Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Iosua 8:1-35

8  Ona fetalai mai lea o Ieova iā Iosua: “Aua e te fefe pe e te mataʻu.+ Ia e ave tagata uma o le taua, ma ō aʻe i Ai. Silasila foʻi, ua ou tuuina atu i ou lima le tupu o Ai, o ona tagata, o lana aai, ma lona laueleele.+  Ia e faia iā Ai ma lona tupu e pei ona e faia foʻi iā Ieriko ma lona tupu.+ Ia ave foʻi ma outou le vete ma manu lalata.+ Ia ave foʻi sa outou ʻautau e faalalafi i tua o le aai.”+  Ona tulaʻi lea o Iosua ma tagata uma o le taua+ ma ō aʻe i Ai, ma ua filifilia e Iosua tagata totoa+ e toʻatolu sefulu afe, ma aauina atu i latou i le pō.  Ua ia poloaʻi atu foʻi iā i latou, e faapea: “Ua outou lalafi+ e latalata i le aai i tua o le aai. Aua neʻi ō ese mamao atu mai i le aai, ma ia outou nofosauni uma.  A o aʻu, ma tagata uma o faatasi ma aʻu, matou te faalatalata atu i le aai. Afai latou te ō mai e faafetaiaʻi i matou e pei o le taimi muamua,+ ona matou sosola lea mai i o latou luma.  Ona latou mulimuli mai lea iā i matou seʻia oo ina latou mamao ese mai i le aai, auā o le a latou faapea ifo, ‘Ua latou sosola mai i o tatou luma e pei o le taimi muamua.’+ Ona matou sosola ai lea mai iā i latou.  A o outou, tou te ō ese mai i le mea na lalafi ai ma outou ō atu e faoa le aai; ma e tuuina mai lava e Ieova lo outou Atua le aai i o outou lima.+  Pe a outou faoa le aai, ona outou susunuina loa lea i le afi.+ Ia outou faia e tusa ma le afioga a Ieova. Faauta, ua ou poloaʻi atu ai iā te outou.”+  Mulimuli ane, ona aauina atu lea o i latou e Iosua ma agaʻi atu i le nofoaga e lalafi ai, ma nonofo ai i le va o Peteli ma Ai i le itu i sisifo o Ai, ae ua nofo pea Iosua i lenā pō faatasi ma isi tagata o le taua. 10  Ona tulaʻi lea o Iosua i le taeaopō+ ma faamaopoopo tagata ma latou ō aʻe, o ia ma toeaina o Isaraelu e agaʻi i Ai. 11  A o tagata uma o le taua+ o ē o loo faatasi ma ia, ua latou ō aʻe ma faalatalata atu i luma o le aai, ma tolauapi ai i le itu i mātū o Ai, e na o le vanu e va ai i latou ma Ai. 12  I le taimi lea, na ia ave ai ni tamāloloa pe tusa ma le toʻalima afe ma faalalafi+ i le va o Peteli+ ma Ai, i le itu i sisifo o le aai. 13  Ona tuu lea o tagata o le vaega autū o le ʻautau i le itu i mātū o le aai,+ a o le isi vaega uma e agaʻi i sisifo o le aai.+ Ona alu lea o Iosua i le ogatotonu o le vanu i lenā pō. 14  Ina ua iloa e le tupu o Ai, ona tulaʻi faavave lea o tamāloloa o le aai i le taeaopō ma ō atu e faafetaiaʻi iā Isaraelu i le taua, o ia ma ona tagata uma i lenā taimi atofaina, i le fanua laugatasi. A ua ia lē iloa le ʻautau na faalalafi i tua o le aai e tau faasaga iā te ia.+ 15  Ina ua peiseaʻī ua fasia Iosua ma Isaraelu uma i o latou luma,+ ona sosola ai lea o i latou e agaʻi atu i le toafa.+ 16  Ona faapotopoto ai lea o tagata uma o loo i le aai e tuliloa iā te i latou, ua latou tuliloa iā Iosua ma ō ese atu ai mai i le aai.+ 17  E leai se tagata na nofo i Ai ma Peteli, ae na mulimuli uma atu e tuliloa iā Isaraelu, ma ua tuua ai le aai e aunoa ma se puipuiga. 18  Ona fetalai mai lea o Ieova iā Iosua: “Inā faaloaloa atu ia le tao o loo i lou lima agaʻi i Ai,+ auā ou te tuuina atu i lou lima le aai.”