Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Isaia 41:1-29

41  “O outou motu e,*+ inā uaʻi mai ia iā te aʻu ma le fifilemu; ia toe maua e nuu+ lo latou malosi. Ia latou faalatalata mai,+ ma ia latou tautatala mai. Seʻi o tatou faalatalata faatasi mai mo le faamasinoga.+  “O ai e na te faatulaʻi se isi mai i le mea e oso aʻe ai le lā?+ O ai e na te valaau atu i le amiotonu ina ia fai Lana auaunaga, ia tuuina atu atunuu i ona luma, ma ia faatoʻilaloina tupu?+ O ai e na te tuuina atu i latou e pei o pefu i lana pelu, ma faataape i latou i lana ʻaufana e pei o tagutugutu o saito?+  O ai e na te tuliloaina pea i latou, o lē ua ui ane ma le filemu i ona vae i se auala e leʻi ui mai ai muamua?  O ai ua na faia+ lenei mea ma taʻu atu tupulaga mai i le amataga?+ “O aʻu o Ieova, o Lē e Muamua;+ ma o aʻu foʻi lea i tupulaga o loo mulimuli mai.”+  Ua vāai i ai motu+ ma fefefe ai. Ua gatete tuluʻiga o le lalolagi.+ Ua latou faalatalata mai ma ō mai pea.  Ua taʻitoʻatasi ma fesoasoani i lana uō, e faapea atu foʻi le tasi i lona uso: “Ia faamalosi.”+  Ona faamalosi atu lea o le tufuga i lē e faia uʻamea;+ o lē e faalamolemoleina mea i le samala, ma tuʻi i le uʻamea e tuʻi ai mea, ua faapea atu e faatatau i le faiga o le uelo e soo ai mea: “Ua lelei.” Mulimuli ane ua faamauina ai e se isi i fao ina ia lē maluelue ai.+  “A o oe Isaraelu e, o laʻu auauna,+ o oe Iakopo e, o lē na ou filifilia,+ o le fanau a laʻu uō+ o Aperaamo;+  o oe, o lē na ou aumaia mai i tuluʻiga o le lalolagi,+ o oe foʻi na ou valaauina mai i vaega mamao o le lalolagi.+ Na ou faapea atu iā te oe, ‘O oe o laʻu auauna;+ na ou filifilia oe,+ ma ou te leʻi teena oe.+ 10  Aua e te fefe, auā ou te faatasi ma oe.+ Aua e te vaai solo, auā o aʻu o lou Atua.+ Ou te faamalosi iā te oe.+ Ou te matuā fesoasoani iā te oe.+ Ou te matuā lagolagoina oe i loʻu lima taumatau+ o le amiotonu.’+ 11  “Faauta! O i latou uma e feita iā te oe o le a mamā ma māsiasi i latou.+ O i latou o ē e femisaaʻi ma oe, o le a pei o se mea noa ma o le a faaumatia.+ 12  E te saʻili iā i latou, ae e te lē maua i latou, o i latou ia ua finau ma oe.+ O le a peiseaʻī ua lē iai i latou ma e peiseaʻī ua leai lava,+ o i latou ia o loo tau ma oe. 13  Auā o aʻu o Ieova lou Atua, o loo uuina lou lima taumatau,+ o Lē e fai atu iā te oe, ‘Aua e te fefe.+ Ou te fesoasoani iā te oe.’+ 14  “Aua e te fefe oe Iakopo le anufe e,+ o outou tagata Isaraelu.+ Ou te fesoasoani iā te oe,” ua fetalai mai ai Ieova, o Lē e toe faatauina oe,+ o Lē e Paia o Isaraelu. 15  “Faauta! ua ou faia oe ma laupapa e aveese ai fatu,+ o se mea faigaluega fou maʻai e aveese ai fatu. O le a e soli ai mauga ma nutililii ai; e te faia foʻi aʻega e pei o vao mamago.+ 16  E te faamamāina+ na mea, e lelea foʻi i le matagi,+ ma e faasalalau solo e se matagi malosi.+ Ae e te olioli iā Ieova.+ E te mitamita foʻi oe i Lē e Paia o Isaraelu.”+ 17  “Ua saʻili ē ua mafatia ma tagata matitiva mo ni vai, ae e leai se vai.+ Ona o le fia feinu+ ua mātūtū+ ai o latou laulaufaiva. O aʻu o Ieova, ou te tali atu iā i latou.+ O aʻu o le Atua o Isaraelu, ou te lē tuua lava i latou.+ 18  Ou te faatafe mai vaitafe i luga o aʻega taalaelae, ma vaipuna i fanua laugatasi o vanu.+ Ou te faia foʻi le toafa e avea ma taufusi, ma laueleele naumati e avea ma puna o vai.+ 19  O le a ou totō i le toafa le laau o le arasi, le laau o le setima, le laau o le atasi, ma le laau e maua ai le suāuu.+ O le a ou totō i le fanua laugatasi o le toafa le laau o le perosi, o le titara, faatasi ma le laau o le paina;+ 20  ina ia vāai ma iloa ai e tagata, ia uaʻi i ai, ma malamalama ai i le taimi e tasi e faapea, ua faataunuuina nei mea e le aao o Ieova, ma ua faia nei mea e Lē e Paia o Isaraelu.”+ 21  “Ia aumai la outou finauga,”+ ua fetalai mai ai Ieova. “Ia faailoa mai foʻi o outou manatu+ e lagolago ai,” ua fetalai mai ai le Tupu o Iakopo.+ 22  “Ia faailoa ma taʻu mai iā i matou mea o le a tutupu. Ia taʻu mai mea na tutupu muamua ona matou mafaufau lelei ai lea ma iloa ai mea o le a oo mai i le lumanaʻi. Pe faailoa mai foʻi iā i matou o mea o le a oo mai.+ 23  Ia taʻu mai mea o le a mulimuli mai, ina ia matou iloa ai o atua outou.+ Ioe, e ao ona outou faia mea e lelei po o mea e leaga, ina ia matou vaavaai solo ai ma iloa faatasi ai.+ 24  O lea, ua matuā leai lava outou, ma o se mea noa a outou galuega.+ O so o se tasi e na te filifilia outou, e inosia lea.+ 25  “Ua ou faatulaʻi se tasi mai i le itu i mātū, ma o le a sau o ia.+ E na te valaau i loʻu igoa mai i le mea e oso aʻe ai le lā.+ E alu atu o ia i sui pule o ē ua pei o ni omea,+ ma ua pei foʻi o le tagata fai ipu omea ua ia solia le omea ua susū. 26  “O ai ua ia taʻuina mai se mea mai i le amataga, ina ia tatou iloa ai, po o mea ua tuanaʻi, ma tatou faapea atu ai, ‘E saʻo o ia’?+ E moni e leai se isi ua taʻu maia. E moni foʻi e leai se isi e na te faia se upu e faalogo ai. E moni lava e leai se isi na faalogo i se upu na outou faia.”+ 27  O aʻu o lē ua muamua ma ua ou faapea atu i Siona: “Faauta! O i latou nei!”+ ma ou te avatua i Ierusalema sē na te aumaia le tala lelei.+ 28  Ua ou vaai pea ae e leai se tagata; ma e leai se isi o i latou e aumaia se fautuaga.+ Ua ou fesili atu pea iā i latou, seʻi iloa pe latou te tali mai. 29  Faauta! Ua matuā leai lava i latou uma. O se mea noa a latou galuega. O a latou faatusa uʻamea ua na o le savili ma e lē moni.+

Faamatalaga Pito i Lalo

Po o talafatai o le sami Metitirani.