Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Iosua 6:1-27

6  Ua matuā puipuia le aai o Ieriko ona o le fanauga a Isaraelu, e leai se tasi na toe alu i fafo po o se tasi foʻi na sau i totonu.+  Ona fetalai mai lea o Ieova iā Iosua: “Faauta, ua ou tuuina atu i lou lima Ieriko ma lona tupu, atoa ma tagata totoa malolosi.+  A o outou tane uma o le taua, e tatau ona outou savavali faataamilo i le aai, e faatasi ona faataamilo i le aai. Ma ia outou faia faapena mo aso e ono.  Ia ave foʻi e ositaulaga e toʻafitu o pū* e fitu i luma o le Atolaau, ma ia outou savavali faataamilo faafitu foʻi i le aai i le aso lona fitu, ma ia ilia e ositaulaga o pū.+  Pe a latou ilia le pū, ma outou faalogo i le leo o le pū, ona alalaga lea o tagata uma i le alaga tele o le taua;+ ona matuā soloia+ ai lea i lalo o pā o le aai, ona ō aʻe ai lea o tagata, ma taʻitasi ma ō atu i luma.”  Ona valaau atu lea o Iosua le atalii o Nuno i ositaulaga,+ ma faapea atu iā i latou: “Inā ave ia le atolaau o le feagaiga,+ ma ia ave foʻi e ositaulaga e toʻafitu o pū e fitu i luma o le atolaau+ a Ieova.”  Ua ia fai atu foʻi i tagata: “Ia outou ō atu ma savavali faataamilo i le aai, ia muamua atu i luma o le atolaau a Ieova le vaegaʻau ua faaauupegaina.”+  A o fai atu Iosua i tagata; ona ō atu lea o ositaulaga e toʻafitu o loo aveina pū e fitu ma ilia i luma o Ieova, ua mulimuli atu foʻi ositaulaga o loo aveina le atolaau o le feagaiga a Ieova iā i latou.  Ua muamua atu i luma o ositaulaga o loo ilia pū le vaegaʻau ua faaauupegaina, ae mulimuli atu le muliʻau*+ i ē o loo aveina le Atolaau, a o ilia pea pū. 10  Ua poloaʻi atu Iosua i le nuu+ e faapea: “Aua neʻi outou alalaga pe lagonaina o outou leo, ma ia aua foʻi neʻi tautala mai se upu seʻia oo i le aso ou te fai atu ai iā te outou, ‘Inā alalaga ia!’ Ona outou alalaga ai lea.”+ 11  Ua ia fai atu ia faatasi ona savavali faataamilo ma le atolaau a Ieova i le aai, a uma lea, ona latou ō atu lea i le togālauapi ma nonofo ai i le pō. 12  Ona tulaʻi lea o Iosua i le taeaopō,+ ua ave aʻe foʻi e ositaulaga le atolaau+ a Ieova. 13  O loo savavali foʻi ositaulaga e toʻafitu o loo aveina pū e fitu i luma o le atolaau a Ieova o loo ilia pea pū, o loo savavali atu i o latou luma le vaegaʻau faaauupegaina, ae mulimuli atu le muliʻau i le atolaau a Ieova a o ilia pea pū.+ 14  E faatasi ona latou savavali faataamilo i le aai i le aso lona lua, ona latou toe foʻi lea i le togālauapi. Na latou faia faapea mo aso e ono.+ 15  Ua oo i le aso lona fitu, ua latou alapopō ina ua tafa mai ata o le vaveao, ona latou ō atu lea ma faapea ona savavali faataamilo faafitu i le aai. O le aso lava lenā na latou savavali faataamilo faafitu ai i le aai.+ 16  Ua ilia foʻi e ositaulaga pū i le taimi lona fitu, ona faapea atu lea o Iosua i le nuu: “Inā alalaga ia;+ auā ua tuuina mai e Ieova le aai iā te outou.+ 17  E tatau ona faaumatia+ le aai; o le aai ma mea uma o iai, e iā Ieova ia. Tau lava o Raava+ le fafine talitane e tatau ona faaolaina o ia, ma i latou uma o i lona fale, auā na ia faalalafi avefeʻau na tatou aauina atu.+ 18  A o outou, ia outou faamamao ese mai i mea e tatau ona faaumatia,+ ina neʻi outou tuʻinanau+ ma ave nisi o na mea e tatau ona faaumatia,+ ma faia ai Isaraelu ma mea ua tatau mo le faaumatiaga, ma aumaia ai mala.+ 19  A o siliva, auro, o mea e faia i le ʻapamemea, ma le uʻamea, o mea ia e paia mo Ieova.+ E tatau ona tuuina atu i le mea e teu ai ʻoa a Ieova.”+ 20  Ona alalaga lea o tagata ina ua latou ilia pū.+ Ina ua faalogo tagata i le leo o pū ma ua alalaga foʻi tagata i le alaga tele o le taua, ona matuā soloia ai lea i lalo o le pā.+ Ona ō lea o tagata i totonu o le aai, ua taʻitasi foʻi ma ō atu i luma, ma faatoʻilaloina le aai. 21  Ua latou faaumatia mea uma i le aai i le pelu, o tamāloloa ma fafine, o tauleleʻa e oo i toeaina, o povi, o mamoe, ma asini.+ 22  Ua fai atu foʻi Iosua i tamāloloa e toʻalua na ō atu faalilolilo e mataʻi le nuu: “Inā ō atu ia i le fale o le fafine talitane, ma aumai i fafo le fafine ma i latou uma ua faatasi ma ia, e pei lava ona oulua tautō ai iā te ia.”+ 23  Ona faia ai lea e tauleleʻa na aauina atu faalilolilo e mataʻi le aai, ua la ō atu ma aumai o Raava, o lona tamā, o lona tinā, o ona tuagane, ma i latou uma ua faatasi ma ia, ioe, ua la aumaia ona tauaiga uma;+ ma la tuu iā i latou i tua o le togālauapi o Isaraelu. 24  Ua latou susunu le aai ma mea uma o iai.+ Na o siliva, auro, o mea e faia i le ʻapamemea, ma uʻamea na latou avatu i le mea e teu ai ʻoa i le fale o Ieova.+ 25  Ae na faasaoina e Iosua le fafine talitane o Raava ma le aiga o lona tamā, ma i latou uma ua faatasi ma ia;+ ma o loo nofo o ia i totonu o Isaraelu e oo mai i aso nei,+ auā na ia faalalafi avefeʻau na aauina atu faalilolilo e Iosua e mataʻi le aai o Ieriko.+ 26  Ona faia lea e Iosua o le tautoga i lenā taimi, e faapea: “E malaia i luma o Ieova le tagata o lē na te toe fausia lenei aai, o Ieriko. E oti lana ulumatua pe a ia toe faatūina le faavae, ma e oti foʻi lana uii pe a ia toe faia ona faitotoʻa.”+ 27  Sa faatasi pea Ieova ma Iosua,+ ma ua taʻutaʻua o ia i le lalolagi uma.+

Faamatalaga Pito i Lalo

I le gagana Eperu, o “pū e faia i seu o le mamoe poʻa.”
O le “muliʻau” e faasino atu i fitafita o loo mulimuli atu i tua o le vaegaʻau.