Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Isaia 48:1-22

48  Le aiga e, o Iakopo, inā faalogo mai ia i lenei mea, o outou o ē ua taʻua outou lava i le igoa o Isaraelu+ ma o ē e tupuga mai i vaipuna o Iuta,+ o outou o ē ua tautō i le suafa o Ieova+ ma taʻua le Atua o Isaraelu,+ ae e lē faia e tusa ma le upu moni ma le amiotonu.+  Auā na latou faapea mai latou te nonofo i le aai paia,+ ma na latou faalagolago i le Atua o Isaraelu,+ o Ieova o ʻau lona suafa.+  “O mea muamua na ou taʻua i aso ua mavae, na alu atu foʻi mai i loʻu gutu, ma na ou faailoaina atu pea ina ia faalogo i ai.+ Ona faafuaseʻi lea ona ou gaoioi ma taunuu ai ia mea.+  Talu ai ua ou iloa lou lotomaaa+ ma o lou ua o le uaua+ uʻamea lea, e ʻapamemea+ foʻi lou muāulu,  na ou taʻu atu ai pea iā te oe talu mai aso ua mavae. A o leʻi taunuu ia mea na ou faailoa atu iā te oe ina ia e faalogo i ai,+ ina neʻi e faapea ane, ‘Ua faia e loʻu tupua ia mea, ua poloaʻiina foʻi e loʻu faatusa ua tā ma loʻu faatusa uʻamea.’+  Ua e faalogo i ai.+ Ia e tagaʻi i ia mea uma.+ A o outou, pe e tou te lē taʻu atu ea lenei mea?+ E amata mai i le taimi nei ou te faailoa atu iā te oe mea fou e te faalogo i ai, e oo i mea sa teuina e te leʻi iloa.+  E faia ia mea i le taimi nei ae e lē o aso ua mavae, e oo foʻi i mea e te leʻi faalogo muamua i ai a o leʻi oo i lenei aso, neʻi e faapea ane, ‘O lea ua uma ona ou iloa ia mea.’+  “E lē gata i lea, e te leʻi faalogo,+ e te leʻi iloa, pe uaʻi mai foʻi ou taliga talu mai aso ua mavae. Auā ua ou iloa lelei e te matuā amio lē faamaoni,+ ma ua taʻua oe o ‘lē e solitulafono talu ona fanau mai.’+  Ou te pulea loʻu ita ona o loʻu igoa,+ ou te taofiofia aʻu mai iā te oe ona o loʻu viiga ina neʻi faaumatia ai oe.+ 10  Faauta! ua ou faamamāina oe, ae e lē pei ona faia i le siliva.+ Ua ou filifilia oe i le ogaumu* o puapuaga.+ 11  Ona o aʻu, ona o aʻu lava, o le a ou gaoioi ai,+ auā e faapefea ona ou tuu atu loʻu igoa e taʻuleagaina?+ Ou te lē avatua loʻu mamalu i se isi.+ 12  “Iakopo e, inā faalogo mai ia iā te aʻu, atoa ma oe Isaraelu e, o lē na ou valaauina. O aʻu lava lea e tasi.+ O aʻu o lē e muamua.+ O aʻu foʻi o lē e mulimuli.+ 13  Na faia e loʻu lima le faavae o le lalolagi,+ ma o loʻu lima taumatau na folasia ai le lagi.+ Ou te valaau atu i nei mea, ina ia tutū faatasi pea.+ 14  “Ia faapotopoto faatasi uma mai outou ma faalogo.+ O ai se isi o i latou na faailoaina mai nei mea? Ua alofa Ieova iā te ia.+ O le a ia faia lava lona finagalo i Papelonia,+ ma o le a oo lona lima i tagata Kaletaia.+ 15  O aʻu, o aʻu lava na ou tautala atu. Na ou valaauina foʻi o ia.+ Na ou aumaia o ia, ma e manuia foʻi lona ala.+ 16  “Ia outou faalatalata mai iā te aʻu. Ia faalogo i lenei mea. Ou te leʻi tautala lava mai i se nofoaga lilo talu mai le amataga.+ Sa ou iai ina ua amata ona tupu lea mea.” Ua auina mai aʻu atoa ma lona agaga e le Alii Pule Silisili Ese o Ieova.+ 17  O le fetalaiga lenei a Ieova o Lē e toe faatauina oe,+ o Lē e Paia o Isaraelu:+ “O aʻu o Ieova, lou Atua, o Lē o loo aʻoaʻo oe i mea e aogā iā te oe,+ o Lē e taʻitaʻiina oe i le ala e ao ona e ui ai.+ 18  E lelei pe a e faalogo mai i aʻu poloaʻiga!+ Ona pei ai lea o se vaitafe lou filemu,+ ma lau amiotonu e pei o galu o le sami.+ 19  E pei o le oneone lau fanau ma o ē e tupuga mai i lou manava.+ E lē soloiesea lou igoa pe aveesea mai i oʻu luma.”+ 20  Ia ō ese outou mai i Papelonia!+ Ia sosola ese mai i tagata Kaletaia.+ Ia taʻu atu ma le leo o le alaga fiafia, ina ia lagonaina lenei mea.+ Ia faaoo atu i tuluʻiga o le lalolagi.+ Ia faapea atu: “Ua toe faatauina mai e Ieova lana auauna o Iakopo.+ 21  E leʻi fia feinu+ i latou ina ua ia faasavavali i latou i le toafa.+ Na ia faatafe mai le vai mai i le papa mo i latou, ma na ia isilua le papa ona tafe mai ai lea o le vai.”+ 22  Ua fetalai mai Ieova: “E leai se filemu i ē e amioleaga.”+

Faamatalaga Pito i Lalo

O le faaliusuavaia lea o metala (po o uʻamea) i ulo ina ia aveese le otaota mai i ia mea.