Accessibility setting

Filifili le gagana

Skip to secondary menu

Skip to table of contents

Skip to content

Molimau a Ieova

Faa-Samoa

Tusi Paia i le Initaneti

O LE TUSI PAIA–O LE FAALILIUGA A LE LALOLAGI FOU

Ioane 12:1-50

12  Ua toe ono aso oo i le paseka, ma ua taunuu atu Iesu i Petania+ i le mea ua iai Lasalo,+ o lē na toe faatūina e Iesu mai i le oti.  Ona latou saunia ai lea o se taumafataga i le afiafi i inā mo ia. Ua tautua+ Mareta,+ a o Lasalo, o se tasi o i latou o loo taooto e aai faatasi ma ia.+  Ona ave lea e Maria o le pauna* o le suāuu manogi, o le nato māoʻi+ e sili ona taugatā, ua uu ai vae o Iesu ma soloi i lona lauulu.+ Ua sasala ai le manogi o le suāuu i le fale atoa.  A ua fai mai le tasi o ona soo, o Iuta le Sekara,+ o lē na te faalataina o ia:  “Aiseā ua lē faatau atu ai lenei suāuu manogi+ i le tolu selau tenari, ma avatu i ē e matitiva?”+  Ua ia fai mai lenei tala, e lē ona o le manatu mamafa i ē e matitiva, ae ona o ia o se gaoi,+ o loo iā te ia le pusa e teu ai tupe,+ ma e masani ona ia avea tupe na tuu ai i totonu.  Ona faapea atu ai lea o Iesu: “Tuu ai pea o ia, ina ia faia e ia lenei sauniuniga mo le aso o loʻu tanuga.+  Auā tou te faatasi pea ma ē e matitiva,+ ae tou te lē faatasi pea ma aʻu.”  Ua iloa e le motu o tagata e toʻatele o Iutaia ua iai o ia i inā, ona latou ō mai ai lea, e lē na o le fia vāai iā Iesu, ae ona o le fia vāai foʻi iā Lasalo, o lē ua ia toe faatūina mai i le oti.+ 10  Ona taupulepule lea o le ʻaufaitaulaga sili ina ia fasiotia foʻi Lasalo,+ 11  auā e toʻatele tagata Iutaia o ē ua ō atu i inā, ua faatuatua iā Iesu ona o ia.+ 12  O le aso na sosoo ai, ua faalogo ai le motu o tagata e toʻatele o ē ua ō mai i le tausamiga, e maliu mai Iesu i Ierusalema, 13  ona latou ave lea o lālā o laau o pama,+ ma ō atu e faafeiloaʻi o ia. Ona latou alalaga+ lea: “Matou te tatalo ia faaola iā te ia!+ E manuia lē e maliu mai i le suafa o Ieova,+ o le tupu+ foʻi o Isaraelu!” 14  Ae ina ua maua e Iesu se tamaʻi asini,+ ona ia tiʻetiʻe ai lea e pei ona tusia: 15  “Aua e te fefe, le tama fafine a Siona. Faauta! o loo afio mai lou tupu,+ o loo tiʻetiʻe i le tamaʻi asini.”+ 16  E leʻi mātauina e ona soo nei mea i le taimi muamua,+ ae ina ua faamamaluina Iesu,+ ona latou toe manatua ai lea o nei mea ua tusia e uiga iā te ia, ma na latou faia nei mea iā te ia.+ 17  Ua molimau+ atu pea e uiga iā te ia o ē na faatasi ma ia, a o ia valaau atu iā Lasalo+ i le tuugamau, ma toe faatūina o ia mai i le oti. 18  O le mea lea, ua ō atu ai le motu o tagata e faafeiloaʻi iā te ia, auā ua latou faalogo i lenei faailoga+ na ia faia. 19  Ona talatalanoa lea o le ʻau Faresaio:+ “Ua tatou iloa, ua leai se mea tatou te mafaia. Vaai foʻi! Ua mulimuli atu le lalolagi ia te ia.”+ 20  Ua iai foʻi nisi tagata Eleni+ i ē ua ō aʻe e tapuaʻi i le tausamiga. 21  Ona ō atu lea o i latou nei iā Filipo,+ o lē e sau mai i Petesaita i Kalilaia, ua latou talosaga atu iā te ia e faapea: “Lau susuga e, e matou te fia vāai iā Iesu.”+ 22  Ua alu atu Filipo ma taʻu atu iā Aneterea. Ona ō mai lea o Aneterea ma Filipo, ua taʻu mai iā Iesu. 23  A ua tali atu Iesu iā i laʻua: “Ua oo mai le itula e faamamaluina ai le Atalii o le tagata.+ 24  E moni, e moni, ou te fai atu iā te outou, Afai e lē paʻū le fatu o le saito i le eleele ma pala* ai, e tumau pea o se fatu saito; ae afai e pala,+ ona fua tele mai ai lea. 25  O lē e faapelepele i lona ola, e faaumatia ai, a o lē e ʻinoʻino i lona ola+ i lenei lalolagi, e faasaoina ai mo le ola e faavavau.+ 26  Afai e fia auauna mai se tasi iā te aʻu, inā mulimuli mai ia o ia iā te aʻu, ma o le mea ou te iai, e iai foʻi laʻu auauna.