+ Ona faaloaloa lea e Iosua o le tao sa i lona lima i le aai. 19  Ona feosofi vave mai ai lea o ʻautau mai i mea na lalafi ai, ma latou taufetuli atu loa a o faaloaloa atu lona lima, ua latou ulu atu ma faoa le aai.+ Ona latou faanatinati atu lea ma susunu le aai.+ 20  Ona tetepa lea i tua o tagata o Ai ma iloa atu, faauta, ua alu aʻe i le lagi le asu o le aai, ma ua leai foʻi so latou malosi e toe sosola ai i lea ala po o le la ala. Ua toe liliu mai foʻi tagata na sosola i le vao i ē o loo tuliloaina atu i latou. 21  Ua iloa atu e Iosua ma Isaraelu uma ua faoa e ʻautau na lalafi+ le aai, ma ua alu aʻe lona asu, ona latou toe foʻi atu lea ma fasiotia tane uma o Ai. 22  Ua ō mai foʻi isi mai i le aai e faafetaiaʻi i latou, ina ia latou iai i le va o Isaraelu, o isi i lenei itu ma isi i lenā itu, ma latou fasiotia i latou seʻia oo ina lē toe iai se tasi na sao mai po o sē na sola ese.+ 23  Ua latou puʻeolaina foʻi le tupu+ o Ai ma aumai iā Iosua. 24  A o lata ina uma ona fasiotia e Isaraelu o ē uma na nonofo i le fanua o Ai, i le vao na latou tuliloaina ai i latou, ona latou fasiotia pea lea o i latou uma i le pelu seʻia oo i lo latou iʻuga. Ua uma, ona toe foʻi lea o Isaraelu i Ai ma fasia i le pelu. 25  O i latou uma na fasiotia i lenā aso e toʻasefulu lua afe, o tamāloloa ma fafine, o tagata uma o Ai. 26  E leʻi toe faafoʻi mai e Iosua lona lima na faaloaloa ai le tao,+ seʻia oo ina faaumatia uma i latou na nonofo i Ai.+ 27  E na o manu lalata ma le vete o lenā aai na ave e Isaraelu mo i latou, e tusa ai ma le afioga a Ieova na ia poloaʻia ai Iosua.+ 28  Ona susunuina lea e Iosua o Ai ma avea o se mea maupuʻepuʻe e faavavau,+ o loo faatafunaina e oo mai lava i aso nei. 29  Na ia faatautau foʻi le tupu o Ai+ i le laau seʻia oo i le afiafi;+ ae ina o le a goto le lā ona poloaʻi atu lea o Iosua, ma latou ave ifo+ o lona tino oti mai i le laau ma lafo i le faitotoʻa e ulu atu ai i le aai, ma tuu ai se faaputuga maa i ona luga, e oo mai i aso nei. 30  Ona fausia lea e Iosua o se fata faitaulaga+ iā Ieova le Atua o Isaraelu, i le Mauga o Evalu,+ 31  e pei ona poloaʻi mai ai le auauna a Ieova o Mose i le fanauga a Isaraelu. Auā na tusia i le tusi o le tulafono+ a Mose: “O se fata faitaulaga o maa e lē talaia e se tasi i se uʻamea”;+ ma na latou ofoina atu foʻi taulaga mū iā Ieova ma taulaga faifaatasi.+ 32  Ona ia tusia lea i luga o maa o se kopi+ o le tulafono a Mose, lea na ia tusia i luma o le fanauga a Isaraelu.+ 33  Ua tutū foʻi Isaraelu uma, o toeaina,+ o alii, ma o latou faamasino i lenei itu ma i lenā itu o le Atolaau i luma o ositaulaga+ o le ituaiga o Levi, o ē o loo aveina le atolaau o le feagaiga a Ieova,+ o le tagata ese, atoa ai ma le tagatānuu,+ o le isi ʻafa o i latou i luma o le Mauga o Keresema,+ ma le isi ʻafa i luma o le Mauga o Evalu,+ (e pei ona poloaʻi+ mai ai le auauna a Ieova o Mose) ma e muamua lava ona faamanuia+ le nuu o Isaraelu. 34  Mulimuli ane, ona ia faitau leotele lea o upu uma o le tulafono,+ o le manuia+ ma le malaia,+ e tusa ai ma mea uma o loo tusia i le tusi o le tulafono. 35  E leai se upu o upu uma na poloaʻi mai ai Mose, e leʻi faitauina leotele atu e Iosua i luma o le faapotopotoga uma o Isaraelu,+ o fafine,+ o fanau iti,+ ma tagata ese+ na savavali faatasi ma i latou.

Faamatalaga Pito i Lalo