Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Iopu 38:1-41

38  Ona tali mai lea o Ieova iā Iopu mai i le matagi malosi,+ ua faapea mai:   “O ai lenei ua ia faafenumiaʻia le fautuaga I upu e lē o iai le poto?+   Inā fusi ia o lou sulugātiti e pei o se tagata malosi, Ma seʻi oʻu fesili atu iā te oe, ona e faailoa mai lea iā te aʻu.+   O fea na e iai a o ou faavaeina le lalolagi?+ Inā taʻu mai ia iā te aʻu, pe afai ua e malamalama.   O ai ea na ia fuaina pe afai ua e iloa, Po o ai foʻi na ia faataatia ai i luga le fua?   Ua tuuina ea lona faavae+ i luga o le ā, Po o ai ea na faataatiaina lona maa tulimanu?   Ina o alalaga faatasi ma le olioli fetu o le taeao,+ Ma alalaga i viiga atalii uma o le Atua?+   Ma o ai foʻi na ia pupuni le sami i faitotoʻa,+ Ua pā atu e pei ua sau mai i le manava;   Ina ua ou tuu le ao e fai ma ona ofu Ma le pōuliuli tele e fai ma ona pulupulu, 10  Ua ou tuu ai i luga laʻu tulafono Ma tuu ai foʻi le faamaufaalava ma faitotoʻa;+ 11  Ona ou faapea atu lea, ‘O le mamao lenei e te oo i ai, e gata ai i inei;+ O i inei e gata ai ou galu maualuluga’?+ 12  Pe na e poloaʻi atu i le taeao+ talu mai ou aso? Pe na e faapogaia le tafa o ata ina ia iloa lona nofoaga, 13  Ina ia taofia tuluʻiga o le lalolagi, Ina ia lūlūina ese mai ai o ē e amioleaga?+ 14  Ua ia liua o ia lava e pei o le omea+ i le faamaufaailoga, Ma ua tutū mai ai mea e pei o ni ofu. 15  Ua taofia lo latou malamalama+ mai i ē e amioleaga, Ua gau foʻi lo latou lima maualuga.+ 16  Po ua e oo ea i mea e puna mai ai le suāsami, Po ua e fealuaʻi+ foʻi e saʻili i mea loloto?+ 17  Po ua faailoa atu ea iā te oe faitotoʻa o le oti?+ Pe e mafai ea ona e iloa atu faitotoʻa o le pogisa tele?+ 18  Po ua e mafaufau lelei ea i mea lautele o le lalolagi?+ Inā taʻu mai ia pe afai ua e iloa na mea uma. 19  O lenei, o fea le ala e nofo ai le malamalama?+ O lenei foʻi, o fea le nofoaga o le pōuliuli, 20  Ina ia e momoli atu i lona tuaoi Ma e tatau foʻi ona e malamalama i le ala i lona fale? 21  Po ua e iloa ea talu ai o le taimi lenā ua e fanau ai,+ Ma ona ua tele ou aso? 22  Po ua e ulu atu ea i fale e teu ai le kiona,+ Po ua e vaai ea foʻi i fale e teu ai le uatoʻa,+ 23  O mea ia na ou taofia mo le taimi o puapuaga, Mo le aso e tau ai le taua?+   24  O fea nei o iai le ala e tufatufa atu ai e le malamalama o ia lava, Ma salalau atu ai le matagi mai i sasaʻe+ i luga o le fogāeleele? 25  O ai ua na vaevaeina le alāvai mo lologa Ma le ala mo le ao faititili,+ 26  Ina ia timu mai i luga o le laueleele e lē o iai se tagata,+ I luga o le toafa e lē o iai se tagata, 27  Ina ia faamalie nofoaga ua taia e le afā ma ua faatafunaina Ma faatutupuina le mutia?+ 28  Pe e iai se tamā o le timu,+ Po o ai foʻi na fanaua le sau?+ 29  O le manava o ai na fanauina le aisa, O ai foʻi na fanaua le sautoʻa+ mai i le lagi? 30  Ua natia vai i lalo e pei ona natia i se maa, Ma ua toʻa luga o vai loloto.+ 31  Pe e mafai ona e nonoa mau noataga o faaputuga o fetu o Kima, Pe e mafai foʻi ona e tatalaina manoa o faaputuga o fetu o Kisila?+ 32  Pe e mafai ea ona e faaooina mai faaputuga o fetu o Masarota i lona taimi atofaina? Pe e mafai ea ona e taʻitaʻiina faaputuga o fetu o Asa faatasi ma lana fanau? 33  Po ua e iloa tulafono o le lagi,+ Pe e mafai ona e tuuina atu lana pule i le lalolagi? 34  Pe e mafai ona e sii aʻe lou leo e oo atu i le ao, Ina ia ufitia ai oe e vai e tele?+ 35  Pe e mafai ona e aauina atu uila ina ia latou ō ai Ma latou faapea mai iā te oe, ‘O i matou nei!’? 36  O ai na tuuina le atamai+ i faaputuga o ao, Po o ai foʻi na avatua le malamalama+ i mea e tutupu i le lagi? 37  O ai moni lava e na te mafai ona faitauina ao i lona atamai, Po o ai foʻi e na te mafai ona liligi ifo faguvai o le lagi,+ 38  Ua sasaa ifo le efuefu e pei o se ʻapamemea, Ua pipii foʻi faatasi faaputuga eleele? 39  Pe e mafai ona e saʻilia ni meaʻai mo le leona Ma pe e mafai ona e faamalieina le matuā fia aai o tamaʻi leona,+ 40  Pe a latou faapupuna i mea e lalafi ai,+ Pe e taooto pea ma faatalitali e osofaʻi? 41  Po o ai ea e saunia meaʻai a oreva+ Pe a fetagisi atu lana toloaʻi i le Atua mo se fesoasoani, A o latou feoaʻi solo ona ua leai ni meaʻai?

Faamatalaga Pito i Lalo