+ Afai e auauna mai se tasi iā te aʻu, e viia o ia e le Tamā.+ 27  O lenei, ua popole+ tele loʻu loto, ma o le ā saʻu upu e fai atu? Loʻu Tamā e, ia e faaola mai iā te aʻu i lenei itula.+ Ae ui i lea, o le mea lava lenei ua ou oo mai ai i lenei itula. 28  Loʻu Tamā e, ia faamamaluina lou suafa.” Ona oo mai ai lea o le siʻufofoga+ mai i le lagi e faapea: “Ua ou faamamaluina loʻu igoa, ma ou toe faamamaluina ai.”+ 29  Ona faapea ane lea o le motu o tagata ua tutū ma faalogo i ai, ai o se faititili. A ua faapea ane nisi: “O se agelu lea ua fetalai mai iā te ia.” 30  Ua tali atu Iesu: “Ua oo mai lenei siʻufofoga e lē ona o aʻu, ae ona o outou.+ 31  O lenei, ua faamasinoina le lalolagi, ma o le a tuliesea+ le pule o lenei lalolagi.+ 32  Ae afai e siitia+ aʻu mai i le eleele, o le a tosina mai tagata eseese iā te aʻu.”+ 33  Ua ia fetalai i nei mea e faailoa ai le auala e maliu ai o ia.+ 34  Ona tali mai lea o le motu o tagata iā te ia: “Ua matou faalogo i le Tulafono e faapea, e tumau e faavavau+ le Keriso; ae faapefea ona e fai mai e tatau ona siitia i luga le Atalii o le tagata?+ O ai lenei Atalii o le tagata?”+ 35  Ona fetalai atu ai lea o Iesu iā i latou: “O le a iai iā te outou le malamalama mo sina taimi. Ia outou savavali a o iā te outou le malamalama, ina neʻi manumalo le pōuliuli+ iā te outou, ma o lē e savali i le pōuliuli e na te lē iloa le mea o alu i ai o ia.+ 36  Inā faatuatua ia i le malamalama manū o iā te outou le malamalama, ina ia avea outou ma atalii o le malamalama.”+ Ua fetalai Iesu i nei mea, ona maliu ese lea o ia ma ua lafi iā i latou. 37  Ae e ui lava i le tele o faailoga na ia faia i o latou luma, ae latou te leʻi faatuatua lava iā te ia, 38  ina ia taunuu ai upu a le perofeta o Isaia e faapea: “Ieova e, o ai ua faatuatua i le mea ua matou faalogo i ai?+ O ai foʻi ua faaalia i ai le aao o Ieova?”+ 39  O le mea lea ua lē mafai ai ona latou talitonu, auā na toe faapea mai Isaia: 40  “Ua ia faatauasoina o latou mata, ma ua ia faamaaa o latou loto,+ ina neʻi o latou iloa se mea, ma lagona e o latou loto ma liliu mai ma ou faamālōlōina ai i latou.”+ 41  Ua fai mai e Isaia nei upu, auā ua ia vaai i lona mamalu,+ ma ua ia tautala atu e uiga iā te ia. 42  Ae ua faatuatua le toʻatele o taʻitaʻi iā te ia.+ Peitaʻi, ona o le ʻau Faresaio, ua latou lē faailoa mai ai o ia, ina neʻi tutuliese i latou mai i le sunako.+ 43  Auā ua sili lo latou naunau i le viiga mai i tagata, nai lo o le viiga mai i le Atua.+ 44  Ua alaga Iesu ma faapea atu: “O lē e faatuatua mai iā te aʻu, e lē na o aʻu ua faatuatua i ai, a o lē na auina mai aʻu;+ 45  ma o lē ua vaai mai iā te aʻu, ua vaai foʻi o ia i lē na auina mai aʻu.+ 46  Ua ou sau e pei o le malamalama i le lalolagi,+ ina ia lē tumau pea i le pōuliuli+ o ē uma e faatuatua iā te aʻu. 47  Pe afai e faalogo se tasi i aʻu upu ae lē tausia, ou te lē faamasino iā te ia, auā ou te leʻi sau e faamasino le lalolagi,+ ae ia faaolaina.+ 48  O sē e manatu māmā iā te aʻu ma e lē talia aʻu upu, e iai lē e na te faamasinoina o ia. O le upu+ ua ou fai atu ai, e faamasinoina ai o ia i le aso mulimuli; 49  auā ou te lē tautala atu i oʻu lava manatu, a o le Tamā o lē na auina mai aʻu, ua ia tuuina mai le poloaʻiga e tusa ma le mea e taʻu atu ma tautala atu ai.+ 50  Ua ou iloa foʻi, o lana poloaʻiga o le ola lea e faavavau.+ O le mea lea, ua ou tautala atu ai i mea ua faailoa mai e le Tamā iā te aʻu, o mea ia ua ou tautala atu ai.”+

Faamatalaga Pito i Lalo

Po o le 327 kalama.
Pe “e lē paʻū le fatu o le saito i le eleele ma pē ai.”