Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Iosua 20:1-9

20  Ona fetalai mai lea o Ieova iā Iosua:  “Ia e fai atu i le fanauga a Isaraelu e faapea, ‘Ia tofia mo outou aai o sulufaʻiga+ ia na ou fai atu ai iā te outou e ala iā Mose,  ina ia sola i ai lē e fasioti tagata,+ o lē ua paʻivalea i se tasi ma le lē iloa; ma ia avea ma aai o sulufaʻiga mo outou mai i lē e tauimasui i le toto.+  Ia sola+ o ia i se tasi o nei aai ma tū i le faitotoʻa o le pā+ o le aai, ma tautala atu a o faalogologo mai toeaina+ o lenā aai; ia latou taliaina o ia i le aai ma avatu iā te ia se mea e nofo ai, ma ia nofo o ia faatasi ma i latou.  Afai e tuliloa atu o ia e lē e tauimasui i le toto, ia aua neʻi o latou tuuina atu lē e fasioti tagata i lona lima;+ auā na ia fasiotia ma le lē iloa lona uso, e leʻi muaʻi ita foʻi iā te ia.+  A ia nofo o ia i lenā aai seʻia oo ina tū atu o ia i luma o le faapotopotoga e faamasinoina+ ai, seʻia oo ina oti le ositaulaga sili+ o loo iai i lenā taimi. Ona toe foʻi+ ai lea o lē e fasioti tagata i lona aiga, ma ulu atu i lona aai ma lona fale, i le aai na sola mai ai o ia.’ ”  Ona latou faapaiaina lea o Ketesa+ i Kalilaia i vaega maugā o Nafatali, ma Sekema+ i vaega maugā o Efaraima, ma Kiriata-arapa,+ o Heperona lea, i le vaega maugā o Iuta.  Ae o le vaipanoa o Ioritana i Ieriko, e agaʻi i le itu i sasaʻe ua latou tofia ai Peseri+ i le toafa o le fanua laugatasi mai i le ituaiga o Reupena,+ ma Ramota+ i Kiliata mai i le ituaiga o Kato, ma Koleni+ i Vasana mai i le ituaiga o Manase.  Ua tofia nei aai mo le fanauga uma a Isaraelu, ma tagata ese ua aumau ai faatasi ma i latou, e sola i ai se tasi o lē e fasioti tagata paʻivalea,+ ina ia lē oti ai o ia i le lima o lē e tauimasui i le toto, seʻia oo ina tū o ia i luma o le faapotopotoga.+

Faamatalaga Pito i Lalo