Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Iosua 24:1-33

 24  Ona faapotopoto faatasi lea e Iosua o ituaiga uma o Isaraelu i Sekema,+ ma valaau atu i toeaina o Isaraelu,+ o ulu o o latou aiga, o ona faamasino, ma ona alii, ona latou ō mai ai lea ma tutū i luma o le Atua moni.+  Ua faapea atu Iosua i le nuu uma: “O le mea lenei na fetalai mai ai Ieova le Atua o Isaraelu, ‘O le isi itu o le Vaitafe*+ na nonofo ai o outou augātamā+ i aso anamua, o Tara le tamā o Aperaamo, o le tamā foʻi o Nakori,+ ma na latou auauna ai i isi atua.  “ ‘Mulimuli ane, na ou aumaia lo outou augātamā o Aperaamo+ mai i le isi itu o le Vaitafe,+ ma tuu atu o ia e fealuaʻi i le laueleele atoa o Kanana, ma faatoʻateleina lana fanau.+ Ona ou foaʻiina atu lea iā te ia o Isaako.+  Na ou foaʻiina atu iā Isaako o Iakopo ma Esau.+ Mulimuli ane, ona ou avatu lea iā Esau o le Mauga o Seira e fai ma ona tofi;+ ae na ō ifo Iakopo ma lana fanau i Aikupito.+  Mulimuli ane, ona ou aauina atu lea o Mose ma Arona,+ ma ou taia Aikupito i mala;+ ona ou aumaia lea o outou.+  Ina ua ou aumaia o outou tamā mai i Aikupito+ ma latou ui mai i le sami, ona tuliloa+ mai lea e tagata Aikupito o o outou tamā, i kariota o le taua ma ʻautau i le Sami Ulaula.  Ona latou alalaga atu lea iā Ieova.+ Ona ia tuu lea o le pōuliuli i le va o outou ma tagata Aikupito,+ ma faatafe mai le sami i o latou luga ma ufitia ai i latou,+ na vāai foʻi o outou mata i mea na ou faia i Aikupito;+ ma outou nonofo ai i le toafa mo aso e tele.+  “ ‘Na ou aumaia outou i le laueleele o tagata Amorī, o ē na nonofo i le isi itu o Ioritana, ma na latou siitaua mai iā te outou.+ Ona ou tuuina atu lea o i latou i o outou lima, ina ia fai mo outou lo latou laueleele, ma na ou faaumatia i latou mai i o outou luma.+  Ona tulaʻi lea o Palako le atalii o Seporu+ le tupu o Moapi, ma siitaua iā Isaraelu.+ Ona ia aami lea o Palaamo le atalii o Peoro e fetuu iā te outou.+ 10  Ou te leʻi fia faalogo iā Palaamo.+ Ae na ia faamanuia atu pea iā te outou.+ O lea la, na ou laveaʻiina ai outou mai i lona lima.+ 11  “ ‘Ona outou sopoʻia lea o Ioritana+ ma ō mai i Ieriko.+ Na siitaua atu iā te outou tagata o Ieriko e ona fanua ma tagata Amorī, o tagata Perisē, o tagata Kanana, o tagata Heti, o tagata Kirekasē, o tagata Hivī, ma tagata Iepusē; ae na ou tuuina atu i latou i o outou lima.+ 12  Ona ou faaoo atu lea o le mataʻu e muamua iā te outou, ma oo ina tutuliesea ai i latou mai i o outou luma,+ o tupu e toʻalua o Amorī, ae e leʻi tulia i lau pelu po o lau ʻaufana.+ 13  Ona ou avatu ai lea iā te outou o le nuu e tou te leʻi tigāina e galueaʻiina,+ ma aai tou te leʻi fausia ma outou nonofo ai. Na outou aai foʻi i togāvine ma togāolive tou te leʻi totōina.’+ 14  “O lea, ia outou matataʻu iā Ieova+ ma auauna iā te ia ma le lē taʻuleagaina ma le faamaoni,+ ma aveese atua ia na auauna i ai o outou augātamā i le isi itu o le Vaitafe ma Aikupito,+ ae ia auauna iā Ieova. 15  O lenei, afai e leaga iā te outou le auauna iā Ieova, inā outou filifili ia i le aso nei po o ai e tou te auauna i ai,+ po o atua na auauna i ai o outou augātamā i le isi itu o le Vaitafe,+ po o atua o tagata Amorī o ē e ona le laueleele o loo outou nonofo ai.