Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Ioane 19:1-42

19  O le taimi lea, ua ave ai e Pilato Iesu ina ia matuā sasaina o ia.+  Ua fili foʻi e fitafita se pale tuitui ma tuu atu i lona ao, ma faaofu o ia i se ofu tele violē,+  ona latou ō mai lea ma faapea mai iā te ia: “Talofa! le Tupu o tagata Iutaia.” Ua latou tapō foʻi i ona fofoga.+  Ua toe alu atu Pilato i fafo ma faapea atu iā i latou: “Vaai! Ua ou aumaia o ia i fafo iā te outou ina ia outou iloa ai, ou te lē iloa se mea sesē ua ia faia.”+  Ona sau lea o Iesu i fafo, o loo i lona ao le pale tuitui ma o loo ofu i le ofu tele violē. Ona fai atu lea o Pilato iā i latou: “Faauta! O le tagata!”  Ae ina ua vāai mai le ʻaufaitaulaga sili ma leoleo iā te ia, ona latou alalaga mai lea: “Ia tutuʻi o ia i luga o le laau!+ Ia tutuʻi o ia!” Ua fai atu Pilato iā i latou: “Ia outou ave o ia ma tutuʻi i luga o le laau, auā ou te lē iloa se mea sesē ua ia faia.”+  Ua tali mai tagata Iutaia iā te ia: “E iai la matou tulafono,+ ma e tatau ona oti o ia e tusa ma le tulafono, auā ua ia fai mai, o ia o le atalii o le Atua.”+  Ina ua faalogo Pilato i nei upu, ona atili ai lea ona fefe o ia,  ona toe ulufale atu lea o ia i le maota o le kovana ma faapea mai iā Iesu: “O fea e te sau ai?” Ae e leʻi tali atu Iesu iā te ia.+ 10  Ona fai mai lea o Pilato iā te ia: “Pe e te lē tali mai ea iā te aʻu?+ Pe e te lē iloa ea, ua iā te aʻu le pule e faasaʻoloto ai oe, ma ua iā te aʻu foʻi le pule e tutuʻi ai oe i luga o le laau?” 11  Ua tali atu Iesu iā te ia: “E leai lava sau pule e faasala ai aʻu, pe ana lē tuuina mai iā te oe mai lugā.+ O le mea lea, ua sili ai le agasala a le tagata na tuuina atu aʻu iā te oe.” 12  O le mea lea ua saʻili ai pea Pilato i se auala e faasaʻoloto ai o ia. Ae ua alalaga mai tagata Iutaia e faapea: “Afai e te faasaʻolotoina lenei tagata, e lē o oe o se uō a Kaisara. O so o se tasi e na te faia o ia ma tupu, e tetee o ia iā Kaisara.”+ 13  Ina ua faalogo Pilato i nei upu, ona ia ave lea o Iesu i fafo, a ua nofo o ia i le nofoa faamasino, i le mea ua taʻua o le Paepae Maa, ae i le gagana Eperu, e taʻua o Kapata. 14  O le taimi lea e faia ai sauniuniga+ mo le paseka, ma e tusa lea ma le itula e ono.* Ona ia fai atu lea i tagata Iutaia: “Vaai! O lo outou tupu!” 15  Ae peitaʻi, ua latou alalaga mai: “Ia fasioti o ia! Ia fasioti o ia! Ia tutuʻi o ia i luga o le laau!” A ua fai atu Pilato iā i latou: “Po ou te tutuʻi ea i luga o le laau lo outou tupu?” Ua tali mai le ʻaufaitaulaga sili: “E leai so matou tupu ua na o Kaisara.”+ 16  Ona ia tuuina atu loa lea o ia iā i latou ina ia tutuʻi i luga o le laau.+ Ona latou ave ai lea o Iesu. 17  Ua ia amo le laau e faapuapuagatia* ai o ia,+ ona maliu atu+ lea o ia i le mea ua taʻua o le Ulupoo, ae i le gagana Eperu, o Kolokota,+ 18  ma o i inā ua faatautauina ai o ia i le laau,+ faatasi ma isi tamāloloa e toʻalua, o le isi i le tasi itu, ma le tasi i le isi itu, ae ogatotonu ai Iesu.+ 19  Ua tusi foʻi e Pilato se faaupuga ma tuu i luga aʻe o le laau. Ua tusia e faapea: “O Iesu le Nasareta, o le Tupu o tagata Iutaia.”+ 20  Ua faitau ai le toʻatele o tagata Iutaia i lenei faaupuga, auā o le nofoaga ua tutuʻi ai Iesu i luga o le laau, e latalata i le aai,+ ma ua tusia i le gagana Eperu, Latina, ma le gagana Eleni. 