Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Isaia 59:1-21

59  Faauta! E leʻi faapuupuuina le aao o Ieova ua lē mafai ai ona faaolaina,+ e lē punitia foʻi ona taliga ua lē mafai ai ona faafofoga.+  E leai, ae o a outou lava mea sesē, ua fai ma mea e fevaevaeaʻi ai outou ma lo outou Atua,+ ma o a outou agasala ua māfua ai ona natia ona fofoga, ua lē faafofoga mai ai o ia iā te outou.+  Auā ua faaleagaina o outou lava alofilima i le toto,+ ma o outou tamatamaʻilima ua faaleagaina i mea sesē. Ua tautatala o outou laugutu i tala pepelo.+ Ua magamagagū o outou laulaufaiva i mea e matuā lē tonu.+  E leai se isi ua valaau atu i le amiotonu,+ e leai foʻi se isi ua alu i le faamasinoga ma le faamaoni. Ua faatuatuaina mea lē moni,+ ma tautala i mea lē aogā.+ Ua faufau i mea leaga ma ua fanau mai ai mea e tigā ai.+  Ua latou fofoa mai fua o le gata uogo, ua latou lalaga foʻi le faamoega o le apogaleveleve.+ O so o se tasi e ʻaina fua o le gata uogo o le a oti, ma o le fua na solia, e fofoa mai ai le gata feʻai.+  E lē avea ia faamoega e fai ma ofu, pe ufitia foʻi i latou i a latou galuega.+ O a latou galuega, o galuega ia e tigā, ma ua iai gaoioiga sauā i o latou alofilima.+  Ua taufetuli o latou vae ina ia faia mea leaga,+ ua televave foʻi i latou e sasaa le toto o ē e lē sala.+ O o latou manatu o manatu e tigā ia;+ ua i o latou ala tetele le faatafunaina ma le lepetia o mea.+  Ua latou lē amanaʻia le ala o le filemu,+ ua leai foʻi se faamasinotonu i o latou auala.+ Ua latou faapiʻopiʻoina o latou ala tetele mo i latou lava.+ E leai se isi e savali ai e iloa le filemu.+  O le mea lea ua mamao ai le faamasinotonu mai iā i matou, ua lē maua mai foʻi i matou e le amiotonu. Ua matou faamoemoe pea mo le malamalama, ae silasila foʻi! o le pogisa; ua matou faamoemoe foʻi mo le pupula, ae ua matou savavali pea i le pōuliuli.+ 10  Ua matou tautagotago mo le pā e pei o tagata tauaso, ua matou tautagotago atu lava e pei o ē ua leai ni mata.+ Ua matou tau sūsūlu i le aoauli e pei o le afiafipō; ua pei i matou o ni tagata feoti pe a faatasi ma ē ua malolosi.+ 11  O i matou uma, ua matou gu e pei o ni pea; ma ua tagi faanoanoa e pei o le olo o le lupe.+ Ua matou faamoemoe pea mo le faamasinotonu,+ ae e leai; ua matou faamoemoe mo le faaolataga, ae ua mamao ese ma i matou.+ 12  Ua faateleina a matou fouvalega i ou luma;+ ua taʻitasi ma molimau a matou agasala faasaga iā i matou.+ Ua iā i matou a matou fouvalega; ua matou iloa lelei foʻi a matou mea sesē.+ 13  Ua iai le solitulafono ma le faafitia o Ieova;+ o le solomuli foʻi mai i lo matou Atua, o le tautala e uiga i le sauā ma le fouvale,+ o le faufau leaga i tala pepelo mai i le loto ma magamagagū ai.+ 14  Ua tuu i tua le faamasinotonu,+ ua tū mamao foʻi le amiotonu.+ Ua tautevateva le upu moni i nofoaga faitele, ua lē mafai ona ulu atu i ai o le mea ua saʻo.+ 15  Ua leiloa lava le upu moni,+ ma o so o se tasi e liliuese mai i le leaga e faoa ana mea.+ Ua silafia e Ieova, ma ua leaga i lana silafaga ona ua leai se faamasinotonu.+ 16  Ina ua silafia e ia ua leai se tagata e fesoasoani mai, ona ofo ai lea o ia ona ua leai se isi e faalaa ane.+ O le mea lea, na faia ai le faaolataga e lona aao ona o ia, o lana amiotonu foʻi na lagolagoina o ia.+ 17  Ua ofu o ia i le amiotonu e pei o se ufifatafata uʻamea,+ ma tuu le puloutau o le faaolataga i lona ulu.+ Ua laʻei o ia i le tauimasui e fai ma ona ofu,+ ua pulupulu foʻi o ia i le maelega e pei o se ofu talaloa lima pupuu.+ 18  O le a ia tauia i latou e tusa ma a latou galuega,+ o le toʻatamaʻi i ē o tetee mai, o le taui talafeagai lea i ona fili.+ E na te taui atu i motu e tusa ma mea ua faia.+ 19  E matataʻu i le suafa o Ieova+ i latou mai i le itu e goto i ai le lā, e matataʻu foʻi i latou e mai i le itu e oso aʻe ai le lā i lona mamalu,+ auā o le a afio mai o ia e pei o se vaitafe e faapogaia ai puapuaga, e tuleia lava e le agaga o Ieova.+ 20  “E afio mai lava i Siona+ o Lē e toe faatauina mai,+ atoa ma i latou o loo iā Iakopo+ o ē ua liliuese mai i solitulafono,” ua fetalai mai ai Ieova. 21  “A o aʻu, o laʻu feagaiga lenei ma i latou,”+ ua fetalai mai ai Ieova. “O loʻu agaga o loo i o outou luga+ ma o aʻu upu, ua ou tuu atu i lou gutu,+ e lē aveesea mai i lou gutu po o gutu o lau fanau, po o gutu o fanau a lau fanau, e amata atu nei e oo i le faavavau,” ua fetalai mai ai Ieova.+

Faamatalaga Pito i Lalo