+ A o aʻu ma loʻu aiga, e matou te auauna iā Ieova.”+ 16  Ona tali mai lea o le nuu, ua faapea mai: “Ia mamao iā i matou ona matou tuua Ieova ae auauna i isi atua. 17  Auā o Ieova lo tatou Atua na aumaia i tatou ma o tatou tamā mai i le nuu o Aikupito,+ mai i le mea na nofo pologa+ ai, o lē na faia nei faailoga tetele i o tatou luma,+ o lē na leoleoina pea i tatou i le ala na tatou savavali ai, ma nuu uma na tatou uia.+ 18  Na tuliesea foʻi e Ieova mai i o tatou luma o tagata uma,+ e oo lava i tagata Amorī sa nonofo i le laueleele. A o i matou, matou te auauna iā Ieova, auā o ia o lo tatou Atua.”+ 19  Ona fai atu lea o Iosua i le nuu: “E lē mafai ona outou auauna iā Ieova, auā o ia o le Atua paia;+ o le Atua e finagalo e tapuaʻi atu tau lava o ia.+ E na te lē faamagaloina a outou solitulafono ma a outou agasala.+ 20  Ae afai e tou te tuua Ieova+ ma outou auauna i atua ese,+ o le a liliu mai lava o ia, ma faatigā, ma faaumatia outou, ina ua uma ona ia faia o mea lelei iā te outou.”+ 21  A ua faapea mai le nuu iā Iosua: “E leai, e matou te auauna lava iā Ieova!”+ 22  Ona fai atu lea o Iosua i le nuu: “O molimau outou iā te outou lava,+ auā o o outou lava loto ua outou filifili ai e auauna iā Ieova.”+ Ona latou faapea mai lea: “O molimau i matou.” 23  “O lenei, inā aveese ia o atua ese o loo iā te outou,+ ma ia uaʻi atu o outou loto iā Ieova le Atua o Isaraelu.” 24  Ona faapea mai lea o le nuu iā Iosua: “O Ieova lo tatou Atua e matou te auauna i ai, o lona siʻufofoga foʻi e matou te faalogo i ai!”+ 25  Ona osia lea e Iosua o se feagaiga ma le nuu i lenā aso, ma tuuina atu iā i latou poloaʻiga ma iʻuga o faamasinoga+ i Sekema. 26  Ua tusia e Iosua nei upu i le tusi o le tulafono a le Atua,+ na ia ave foʻi se maa tele+ ma tuu ai i inā i lalo o le laau telē,+ lea e i tafatafa o le nofoaga ua faapaiaina e Ieova. 27  Ona faapea atu lea o Iosua i le nuu uma: “Faauta! Ua avea lenei maa ma molimau iā i tatou,+ auā ua ia faalogo i fetalaiga uma a Ieova na ia fetalai ai mai iā i tatou, ma e fai foʻi ma molimau iā te outou, ina neʻi outou faafitia lo outou Atua.” 28  Ona tuu atu lea e Iosua o le nuu e ō, e taʻitoʻatasi i lona tofi.+ 29  Ua mavae nei mea, ona iʻu ai lea ina maliu o Iosua le atalii o Nuno le auauna a Ieova, i le selau sefulu o ona tausaga.+ 30  Ua latou tanu o ia i le laueleele o lona tofi i Timenata-sera,+ i le vaega maugā o Efaraima, i le itu i mātū o le Mauga o Kaasa. 31  Sa auauna pea Isaraelu iā Ieova i aso uma o Iosua, ma aso uma o toeaina o ē na iai pea ina ua mavae Iosua,+ o ē na iloa galuega uma na faia e Ieova iā Isaraelu.+ 32  O ivi foʻi o Iosefa+ ia na aumai e le fanauga a Isaraelu mai i Aikupito, na latou tanu i Sekema i le fasi fanua lea na faatau e Iakopo i tupe e selau+ mai i le fanauga a Hamoro+ le tamā o Sekema; ma ua avea ma tofi o le fanauga a Iosefa.+ 33  Ua oti foʻi Eleasaro le atalii o Arona,+ ona latou tanu lea o ia i le Aʻega o Fineaso lona atalii,+ lea na ia tuuina atu iā te ia i le vaega maugā o Efaraima.

Faamatalaga Pito i Lalo

O le vaitafe o Eufirate.