aumaia o outou uso mai i atunuu+ uma o se meaalofa iā Ieova,+ i luga o solofanua, i kariota, i taavale toso, i luga o asini,* ma kamela fafine televavave,+ ma avatu i loʻu mauga paia,+ o Ierusalema lea,” ua fetalai mai ai Ieova, “e pei lava ona aumaia e le fanauga a Isaraelu le meaalofa i se ipu mamā i le fale o Ieova.”+ 21  “Ou te aumai mai iā i latou nisi e fai ma ositaulaga ma nisi e fai ma sa Levī,” ua fetalai mai ai Ieova. 22  “Auā e pei ona tumau i oʻu luma o le lagi fou+ ma le lalolagi fou+ lea o loo ou faia,”+ ua fetalai mai ai Ieova, “e faapea foʻi ona tumau pea o a outou fanau+ ma lo outou igoa.”+ 23  “E moni, o le a ō mai lava tagata uma ina ia ifo mai iā te aʻu mai i lea masina faatoʻā vaaia ma lea masina faatoʻā vaaia, e mai i lea sapati ma lea sapati,”+ ua fetalai mai ai Ieova. 24  “O le a latou ō atu ma vāai i tino o tagata oti na solitulafono iā te aʻu;+ e lē mamate foʻi ilo o loo i o latou tino, e lē tineia lo latou afi,+ ma e avea i latou ma mea e inosia e tagata uma.”+

Faamatalaga Pito i Lalo

Po o le “miula,” lea e maua mai i le upu Eperu e faasino atu i le tama a le asini poʻa ma le solofanua fafine.