Skip to content

Skip to secondary menu

Skip to table of contents

Molimau a Ieova

Faa-Samoa

Tusi Paia i le Initaneti | O LE TUSI PAIA–O LE FAALILIUGA A LE LALOLAGI FOU

Iopu 2:1-13

2  Mulimuli ane, ua oo i le aso e ō mai ai atalii o le Atua moni e tutū i luma o Ieova, na sau ai foʻi Satani faatasi ma i latou ina ia tū o ia i luma o Ieova.+  Ona fetalai atu lea o Ieova iā Satani: “O fea e te sau ai?” Ua tali mai Satani iā Ieova e faapea: “Ua ou sau na ou fealualuaʻi i le lalolagi ma fesavaliaʻi ai.”+  Ona fetalai atu lea o Ieova iā Satani: “Po ua e mafaufau ea i laʻu auauna o Iopu,+ e leai se tasi e pei o ia i le lalolagi, o le tagata e lē taʻuleagaina ma amio saʻo,+ e mataʻu i le Atua+ ma ʻaloʻalo ese i mea leaga?+ Ua taofimau o ia i lona faamaoni,+ e ui ina e faaoso+ aʻu e faaumatia fua o ia.”+  Ona tali mai lea o Satani+ iā Ieova, ua faapea mai: “O le paʻu e sui ai le paʻu, o mea uma foʻi ua iai i le tagata e avatu e ia e sui ai lona ola.+  Ae peitaʻi, ia aapa atu lou aao faamolemole, ma e tago atu i ona ivi ma lona tino, pe e lē faifai ai o ia i ou lava luma.”+  Ona fetalai atu lea o Ieova iā Satani: “Ua i ou lima o ia! E na o lona ola e te faasaoina!”  Ona alu ese ai lea o Satani i luma o Ieova,+ ma ia taia Iopu i se maʻi papala leaga+ e amata mai i ona alofivae e oo i lona tumuaʻi.  Ona ia tago lea i se taʻegaipu omea ua valu ai o ia; ma nofo i le lefulefu.+  Ona fai mai lea o lana avā iā te ia: “Pe e te taofimau pea ea i lou faamaoni?+ Inā faifai ia i le Atua ma e oti ai!” 10  Ona fai atu lea o ia iā te ia: “Ua e tautala mai foʻi oe faapei o se fafine valea.+ Po o le a ta talia ea na o mea lelei mai i le Atua, ae lē talia foʻi ma mea leaga?”+ E leʻi agasala Iopu i nei mea uma i ona laugutu.+ 11  Ua faalogo aumea e toʻatolu a Iopu i puapuaga uma ua oo iā te ia, ona ō mai ai lea mai i o latou nuu, o Elifasa le Timanu,+ o Pilitati le Sua,+ ma Sofara le Naama.+ Ua latou filifili faatasi+ e ō atu e faamaise ma faamāfanafana iā te ia.+ 12  Ina ua latou vāai mamao atu, latou te leʻi mātaulia o ia. Ona latou fetagisi leotetele lea, ua taʻitasi ma saei+ lona ofu, ma asu aʻe le lefulefu i luga o o latou ulu.+ 13  Na latou nonofo+ faatasi pea ma ia i le eleele mo ao e fitu ma pō e fitu, ma e leai foʻi se tasi na fai atu se upu iā te ia, auā na latou iloa lona matuā tigā+ tele.

Faamatalaga Pito i Lalo