21  Ae peitaʻi, ua fai atu le ʻaufaitaulaga sili a Iutaia iā Pilato: “Aua le tusia, ‘O le Tupu o tagata Iutaia,’ ae ia tusi faapea, ua fai mai o ia, ‘O aʻu o le Tupu o tagata Iutaia.” ’ 22  Ua tali mai Pilato: “O le mea ua ou tusia, ua ou tusia lava.” 23  Ina ua tutuʻi e fitafita Iesu i luga o le laau, ona latou ave lea o ona ofu tele, ua vaevae i vaega e fā, ua tofu le fitafita ma lana ofu, e iai foʻi ma le ofu pito i totonu. Ae o le ofu pito i totonu, e leai se sooga, ua lalagaina mai i luga e oo i lalo.+ 24  Ona latou talatalanoa ai lea ma faapea ane: “Aua neʻi o tatou saesaeina le ofu ae seʻi tatou faia le vili, e iloa ai po o ai e ave ma ia.” Ua faia lenei mea, ina ia taunuu ai tusitusiga paia e faapea: “Ua latou tufatufa oʻu ofu iā i latou, ae ua latou fai le vili i loʻu ofu pito i totonu.”+ Ua faia moni e fitafita nei mea. 25  A ua tutū latalata ane i le laau o loo faapuapuagatia ai Iesu, o lona tinā,+ ma le uso o lona tinā; ma Maria+ le avā a Kalopa, ma Maria le Makatala.+ 26  Ua silasila atu Iesu i lona tinā, ma le soo ua ia alofa+ i ai o loo tutū latalata ane, ua ia fetalai atu i lona tinā: “Le mafine e, vaai foʻi! O lau tama!” 27  Ona ia faapea atu lea i lona soo: “Vaai! O lou tinā!” O le taimi lava lenā ua ave ai e lona soo o ia i lona aiga. 28  Mulimuli ane, ua silafia e Iesu ua faataunuuina nei mea uma, ae ina ia taunuu ai tusitusiga paia, ona ia fetalai atu lea: “Ua ou fia inu.”+ 29  O loo iai i inā se ipu ua tumu i le uaina oona. Ona latou tuu lea o le omomi ua fufui i le uaina oona i le pito o le laau o le isopo, ma avatu ma tuu atu i lona fofoga.+ 30  Ua talia e ia le uaina oona, ona ia fetalai atu lea: “Ua taunuu!”+ ua faagaugau lona ao, ona tō ai lea o lana mānava.*+ 31  Talu ai o le aso lea o le Sauniuniga,+ ma ina ia lē tuua+ ai pea tino i luga o laau i le Sapati, (auā o le Sapati sili lenā,)+ ua talosaga atu ai tagata Iutaia iā Pilato, ina ia gauia o latou vae ma aveese o latou tino. 32  Ona ō mai lea o fitafita ma gaui vae o le tamāloa muamua ma vae o le isi tamāloa, ia na faatautauina faatasi ma ia. 33  Ae ina ua oo atu iā Iesu, ua latou iloa ai ua maliu o ia, ma latou te leʻi gauia ona vae. 34  Ae ua tutuʻi e se tasi o fitafita lona itu i le tao,+ ona tafe mai ai lea o le toto ma le vai. 35  A o lē na vaai i lenei mea, ua molimau atu, ma e moni lava lana molimau, ma ua iloa e lenā tagata, ua ia taʻu atu mea moni, ina ia outou talitonu ai foʻi.+ 36  O le mea moni, ua tutupu nei mea ina ia taunuu ai tusitusiga paia e faapea: “E leai sona ivi e nutililiia.”+ 37  Ua fai mai foʻi le isi mau i tusitusiga paia: “E latou te vāai atu i Lē na latou tuʻia.”+ 38  Ua mavae nei mea, ona sau ai lea o Iosefa mai Arimataia, o se soo o Iesu, ae sa faalilolilo ona o lona fefe i tagata Iutaia,+ ma talosaga atu iā Pilato e na te aveina le tino o Iesu, ma na ioe+ i ai Pilato. Ona sau ai lea o ia ma ave lona tino.+ 39  Ua sau foʻi Nikotemo, o le tagata lea na alu atu muamua iā te ia i le pō, ua aumai se taaʻiga muro ma aloe, pe tusa e selau pauna* le mamafa.+ 40  Ona latou ave lea o le tino o Iesu ma fusi i ʻie faatasi ma mea manogi,+ e pei o le tū a Iutaia i le sauniuniga o se tanuga. 41  O loo iai se togālaau i le nofoaga ua tutuʻi ai o ia i luga o le laau, ma i inā o loo iai se tuugamau+ fou e leʻi tuuina i ai se tasi. 42  Ona o le sauniuniga+ a tagata Iutaia, ua latou tuu ai Iesu i inā auā e latalata ane le tuugamau.

Faamatalaga Pito i Lalo

Pe tusa ma le tā o le 12 i le aoauli.
Tagaʻi i le Faaopoopoga e 10.
I le gagana Eleni, “ua tuu atu lona agaga.”
Tagaʻi i le Faaopoopoga e 14.